«تسيفرلى قازاقستان» مەملەكەتتىك باعدارلاماسى اياسىندا وسى جىلى شىمكەنتتەگى كاسىپورىندارعا 3,7 مىڭ اقىلدى سۋ ەسەپتەگىش قۇرالدارى ورناتىلماق. بۇل تۋرالى «سۋ رەسۋرستارى-ماركەتينگ» جشس باسشىسى اناربەك ورمان مالىمدەدى.
مەكەمە باسشىسىنىڭ ايتۋىنشا, سۋمەن جابدىقتاۋ جانە كارىز سالاسىنداعى وندىرىستىك پروتسەستەردە تسيفرلاندىرۋ جۇمىستارى قارقىندى جۇرگىزىلۋدە. وسىلايشا, جوبا تولىقتاي ىسكە قوسىلسا, كوممەرتسيالىق قۇرىلىمداردىڭ 86 پايىزىنا ادام فاكتورىنىڭ قاتىسۋىنسىز قىزمەت كورسەتىلەتىن بولماق.
«الداعى 5 جىلدا بارلىق تۇتىنۋشىعا اقىلدى سۋ ەسەپتەگىشتەر ورناتۋ جوسپارلانىپ وتىر. بۇگىندە قالاداعى 7 243 زاڭدى تۇلعالاردىڭ 2,5 مىڭ تۇتىنۋشىسى ەلەكتروندى باسقارۋ فۋنكتسياسى بار «IC-card» اقىلدى سۋ ەسەپتەگىشتى پايدالانۋدا», دەيدى مەكەمە باسشىسى.
تسيفرلى تەحنولوگيالار كاسىپورىن قىزمەتىنىڭ بارلىق سالاسىندا قولدانىلاتىنىن ايتقان سەرىكتەستىك باسشىسىنىڭ بايانداۋىنشا, تسيفرلاندىرۋدىڭ ناتيجەسىندە تۇرعىندار سۋدى ۇنەمدەي باستاعان. ال مەكەمەنىڭ حالىققا قىزمەت كورسەتۋ ساپاسى جوعارىلاعان.
بۇدان بولەك, 2025 جىلعا دەيىن شىمكەنت قالاسىنىڭ گەوپورتالىنا بارلىق سالانىڭ مالىمەتتەرى بىرەگەي فورماتتا جينالىپ, سۋمەن, كارىز جۇيەسىمەن قامتاماسىز ەتۋ جۇمىستارى ءجۇز پايىز تسيفرلى فورماتقا كوشپەك. بۇل ءوز كەزەگىندە سۋ جۇيەسىندەگى اقاۋلار مەن جوندەۋ جۇمىستارىن ونلاين باقىلاپ, سەرۆيستىك قىزمەتتىڭ ساپاسىن ارتتىرۋعا كومەكتەسپەك.
شىمكەنت