بىلتىردان بەرى تۇرعىندار سانى ميلليونعا جەتپەسە دە, ءتىپتى تىعىز ورنالاسپاسا دا اتىراۋ وبلىسىنىڭ باسىنان «بۇلت» ارىلماي-اق قويدى. بۇل – سوڭعى بىرنەشە كۇن «سارى ايماقتا» تۇراقتاعان وڭىردەگى كوروناۆيرۋس ينفەكتسياسىنىڭ قاۋپى. تۇرعىندار اراسىندا قاۋىپتى ۆيرۋستى جۇقتىرۋ دەرەگىنىڭ ءالسىن-ءالسىن كوبەيۋى اتالعان ءوڭىردىڭ «قىزىل ايماققا» قايتا كىرۋىنە سەبەپ بولىپ وتىر.
وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ اقپاراتىنا سۇيەنسەك, وتكەن تاۋلىكتە, ياعني 16 مامىردا 77 ادام ساۋىعىپ شىققان ەكەن. الايدا, تاعى 77 ادام كوروناۆيرۋس ينفەكتسياسىن جۇقتىرىپ الىپتى.
– سوڭعى تاۋلىكتە قاۋىپتى ۆيرۋس جۇقتىرعانداردىڭ اراسىندا اتىراۋ قالاسىنان 49 ادام بار. تەڭىز كەن ورنىندا 13 ناۋقاستان كوروناۆيرۋس ينفەكتسياسىنىڭ بەلگىسى راستالدى. سونداي-اق, قۇرمانعازى اۋدانىندا – 5, جىلىويدا – 4, ماقاتتا – 4, يندەردە – 1, قىزىلقوعادا 1 تۇرعىننان Covid-19 ىندەتى انىقتالدى. ونىڭ ىشىندە 33 ناۋقاستا كوروناۆيرۋستىڭ سيمپتومدى ءتۇرى بايقالدى, – دەدى باسقارمانىڭ ءباسپاسوز قىزمەتى.
وڭىردە ءۇي جاعدايىندا ەمدەلىپ جاتقان ناۋقاستار دا ازايار ەمەس. قازىر 638 ناۋقاستىڭ ءۇي جاعدايىندا ەمدەلىپ جاتقانى بەلگىلى بولىپ وتىر. ال, ينفەكتسيالىق ستاتسيونارلاردا 518 ناۋقاس جاتىر. ماسەلەن, مودۋلدىك اۋرۋحانادا – 147, اتىراۋداعى №2 وبلىستىق اۋرۋحانادا – 121, اۋداندارداعى ينفەكتسيالىق ستاتسيونارلاردا – 121, فتيزيوپۋلمونولوگيالىق ورتالىقتا 53 پاتسيەنت وقشاۋلانىپتى.
ارينە, وڭىردە كوروناۆيرۋس ينفەكتسياسىن تاراتپاۋ ماقساتىندا قولعا الىنعان جۇمىستى جوق دەۋگە بولمايدى. ويتكەنى, قاۋىپتى ۆيرۋسقا قارسى ۆاكتسينا سالاتىن 36 ستاتسيونارلىق, 10 جىلجىمالى بەكەت اشىلدى. مۇنداي بەكەتتەر ەمحانالاردا, وبلىستىق اكىمدىك پەن ماحامبەت اۋدانىندا, «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق اتىراۋ فيليالىندا, سونداي-اق, ساۋدا ورتالىقتارىندا جۇمىس ىستەيدى. وڭىرگە «سپۋتنيك V», «QAZVAC», «Hayat-Vax» ۆاكتسينالارى جەتكىزىلدى.
– اتىراۋ وبلىسىندا تۇرعىنداردىڭ سانى 650 مىڭ ادامدى قۇرايدى. ونىڭ ىشىندە 250 مىڭ تۇرعىندى ۆاكتسينالاۋ جوسپارلانىپ وتىر. بۇل ساناتقا ەكپە الۋعا قارسى كورسەتىلىمى جوق 18 جاستان اسقان تۇلعالار جاتادى, – دەيدى وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆ.
