سەنات دەپۋتاتتارى سۇيىندىك الداشەۆ پەن باقتىباي شەلپەكوۆ ماڭعىستاۋ وبلىسىنىڭ تۇپقاراعان اۋدانىنداعى ينفراقۇرىلىمدىق جوبالاردى ىسكە اسۋ بارىسىمەن تانىستى, دەپ حابارلايدى Egemen.kz.
سەنات دەپۋتاتتارى ساپار اياسىندا «جاڭا كەتىك» تۇرعىن ءۇي الابىندا وسى جىلدىڭ سوڭىنا پايدالانۋعا بەرىلەتىن جول قۇرىلىسىنىڭ جۇمىسىنا كۋا بولدى. بۇل جوبانىڭ ماڭىزدىلىعىن ەسكەرە وتىرىپ, سەناتورلار اۆتوجول قۇرىلىسىن سالۋشىلاردى جۇمىستى ساپالى جاساۋعا جانە ونى ۋاقىتىندا اياقتاۋعا شاقىردى.
«قازىرگى كەزدە اۆتوموبيل جولدارىنىڭ ساپاسىنا قانداي كوڭىل بولىنەتىنىن كورىپ وتىرسىز. بۇل ماسەلەنى پرەزيدەنت قاسىم-جومارت توقاەۆ قاتاڭ باقىلاۋعا الدى. مۇندا قۇرىلىس قارقىنى جاقسى. ونى ساقتاي وتىرىپ, اۆتوجولدى ۋاقىتىندا پايدالانۋعا بەرۋ اسا ماڭىزدى. بۇل جەرگىلىكتى تۇرعىنداردىڭ ءومىرىن ايتارلىقتاي جەڭىلدەتەدى», دەدى باقتىباي شەلپەكوۆ.
سونىمەن قاتار سەناتورلار بىرقاتار ينفراقۇرىلىمدىق نىسانداردى ارالادى. ولاردىڭ قاتارىندا تۇرعىنداردى ساپالى اۋىز سۋمەن قامتاماسىز ەتەتىن سۋ تۇششىتاتىن قوندىرعى بار, سونداي-اق «جۇمىسپەن قامتۋدىڭ جول كارتاسى» باعدارلاماسى اياسىندا جوندەۋدەن وتكەن جاعالاۋ بار.