بۇگىندە كوكتەمگى دالا جۇمىستارىنا ءوڭىر ديقاندارى بەلسەنە كىرىسۋدە. بۇل رەتتە قورداي اۋدانىندا جىل سايىن ەگىلەتىن ءداندى-داقىلدارمەن قاتار, جەمىستىڭ جاڭا تۇرلەرىن وسىرۋگە دە كوڭىل ءبولىنىپ وتىر.
قازىرگى كەزدە سارىبۇلاق اۋىلدىق وكرۋگىندە ورنالاسقان «بلاگوۆەششەنكا» جشس قۇلپىنايدىڭ «البيون» سۇرپىن وتىرعىزۋدى قولعا العان. قۇلپىنايدىڭ بۇل ەرەكشە سۇرپىنىڭ جيدەگى قاتتى ءارى ءتاتتى جانە حوش ءيىستى بولىپ كەلەدى. جيناعاننان كەيىن دە تاۋارلىق ءتۇرىن جوعالتپاي, ساۋدا نارىعىنا شىعارۋعا وتە ىڭعايلى. ءارى بۇل جەمىستىڭ كوپشىلىكتىڭ سۇرانىسىنا يە ەكەندىگى دە داۋسىز.
اتالعان سەرىكتەستىكتىڭ باسشىسى ءومىرالى ۆارشاكيدزە بىلتىر قۇلپىناي كوشەتتەرىن 10 گەكتار القاپقا وتىرعىزىپ, ودان 5-6 توننا ءونىم الىپتى. بيىل كاسىپكەر تاعى دا 300 مىڭ ءتۇپ كوشەت ساتىپ الىپ, ەگىس كولەمىن بىرنەشە گەكتار القاپقا دەيىن ارتتىرعان. قۇلپىناي وسىرۋمەن اينالىساتىن شارۋاشىلىققا بۇل ماقساتقا بۇگىندە مەملەكەت تاراپىنان قولداۋ كورسەتىلىپ, 50 پايىز سۋبسيديا بەرىلۋدە. «مەملەكەت قولداۋىنىڭ ناتيجەسىندە قۇلپىنايدان مول ءونىم الۋعا بارلىق جاعداي جاسالعان. قۇلپىناي ءوسىرۋ تابىسى مول جۇمىس. ول جىل سايىن ءونىم بەرەدى. ەڭ باستىسى, بارلىق تەحنولوگيانى مۇقيات ساقتاعان ءجون», دەيدى ءومىرالى ۆارشاكيدزە.