الايدا, ءالى دە تۇرعىندار تاراپىنان ۆاكتسينا الۋدىڭ باياۋ ەكەنى بايقالادى. ماسەلەن, وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ مالىمەتىنە قاراعاندا, 15-16 مامىردا 812 تۇرعىن عانا كوروناۆيرۋسقا قارسى ەكپە سالدىرعانى بەلگىلى بولىپ وتىر. ال, 1 اقپان-17 مامىر ارالىعىندا 44 707 ادام «سپۋتنيك V», «QAZVAC», «Hayat-Vax» ۆاكتسينالارىنىڭ I كومپونەنتىن سالدىرىپتى. اتالعان ۆاكتسينالاردىڭ II كومپونەنتى 14 486 ادامعا ەگىلىپتى.
ۆاكتسينا العانداردىڭ قاتارىندا وبلىس اكىمى ماحامبەت دوسمۇحامبەتوۆ تە بار. اكىم كوروناۆيرۋسقا قارسى ۆاكتسينا سالدىرۋ ءۇشىن «گەولوگ» ەلدى مەكەنىندەگى ەمحاناعا باردى.
– دارىگەرلەر الدىمەن تىركەۋدەن وتكىزدى. دەنە قىزۋىم مەن قان قىسىمىمدى ولشەپ, تولىق مەديتسينالىق تەكسەرۋ جۇرگىزدى. سودان كەيىن عانا قاراعاندى فارماتسەۆتيكا زاۋىتىندا شىعارىلعان «سپۋتنيك-V» ۆاكتسيناسىن سالدىرتتىم. ۆاكتسينادان كەيىن جارتى ساعات ارنايى بولمەدە ماماندار باقىلاۋىندا بولدىم. قازىر جاعدايىم جاقسى, ۆاكتسينانىڭ ەشقانداي جاناما اسەرى بايقالعان جوق. ماماندار ەكپە سالىنعان جەرگە سۋ تيگىزبەي, جىلى ۇستاۋ, كۇتىنىپ ءارى ساقتىق شارالارىن ۇستانۋعا كەڭەس بەردى. جاقىندارىمىز بەن اينالامىزداعى ادامداردى دا ءوزىمىزدى قورعاۋ ءۇشىن كوروناۆيرۋسقا قارسى ۆاكتسينا الۋ وتە ماڭىزدى, – دەيدى وبلىس اكىمى م.دوسمۇحامبەتوۆ.
ال ۆاحتالىق ادىسپەن جۇمىسقا تارتىلعان ادامى كوپ «تەڭىزشەۆرويل» كومپانياسىنا ساۋىردە «سپۋتنيك V» ۆاكتسيناسىنىڭ 15 مىڭ دوزاسى جەتكىزىلگەن ەدى. قازىر كەن ورنىندا كوروناۆيرۋس ينفەكتسياسىنا قارسى ۆاكتسينا سالدىرۋعا 15 مىڭ ادام نيەت ءبىلدىرىپ وتىر. كومپانيا باسشىلارىنىڭ مالىمەتىنشە, كەن ورنىنداعى جۇمىسشىلاردى ۆاكتسينالاۋ ەرىكتى جۇزەگە اسىرىلىپ جاتىر. وسى كەزگە دەيىن ۆاكتسينانىڭ ءى كومپونەنتىن 10 مىڭنان استام ادام سالدىردى. «تەڭىزشەۆرويل» مەن سەرىكتەس كاسىپورىنداردىڭ قىزمەتكەرلەرى 11 مامىردان باستاپ اتىراۋ, قۇلسارى, نۇر-سۇلتان, الماتى, ورال, شىمكەنت, اقتوبە, اقتاۋ جانە جاڭاوزەن قالالارىنداعى «مەديكەر» ورتالىقتارىنان ۆاكتسينا سالدىرا الادى.
قالاي دەسەك تە, «قىزىل ايماققا» بىرنەشە رەت ەنگەن اتىراۋداعى قاۋىپتى ۆيرۋستى جۇقتىرۋ تولاستار ءتۇرى كورىنبەيدى. دارىگەرلەر كوروناۆيرۋس ينفەكتسياسىن جۇقتىرماۋدىڭ ءبىر عانا جولىن ۇسىنىپ وتىر. بۇل – كوروناۆيرۋسقا قارسى ۆاكتسينا سالدىرۋ. جاقىنىنا جاناشىر بولعىسى كەلگەندەر وسىنداي قادامعا بارىپ وتىر.
اتىراۋ وبلىسى