اتىراۋداعى نازارباەۆ زياتكەرلىك مەكتەبىنىڭ وقۋشىلارى حاديشا ساگەنوۆا مەن نۇراي قوسپاەۆا كۇندەلىكتى تاعامعا پايدالانىپ جۇرگەن كارتوپتىڭ قابىعىنان بيوپلاستيك وندىرەتىن جوبا ازىرلەدى. جاڭاشىلدىققا جانى قۇمار وقۋشىلار بۇل جوبانى كارانتين كەزىندەگى 9 ايدا ءۇي جاعدايىندا جۇزەگە اسىرىپتى.
وقۋشىلاردىڭ ايتۋىنا قاراعاندا, جوبادا قولدانىلاتىن ينگرەديەنتتىڭ ءبارى قاۋىپسىز دەۋگە بولادى. ويتكەنى جوبا اۆتورلارى تاجىريبەنىڭ نەگىزگى كومپونەنتى رەتىندە كارتوپتىڭ قابىعىن, دالىرەك ايتقاندا, كراحمالدى العان.
– بيوپلاستيكتىڭ قۇرامىنا ءار ۇيدەن تابىلاتىن رەاگەنتتەر مەن وسىمدىكتەردىڭ قالدىعى قولدانىلادى. ءبىز بۇل جوبامىز ارقىلى قورشاعان ورتاعا تاستالاتىن قالدىقتى كادەگە اسىرۋدى ويلاستىردىق. وسىلايشا, اۋا ساپاسىن جاقسارتۋعا ارنالعان بۇۇ-نىڭ تۇراقتى دامۋ سالاسىن قولداۋدى كوزدەدىك, – دەيدى جوبا اۆتورلارى حاديشا مەن نۇراي.
ەندى وقۋشىلار بيوپلاستيكتىڭ قۇرامىن جەتىلدىرە تۇسپەك. ماقسات – شيكىزاتتى قايتا وڭدەۋ ارقىلى قورشاعان ورتاعا كەلەتىن زالالدى ازايتۋ. بۇل ءۇشىن جاڭا ونىمگە پوليپروپيلەن مەن پوليەتيلەن قالدىعىن قوسۋ كوزدەلىپ وتىر.
اتىراۋ وبلىسى