بۇل تۋرالى قر ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆتىڭ الماتى وبلىسىنا جۇمىس ساپارى بارىسىندا بەلگىلى بولدى, دەپ حابارلايدى Egemen.kz.
ۆەدومستۆو باسشىسىنا «التىن-ەمەل» جانە «شارىن» ۇلتتىق پاركتەرىنىڭ ينفراقۇرىلىمىن دامىتۋ جوباسى تانىستىرىلدى.
«التىن-ەمەل» جانە «شارىن» ۇلتتىق پاركتەرىنە كەلۋشىلەرگە ايماقتىڭ ەرەكشە تابيعاتى جانە ونىڭ تاريحى تۋرالى ايتىلادى. ينۆەستور ۇلتتىق ساياباقتاردا ينفراقۇرىلىمدى جانە ەكوتۋريزمدى دامىتۋ جوباسىن جۇزەگە اسىرعان كەزدە وسىعان نازار اۋدارادى.
ەستەرىڭىزگە سالا كەتەيىك, بيىلعى جىلى اتالعان ۇلتتىق پاركتەردىڭ ۋچاسكەلەرىن تۋريستىك جانە رەكرەاتسيالىق قىزمەتتى جۇزەگە اسىرۋ ءۇشىن ۇزاق مەرزىمدى پايدالانۋعا بەرۋگە ارنالعان كونكۋرستاردىڭ قورىتىندىلارى بويىنشا «QazaqGeography» رقب جەڭىمپاز اتاندى.ەكوتۋريزمدى دامىتۋ تۇجىرىمداماسىنا سايكەس ۇلتتىق پاركتەردە قاۋىپسىز تۋريستىك مارشرۋتتار مەن سوقپاقتاردى دامىتۋعا, تۋريستىك وبەكتىلەردى كۇردەلى قۇرىلىستارسىز ورنالاستىرۋعا ەرەكشە ءمان بەرىلەدى. سونداي-اق زاماناۋي ۆيزيت-ورتالىقتار, گلەمپينگتەر, كەمپينگتەر, قازاق اۋىلى جانە كەرۋەن جولىن, تاماشالاۋ الاڭدارىن, دەمالۋعا ارنالعان ورىندار جاساۋ قاراستىرىلعان.«QazaqGeography» كومپانياسىنىڭ باسقارما توراعاسى ورمان نۇرباەۆتىڭ ايتۋىنشا, ۇلتتىق پاركتەردىڭ جۇمىسىندا بالالار مەن جاستاردىڭ ءبىلىم بەرۋ قىزمەتىنە باسا نازار اۋدارىلاتىن بولادى. «كەلۋشىلەرگە ايماقتىڭ قايتالانباس تابيعاتى تۋرالى عانا ەمەس, ونىڭ تاريحى جايلى دا اڭگىمەلەۋ جوسپارلانىپ وتىر. وزدەرىڭىز بىلەتىندەي, «التىن-ەمەل» ۇلتتىق پاركىنىڭ اۋماعىندا ەجەلگى بەسشاتىر قورعاندارى ورنالاسقان. سونداي-اق قازاقتىڭ ۇلى عالىمى شوقان ءۋاليحانوۆ ءومىرىنىڭ سوڭعى جىلدارىن «التىن-ەمەل» جەرىندە وتكىزدى. ءبىز وسىنداي تاريحي جاعدايلاردى جاس ۇرپاققا جەتكىزۋدى ماقسات ەتىپ وتىرمىز», دەپ اتاپ ءوتتى ينۆەستور.ءوز كەزەگىندە, «التىن ەمەل» مۇتپ باس ديرەكتورى حالىق ءبايادىلوۆ ەكوتۋريزمدى دامىتا وتىرىپ, ءوز ەكونوميكاسىن كوتەرە العان ەلدەردىڭ ۇلگىسى بويىنشا ينۆەستورمەن ىنتىماقتاسۋعا دايىن ەكەنىن ءبىلدىردى.
مينيستر ۇلتتىق پاركتەردە ەكوتۋريزمنىڭ دامۋى ماڭىزدى ەكەنىن اتاپ ءوتتى.«قازاقستاندا ەكولوگيالىق, ۇيىمداستىرىلعان ءتۋريزمدى دامىتۋ قاجەت. ەلىمىزدىڭ ەكوتۋريزمدى دامىتۋ الەۋەتى زور. مەملەكەت باسشىسى ەل ىشىندە ەكولوگيالىق تۋريزم مادەنيەتىن دامىتۋ مىندەتىن قويدى. بۇل ازاماتتاردىڭ ەكولوگيالىق ءبىلىم الۋىنا, تابيعاتقا ۇقىپتى قاراۋعا ىقپال ەتەتىنىنە سەنىمدىمىن. ەڭ باستىسى, جوبالار تابيعاتقا زيان كەلتىرىلمەي جۇزەگە اسىرىلۋى كەرەك. بۇل ەرەكشە قورعالاتىن تابيعي اۋماقتار», دەدى ماعزۇم مىرزاعاليەۆ.بيىلعى جىلعى ماۋسىم ايىندا ساراپشىلار, ەكولوگتار مەن قوعام وكىلدەرىن شاقىرا وتىرىپ, ۇلتتىق پاركتەردىڭ وسى جوبالارى بويىنشا قوعامدىق تىڭداۋلار وتكىزۋ جوسپارلانۋدا.