ەلباسى نۇرسۇلتان نازارباەۆ امانجول قوشانوۆتىڭ قايتىس بولۋىنا بايلانىستى مارقۇمنىڭ وتباسى مەن تۋعان-تۋىستارىنا كوڭىل ايتۋ جەدەلحاتىن جولدادى, دەپ حابارلادى تۇڭعىش پرەزيدەنت – ەلباسىنىڭ ءباسپاسوز قىزمەتى.
قازاقستاننىڭ تۇڭعىش پرەزيدەنتى نۇرسۇلتان نازارباەۆ كورنەكتى عالىم, ۇلتتىق عىلىم اكادەمياسىنىڭ اكادەميگى امانجول قوشانوۆتىڭ ومىردەن وتۋىنە بايلانىستى اۋىر قايعىعا ورتاقتاسىپ كوڭىل ايتتى.
«امانجول قوشان ۇلى سانالى عۇمىرىن عىلىم جولىنا ارناپ, وتاندىق ەكونوميكا تەورياسى سالاسىن دامىتۋعا قوماقتى ۇلەس قوسقان تۇعىرلى تۇلعا بولاتىن. ول ەلىمىزدىڭ ەكونوميكالىق مۇددەلەرى جۇيەسىن جاساۋ, ۇلتتىق ەكونوميكالىق قاۋىپسىزدىكتى قامتاماسىز ەتۋ سياقتى كوپتەگەن ماڭىزدى ماسەلە بويىنشا ىرگەلى زەرتتەۋلەر جۇرگىزىپ, مەملەكەتتىك عىلىمي باعدارلامالار جاساۋعا اتسالىستى. ەكونوميكالىق تەوريا بويىنشا وزىندىك مەكتەبىن قالىپتاستىردى», دەلىنگەن جەدەلحاتتا.
ەلباسى امانجول قوشانوۆتىڭ عيبراتتى عۇمىرى مەن جارقىن بەينەسى جۇرتشىلىق جادىندا ءاردايىم ساقتالاتىنىنا سەنىم ءبىلدىردى.