كەرى كەتكەندەر

بالاباقشا كەزەگىن ءادىل بولەتىن ءبىر وڭتايلى جۇيە وسى سالاعا بۇيىرماي-اق قويدى. باسىندا بالاباقشا كەزەگى قولما-قول جولداما بەرۋ جۇيەسىنەن ەلەكتروندى فورماتقا اۋىسقاندا تاپ ءبىر وسى سالادان جەمقورلىق ءتۇپ-تامىرىمەن جويىلىپ كەتەتىندەي قۋانعان ەدىك. بالاباقشا كەزەگى eGov.kz پورتالىنا ەنگىزىلگەن ساتتە بيلىك «كەزەك اتا-انالاردىڭ كوز الدىندا وتەدى, اشىق تا ءادىل بولادى» دەپ سەندىرگەنى دە شىن. كوپ ۇزاماي ءبىلىم باسقارمالارى ەلەكتروندى ۇكىمەتتە ءاپ-ادەمى قالىپتاسقان كەزەكتى جەكە كومپانيالاردىڭ ەنشىسىنە بەرە باستادى.

وسىلايشا, استانالىق بالدىرعاندارعا ورىن ۇلەستىرۋ eGov.kz-تەن e-astana.kz جۇيەسىنە ءوتىپ, ودان كەيىن indigo24.kz پلاتفورماسىنا بەرىلدى. بالاباقشا كەزەگىنە بايلانىستى داۋ وسى جەردە باستالدى. ەڭ قىزىعى, بۇگىنگە دەيىن العا جىلجىپ كەلگەن كەزەك كەرى كەتە باستادى. اڭ-تاڭ بولعان اتا-انالار شۋ كوتەرىپ, ارىز-ارمانىن الەۋمەتتىك جەلىگە دە جازىپ جاتتى.

بۇل جاعداي ءوز باسىمىزدان دا ءوتتى. 2018 جىلى دۇنيەگە كەلگەن ۇلىمدى تۋا سالا كەزەك­كە قويىپ, بالاباقشاعا 4948-ءىن­­­­­­شى بولىپ تىركەلگەن ەدىك. بىرەر جىل­دان كەيىن تەكسەرسەك, كەزەگىمىزدى كەرى جىبەرىپ, 5587-ءشى ورىنعا اپارىپ تاستاپتى. ەكى جىلدان كەيىن ءتىپتى 6204-ءىنشى ورىندا ءجۇرمىز. كۇنى كەشە قاراسام, ايتەۋىر 4910 ورىندا تۇر ەكەنبىز. بىراق 25 مامىردان كەيىن بالاباقشا كەزەگى قايتادان جاڭارادى. سوندا «تاز كەيپىمىزگە» ءتۇسىپ, جۇرتتىڭ سوڭىندا تۇرماساق بولعانى.

بالاباقشا كەزەگىنىڭ العا ەمەس, كەرى كەتۋىنە نە سەبەپ؟ ءبىر گاپتىڭ بارى انىق. بۇل ماسەلە تالاي كوتەرىلىپ ءجۇر. ءبىلىم باسقارماسى ماماندارىنىڭ دا جاۋابىن جاتتاپ العانبىز. ولاردىڭ ايتۋىنشا, «كوپبالالى وتباسىلار, اسكەريلەر سەكىلدى جەڭىلدىگى بار ازاماتتاردىڭ بالالارى بالاباقشاعا ءبىرىنشى ىلىگەدى, ولارعا باسىمدىق بەرىلەدى». البەتتە, جەڭىلدىگى بار تۇلعالارعا كەزەكتەن تىس ورىن بولگەنىنە ەشكىمنىڭ تالاسى جوق. بىراق بالاباقشانى كەزەكسىز الاتىن مۇنداي ازاماتتار بۇرىن دا بولدى عوي؟ ول كەزدە نەگە كەزەك كەرى كەتپەگەن؟! وسىدان-اق جۇيە جاڭارعانىمەن, جۇمىس جاقسارماعانىن بايقاۋعا بولادى. بۇدان گورى «بالاباقشا كەزەگىنە كىم بۇرىن تىركەلەدى, سونىڭ كەزەگى بۇرىن كەلە­دى» دەگەن ەسكى قاعيدات الدەقايدا ادى­لى­رەك ەدى. ول كەزدە كەزەگىڭنىڭ كەرى كەتىپ جات­قانىنا شاعىمدانۋعا بولاتىن ەدى. حا­لىققا قىزمەت كورسەتۋ ورتالىعىنا با­رىپ, دالەلدەيتىن انىقتامانى نەمەسە كە­زەك­تىڭ سكرينشوتىن كورسەتسەڭىز نەمەسە ءبىلىم باسقارماسىنا كەلىپ, ماسەلەنىڭ انىق-قانىعىن بىلۋگە بولاتىن. ال قازىرگى ەلەكتروندى پلاتفورمادا بۇل مۇمكىن ەمەس. كەزەگىڭنىڭ كەرى كەتۋى مۇندا قالىپتى قۇ­بى­لىس. ەشكىمگە دە, ەشتەڭە دە دالەلدەي ال­مايسىڭ.

