بۇل جونىندە قازاقستان رەسپۋبليكاسى ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆتىڭ باتىس قازاقستان وبلىسىنا جۇمىس ساپارى بارىسىندا بەلگىلى بولدى دەپ حابارلايدى Egemen.kz.
باتىس قازاقستان وبلىسى سوڭعى بىرنەشە جىلدان بەرى سۋ تاپشىلىعىن كورىپ كەلەدى. اسىرەسە باستاۋىن رەسەي فەدەراتسياسى اۋماعىنان الاتىن قاراوزەن مەن سارىوزەنگە كەلەتىن سۋ مولشەرى كۇرت ازايىپ, وبلىستىڭ وڭتۇستىك اۋداندارىندا تۇراتىن شارۋالار ەرەكشە قيىندىق كورۋدە. جاڭاقالا وڭىرىندەگى قامىس-سامار كولدەر جۇيەسى تۇگەلگە جۋىق كەۋىپ, ەكولوگيالىق اپات دەڭگەيىنە جاقىنداعان.
ەل پرەزيدەنتىنىڭ تاپسىرماسىمەن باتىس قازاقستان وبلىسىنا ارنايى كەلگەن قازاقستان رەسپۋبليكاسى ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ وڭىردەگى سۋ ارنالارىنىڭ جۇمىسىن دا اۋەدەن تەكسەرىپ شىقتى.
مينيستر اۋەلى ۆارفولومەي سۋ قويماسىنىڭ جاعدايىمەن تانىستى. وڭىردەگى سۋشىلار ۆەدومستۆو باسشىسىنا ەگىستىكتەرگە سۋدىڭ جەتىسپەۋشىلىگى ماسەلەسى مەن سۋ قويمالارىنىڭ احۋالى تۋرالى باياندادادى.
ورال قالاسىنان 440, قازتالوۆ اۋدانىنىڭ ورتالىعىنان 70 شاقىرىم قاشىقتىقتا, «كىشىوزەن» وزەنىندە ورنالاسقان قويما مەملەكەتارالىق ماندەگى سۋ تورابى بولىپ ەسەپتەلەدى. قويما سارىوزەن سۋىن رەسەيدىڭ ساراتوۆ وبلىسى مەن قازاقستاننىڭ باتىس قازاقستان وبلىسىنا بولۋگە, ەكى وبلىستىڭ كولتاباندارىنا سۋ ءوز اعىسىمەن بارۋى ءۇشىن سۋ تىرەگىن قۇرۋعا ارنالعان.
ال قاراوزەنگە رەسەي فەدەراتسياسىنان كەلەتىن سۋ كولەمىنە تاۋەلدىلىكتى ازايتۋ ءۇشىن قازىر جاڭا سۋ قويماسىن سالۋ جوسپارلانىپ جاتقانى بەلگىلى بولدى. سۋ قويماسى قاراوزەن بويىندا, قازتالوۆ اۋدانىنىڭ جالپاقتال اۋىلىندا ورنالاسادى. سونىمەن قاتار, ءوڭىردىڭ وڭتۇستىك اۋداندارىنا قاراوزەن مەن سارىوزەن ارقىلى تۇراقتى سۋ جەتىپ تۇرۋى ءۇشىن ەدىل وزەنىنەن 135 ملن مەتر كۋب سۋ الۋ ماسەلەسى قاراستىرىلۋدا. بۇل ماقسات ءۇشىن رەسپۋبليكالىق بيۋدجەتتتەن 3,5 ملرد تەڭگە ءبولۋ كەرەك.
«رەسەيدىڭ ەدىل وزەنىنەن الىنعان سۋ ۆارفولومەي قويماسى ارقىلى باتىس قازاقستان وبلىسىنىڭ جانىبەك, قازتالوۆ, جاڭاقالا اۋداندارىنداعى 1637 گەكتار تۇراقتى سۋارمالى ەگىستىككە, 44018 گەكتار كولتاباندىق سۋارۋ القابىنا جانە 324700 گەكتار جايىلىمعا جىبەرىلەدى. بۇدان بولەك, باتىس قازاقستان وبلىسىنىڭ وڭتۇستىك اۋداندارىنداعى ەكولوگيالىق احۋالدى رەتتەپ وتىرۋ ءۇشىن ايدىن, سارىايدىن, قاڭباقتى جانە قامىس-سامار كول ايدىندارىن سۋ جىبەرىلىپ وتىرادى. سۋ قويماسىنىڭ سىيىمدىلىعى – 23 ملن مەتر كۋب» دەپ حابارلادى قازاقستان رەسپۋبليكاسى ەكولوگيا, گەولوگيا جانە تابيعي رەسۋرستار مينيسترلىگىنىڭ ءباسپاسوز قىزمەتى.