شاعىن جانە ورتا بيزنەس سۋبەكتىلەرى بيىل دا نەسيە تولەمىن كەيىنگە شەگەرۋ جەڭىلدىگىن پايدالاناتىن بولدى. دەگەنمەن بۇل كومەك شوب-تىڭ قوردالانعان قارجىلىق پروبلەماسىن شەشىپ تاستامايتىنى دا بەلگىلى. ءارى جەڭىلدەتىلگەن نەسيەنى الا الماي پۇشايمان بولىپ جۇرگەن كاسىپكەرلەر قانشاما. ەكىنشى دەڭگەيلى بانكتەردىڭ سەكتوردى قولداۋعا اسا قاتتى ىقىلاس تانىتپاۋى سالاداعى احۋالدى ءسال-ءپال قيىنداتىپ تۇرعان جايى بار.
ءسال-ءپال دەپ جۇمسارتىپ تۇرمىز عوي, شىن مانىندە بانكتەن نەسيە راسىمدەۋ دەگەنىڭىز كاسىپورىندار ءۇشىن كادىمگىدەي اۋىرتپالىققا اينالعان. قاعازباستىلىققا تولى راسىمدەۋ پروتسەسى, ونىڭ ءوزى بىرنەشە جۇمىس كۇنىن الادى, كليەنتتىڭ نەسيە تاريحىنا قارايدى, بارىنەن قيىنى كەپىلگە مۇلىك قويۋدى تالاپ ەتەدى. ال مۇنداي تاۋەكەلدى شاعىن كاسىپورىندار يگەرە المايدى. الماتىدا ورنالاسقان, قالانى ءتاتتى توقاش ونىمدەرىمەن قامتاماسىز ەتىپ وتىرعان «المالى نان» جشس ءالى كۇنگە مەملەكەتتەن نە نەسيە, نە سۋبسيديا الىپ كورمەگەن.
– الايدا جەڭىلدەتىلگەن نەسيەگە ءبىز دە قول جەتكىزگىمىز كەلەدى. ويتكەنى ونىڭ كوپ پايدالى تۇسى بار. بىراق كەز كەلگەن بانك كەپىلگە م ۇلىك قويۋدى سۇرايدى. ال كاسىپكەرلەردىڭ بارلىعىندا دەرلىك جىلجىمايتىن م ۇلىك بار دەپ ايتا المايمىز. ءوزىڭ بىرنەشە ميلليون نەسيە الىپ, ونى ۇستەمەاقىسىمەن قايتاراسىڭ. سوعان قوسا جىلجىمايتىن م ۇلىك تىركەيسىڭ. بۇل ءبىز ءۇشىن ءتيىمسىز. مۇلىك قويۋ تالابىن الىپ تاستاعاندا عانا نەسيە راسىمدەۋگە بولار ەدى, – دەيدى كاسىپورىن باسشىسى گۇلناز تەمەشوۆا.
وسىلاي داعدارعان شوب سۋبەكتىلەرى ەندى ميكروقارجى ۇيىمدارىن جاعالاي باستادى. 2020 جىلدىڭ سوڭىندا اتالعان ۇيىمدار 418,1 ملرد تەڭگە زايم ۇسىنعان. بۇل دەگەنىڭىز 2019 جىلمەن سالىستىرعاندا 43 پايىزعا جوعارى. قارىز پورتفەلىنىڭ اينالدىرعان ءبىر جىلدا ءدال وسىنداي ديناميكامەن وسۋىنە ارينە, شاعىن جانە ورتا كاسىپورىندار ەلەۋلى ۇلەس قوسقان.
قازاقستان ەكونوميكاسىنا تۇراقتى مونيتورينگ جاساۋشى Ranking.kz جوباسىنىڭ دەرەگىنشە, شاعىن جانە ورتا بيزنەستى نەسيەلەۋ بويىنشا KMF ميكروقارجى ۇيىمى كوش باستايدى. ۇيىمنىڭ قارىز پورتفەلى 136,4 ملرد تەڭگەنى قۇرايدى, ءبىر جىلدا زايم سوماسى 2,8 پايىزعا ءوسىم كورسەتكەن. اتالعان كومپانيا نەگىزىنەن كاسىپكەرلىكتى قولداۋ, حالىقتىڭ ءال-اۋقاتىن ارتتىرۋ, اۋىل شارۋاشىلىعىن دامىتۋ باعىتىندا نەسيەلەۋمەن اينالىسادى.
ۇزدىك ۇشتىككە كىرگەندەر قاتارىندا «تويوتا فاينانشل سەرۆيسەز كازاحستان» (57,1 ملرد تەڭگە) جانە MyCar Finance (44,7 ملرد تەڭگە) بار. جالپى, ميكروقارجىلىق ۇيىمدار سوڭعى جىلدارى جەدەل دامۋ جولىنا قاراي بەت الدى. ولاردىڭ اكتيۆتەرى سوڭعى 4-5 جىل كولەمىندە ۇدايى ءوسىم كورسەتۋدە. جەڭىلدەتىلگەن نەسيە باعدارلامالارىن ۇسىنۋمەن قاتار شاعىن جانە ورتا بيزنەستى نەسيەلەۋگە دە بەلسەندى اتسالىسا باستاۋى ولاردىڭ جىلدام دامۋىنا سەرپىن بەرگەن سىڭايلى.
ەگەر جاعداي وسىلاي جالعاسا بەرەر بولسا وندا جاقىن كەلەشەكتە ميكرو قارجى ۇيىمدارى شاعىن جانە ورتا بيزنەسكە نەسيە بەرۋ تۇرعىسىنان ەكىنشى دەڭگەيلى بانكتەردى قۋىپ جەتۋى دە ىقتيمال. ويتكەنى وتاندىق قارجى ينستيتۋتتارىندا 2017-2019 جىلدارى شوب-قا نەسيە بەرۋ كولەمى ايتارلىقتاي ازايدى. 2019 جىلدىڭ سوڭىندا سەكتورداعى نەسيە پورتفەلى 2016 جىلمەن سالىستىرعاندا 1 ترلن تەڭگەگە ازايعان.
2021 جىلدىڭ 1 ساۋىرىندەگى جاعداي بويىنشا ەلىمىزدە 883 ميكروقارجىلاندىرۋ ۇيىمى تىركەلگەن. ونىڭ ىشىندە 178 ۇيىم تىكەلەي نەسيە بەرۋمەن اينالىسادى. بيىل 1 ناۋرىزداعى جاعداي بويىنشا قارجى نارىعىن رەتتەۋ جانە دامىتۋ اگەنتتىگىنە 1 024 كومپانيا ميكروقارجىلىق قىزمەت جاساۋ تۋرالى ءوتىنىش جولداعان.