شىعىس قازاقستان وبلىسى گلۋبوكوە اۋدانىندا ءورت سوندىرۋشىلەر 100 شارشى مەترگە جايىلعان جالىندى ءسوندىردى, دەپ حابارلايدى Egemen.kz
شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنشە, بىسترۋحا اۋىلىنداعى زارەچنايا كوشەسىندە ورنالاسقان جەكە تۇرعىن ءۇي اۋلاسىندا ءورت شىققان. وقيعا ورنىنا قۇتقارۋشىلار كەلىپ جەتكەنشە شارۋاشىلىق قورا-جايلاردىڭ اعاش قۇرىلىمدارى جانىپ كەتتى. سونداي-اق ءتىلسىز جاۋ 10 توننا شوپكە تاراپ كەتكەن.
ء«ورت سوندىرۋشىلەر كوپ ۇزاماي جالپى اۋدانى 100 شارشى مەترگە جەتكەن قىزىل جالىندى ءوشىردى. ەڭ باستىسى, تۇرعىن ۇيگە ءبىر مەتر عانا قالعان ءورتتىڭ ءارى قاراي تارالۋىنا جول بەرىلمەدى», دەپ حابارلادى ۆەدومستۆو وكىلدەرى.
الدىن الا مالىمەت بويىنشا ءورتتىڭ شىعۋىنا وتتى پايدالانۋ كەزىندەگى سالعىرتتىق سەبەپ بولعان. ءورتتى سوندىرۋگە جەكە قۇرامنان 6 ادام مەن 2 تەحنيكا جۇمىلدىرىلدى.