1 مامىرداعى جاعداي بويىنشا قازاقستاندا ۇوس جەڭىسىنە ۇلەس قوسقان 665 ۇوس قاتىسۋشىلارى مەن مۇگەدەكتەرى جانە 113,5 مىڭ باسقا ساناتتاعى ازاماتتار تۇرادى. ورتالىق كوممۋنيكاتسيالار قىزمەتىندە وتكەن بريفينگ بارىسىندا ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆ وسىنداي دەرەكتەردى كەلتىردى, دەپ حابارلايدى Egemen.kz.
اتاپ ايتقاندا قورشاۋداعى لەنينگراد تۇرعىندارى, كونتسلاگەرلەردىڭ بۇرىنعى كامەلەتكە تولماعان تۇتقىندارى, ۇوس قايتىس بولعان مۇگەدەكتەردىڭ ايەلدەرى (كۇيەۋلەرى), سوعىس ۋاقىتىندا قازا تاپقان جەسىرلەر, تىل ەڭبەككەرلەرى جانە ۇوس قاتىسۋشىلارى مەن مۇگەدەكتەرىنە تەڭەستىرىلگەن باسقا دا ادامدار.
«ەلىمىزدىڭ تاۋەلسىزدىگىنىڭ بارلىق 30 جىلى ىشىندە ارداگەرلەر مەن تىل ەڭبەككەرلەرىنە قامقورلىق كورسەتۋ, ولاردىڭ ءومىر ءسۇرۋ ساپاسىن ارتتىرۋ – مەملەكەتتىڭ الەۋمەتتىك ساياساتىنىڭ باستى باسىمدىقتارىنىڭ ءبىرى. قارت ادامداردى الەۋمەتتىك قورعاۋ شارالارى ورتالىق جانە جەرگىلىكتى دەڭگەيلەردە جۇزەگە اسىرىلادى. جىل سايىن زەينەتاقى جانە وزگە دە الەۋمەتتىك تولەمدەر كولەمى ۇلعايۋدا. 2021 جىلعى 1 قاڭتاردان باستاپ بازالىق زەينەتاقى 5%-عا جانە ىنتىماقتى زەينەتاقى 7%-عا, الەۋمەتتىك تولەمدەر 5%-عا ارتتىرىلدى. قابىلدانىپ جاتقان شارالار حالىقارالىق پراكتيكادا قولدانىلىپ جۇرگەن جوعالتىلعان تابىستى الماستىرۋ ستاندارتىن (40%) ارتتىرۋعا مۇمكىندىك بەردى, ول قازاقستاندا بازالىق جانە ورتاق زەينەتاقى تولەمدەرى ەسەبىنەن 49,9%-دى قۇرايدى», دەپ مالىمدەدى ەرلان اۋكەنوۆ.
سونداي-اق ول وزگە الەۋمەتتىك تولەمدەرگە قاراماستان, ازاماتتاردىڭ 20 ساناتى ارناۋلى مەملەكەتتىك جاردەماقى الاتىنىن جەتكىزدى. زەينەتاقىنى قوسا ەسەپتەگەندە, الەۋمەتتىك تولەمدەردىڭ ورتاشا جيىنتىق مولشەرى:
– ۇوس قاتىسۋشىلارى ءۇشىن – 182 851 تەڭگەنى;
– ۇوس مۇگەدەكتەرى ءۇشىن – 188 051 تەڭگە;
– باسقا مەملەكەتتەر اۋماعىنداعى سوعىس ارداگەرلەرىنە (اۋعانستاندا, ۆەتنامدا, الجيردە, مىسىردا, يراكتا جانە ت. ب.) – 198 801 تەڭگە;
– ۇوس قاتىسۋشىلارىنا تەڭەستىرىلگەن ادامدار ءۇشىن – 154 638 تەڭگە;
– ۇوس مۇگەدەكتەرىنە تەڭەستىرىلگەن ادامدار ءۇشىن-119 562 تەڭگە;
– ۇوس جىلدارىنداعى تىل ەڭبەككەرلەرىنە - 120 112 تەڭگەنى قۇرايدى.