كاسىپكەرلىكتى جاڭاشا رەتتەۋ ساياساتىن ەنگىزۋ ءۇشىن «Smart» رەتتەۋ» جوباسى قولعا الىنادى, دەپ حابارلايدى Egemen.kz
ۇكىمەت وتىرىسىندا ۇلتتىق ەكونوميكا ءمينيسترى اسەت ەرعاليەۆ سالاداعى سالىقتىق جەڭىلدىكتەر مەن زاڭنامالىق وزگەرىستەر تۋرالى دا اقپارات بەردى.
«2020 جىلعى 1 قاڭتاردان باستاپ ارناۋلى سالىق رەجيمدەرىن قولداناتىن شاعىن جانە ميكرو كاسىپكەرلىك سۋبەكتىلەرىن تابىس سالىعىنان 3 جىلعا بوساتۋ قولدانىلادى. وسى جىلدىڭ ءبىرىنشى قاڭتارىنان باستاپ, قىزمەت كورسەتۋ سالالارىندا الىنعان تابىستىڭ 3% مولشەرلەمەسىمەن بولشەك سالىقتىڭ جاڭا ارنايى رەجيمى ەنگىزىلدى. وتكەن جىلدىڭ ءبىرىنشى ساۋىرىنەن باستاپ, ءبىرىنشى شىلدەسىنە دەيىن زارداپ شەككەن سالالاردا ەڭبەكاقى تولەۋ قورىنان سالىقتاردى تولەۋدى كەيىنگە قالدىرۋ مۇمكىندىگى بەرىلەتىن بولدى», دەيدى ەرعاليەۆ.
ونىڭ سوزىنشە, «اتامەكەن» ۇلتتىق كاسىپكەرلەر پالاتاسى 50 مىڭنان استام كاسىپكەرلىك وبەكتىگە ساۋالناما جۇرگىزىپ, سونىڭ نەگىزىندە شاعىن جانە ورتا بيزنەستى قولداۋ جونىندەگى جاڭا شارالار پاكەتى ازىرلەنگەن.
«2021 جىلعا ارنالعان ەكونوميكالىق ءوسۋدى قالپىنا كەلتىرۋ جونىندەگى وزەكتەندىرىلگەن كەشەندى جوسپار شەڭبەرىندە 60-تان استام قولداۋ شارالارى كوزدەلگەن.
بيزنەسكە جۇكتەمەنى ازايتۋ, ونىڭ ىشىندە بىرقاتار سالىقتىق جەڭىلدىكتەر جانە سالىقتىق اكىمشىلەندىرۋدى جەڭىلدەتۋ. كاسىپكەرلەردىڭ قارجىلاندىرۋعا قول جەتىمدىلىگىن جەڭىلدەتۋ. سۇرانىستاعى نارىقتارعا قول جەتكىزۋ. اتالعان باعىت مەملەكەتتىك ساتىپ الۋلارعا جانە كۆازيمەملەكەتتىك سەكتوردىڭ ساتىپ الۋلارىنا قولجەتىمدىلىكتى جەڭىلدەتۋگە باعىتتالعان شارالار كوزدەلگەن. «Smart» رەتتەۋ كاسىپكەرلىك سالاسىندا جاڭا رەتتەۋ ساياساتىن ەنگىزۋدى كوزدەيتىن زاڭدى ازىرلەۋ مەن قابىلداۋدى قامتيتىن بولادى», دەدى ۆەدومستۆو باسشىسى.اسەت ەرعاليەۆ جاڭا ەكونوميكالىق جاعدايدا سالانى رەتتەۋدىڭ جاڭا ساياساتى ازىرلەنىپ جاتقانىن ايتتى.
«بيزنەسكە جۇكتەمەنى تۇبەگەيلى تومەندەتۋ, وڭتايلى جانە ءتيىمدى رەتتەگىش جۇيەنى قالىپتاستىرۋ ماقساتىندا كاسىپكەرلىك قىزمەتتى «تازا پاراقتان» رەتتەۋدىڭ جاڭا تاسىلدەرى قالىپتاستىرىلۋدا. ونىڭ ىشىندە مەملەكەت پەن كاسىپكەرلىكتىڭ ءوزارا ءىس-قيمىلىنىڭ بازالىق قاعيداتتارىن جەتىلدىرۋ, تالاپتاردى بەلگىلەۋ شارتتارى, رەتتەۋشىلىك اپەللياتسيا ينستيتۋتى, ەكسپەريمەنتتىك قۇقىقتىق رەجيم, مىندەتتى تالاپتار ءتىزىلىمى, ەسەپتىلىك, باقىلاۋداعى تاۋەكەل-تالداۋدى اۆتوماتتاندىرۋ, مەملەكەتتىك باقىلاۋدى جەتىلدىرۋ شارالارى قامتىلعان. قازىرگى تاڭدا ءتيىستى زاڭ جوباسى بارلىق مەملەكەتتىك ورگاندارمەن كەلىسىلىپ, ۇكىمەتتىڭ قاراۋىنا ەنگىزىلدى», دەدى مينيستر.