جۇرتشىلىق سەنىپ جۇرگەن indigo24.kz ­­جۇيەسىندە قيسىنسىز جايتتار كوپ. مى­سا­لى, بالاباقشادان بوساعان ورىندى ەلدەن بۇرىن الىپ قالۋ ءۇشىن ءوزىڭ دە, ينتەرنەتىڭ دە جىلدام بولۋى كەرەك. ءارى تاڭمەن تالاسا تۇرىپ, تاڭعى ساعات 7.00-گە 10 مينۋت قالعاندا جۇيەگە كىرىپ, سەرۆەردەگى ساعات ەتالونىن كىرپىك قاقپاي كۇزەتىپ وتىرۋىڭ كەرەك. ساعات تۋرا 7.00 بولعاندا بوساعان بالاباقشا ورىندارىنا جولداما الۋ جۇيەسى اشىلادى. وسى ساتتە شالت قيمىلداپ, indigo24.kz پورتالىنداعى جەكە كابينەتكە كىرىپ, «جولداما الۋ» باتىرماسىن باسىپ ۇلگەرۋ كەرەك. ەگەر عايىپتان باتىرمانى باسۋ باقىتى بۇيىرىپ قالسا (ويتكەنى ءدال كەرەك كەزدە بۇل باتىرما نەگە ەكەنى بەلگىسىز باسىلماي قالادى), بالاباقشا ءنومىرىن, ونداعى توپتى كورسەتىپ, جولداما الۋ پروتسەدۋرالارىن 10 مينۋتتا جىلدام اياقتاۋ كەرەك. وسى ۋاقىتتىڭ ىشىندە ۇلگەرمەسەڭىز, بالاباقشا ورىنى قولىڭىزدان سۋسىپ ءتۇسىپ, باسقاعا كەتەدى. پورتالدىڭ ارقاسىندا اتا-انالار ابدەن حاكەر بولاتىن ءتۇرى بار.

ينديگو ەلەكتروندى بالاباقشاسى جۇيە­سىن ءالى دە جەتىلدىرۋ كەرەك. ەل تۇسىنبەي جۇر­گەن جايتتار كوپ. اسىرەسە اقپاراتتىق-ءتۇسىندىرۋ جاعى كەمشىن. جۇيەگە كىرە قالساڭىز, «بالانىڭ تابىستى جولى وسى جەردەن باستالادى» دەگەن ادەمى ءسوز جازىلىپ تۇر. بىراق جۇيەنىڭ ءوزى وسىعان ساي بولا الماي تۇرعانى وكىنىشتى. سوندىقتان ءبىلىم باسقارمالارى كەزەكتىڭ نەگە كەرى كەتەتىنىن, بۇرىن تىركەلگەن بالالاردىڭ الدىنا ناقتى كىمدەر, قانداي نەگىزدە ولاردىڭ الدىن وراپ كەتكەنىن اشىق تۇردە كورسەتىپ, ءتۇسىندىرۋى قاجەت دەپ سانايمىز.