تۇركىستان وبلىسىنداعى كەنتاۋ قالاسىندا 18 بالانى باۋىرىنا باسقان كوپبالالى انا تۇرادى. قازىر تۇيمەكۇل ەرگەشقىزىنىڭ بەس پەرزەنتى اياقتانىپ, ءۇيلى بولعان, دەپ حابارلايدى Egemen.kz
جاس كەزىندە باۋىرلارىن جەتىلدىرەمىن دەپ تۇرمىس قۇرماعان كەلىنشەك كەيىننەن بالالى بولۋدى ارمانداپ, وزگە ۇلتتاردىڭ 18 بالاسىن اسىراپ العان. بۇگىندە ۇلكەن بەس پەرزەنتى ءوز الدىنا وتاۋ قۇرسا, كەنجە ۇلى نەبارى ەكى جاستا. كاسىپكەر ايەل وسىنشاما بالانى باۋىرىنا باسام دەپ ويلاماعانىن ايتادى.
باستاپقىدا تۇرمىس قۇرماي ۋاقىتىمدى وتكىزىپ الدىم دەيدى. 33 جاسىندا العاش 4 كۇندىك تۇڭعىش قىزىن اسىراپ العان. كەيىننەن بالالاردىڭ سانى جىل سايىن كوبەيىپ, كوپبالالى انا اتانىپتى. ۇلكەن ءۇش قىزىن ۇزاتىپ, ەكى ۇلىن ۇيلەندىرگەن. ولاردان ءتورت نەمەرە ءسۇيىپ وتىر.
«تاۋەكەل دەپ وسى جولدى تاڭدادىم. قۇدايعا شۇكىر, باقىتتىمىن. ات باسىنداي التىن بەرسە دە, بالالارىمدى ەشكىمگە ايىرباستامايمىن, ەشكىمگە. ءبارىن بىردەي كورەمىن. بالالالارىمنىڭ ىشىندە ۇلتى باسقاسى دا بار. قازاعى بار, وزبەگى بار, ورىسى بار, كارىسى بار دەگەندەي. ءبارى قازىر قازاق, قازاقشا سويلەيدى», دەيدى كوپبالالى انا.
ءوزى دە كوپبالالى وتباسىندا وسكەن انا بالا باعىپ, تاربيەلەۋدىڭ وڭاي ەمەستىگىن جاسىرمايدى. قينالعان ساتتەرىمدى بالالارىما كورسەتپەۋگە تىرىسامىن دەيدى. باستاپقىدا اناسى كومەكتەسسە, قازىر ۇلكەندەرى كىشىلەرگە قامقورشى. ءبىرى ساباعىن وقىتسا, ەندى ءبىرى ءۇيدىڭ جۇمىسىنا قولقانات. ماسەلەن, ياروسلاۆ ەسىمدى ۇلىنىڭ ەسىمىن ەراسىل دەپ وزگەرتكەن. قازىر ول قازاق سىنىبىندا ءبىلىم الادى, قازاقشاعا سۋداي.
«باۋىرلارىمنىڭ كوپ بولعانى جاقسى ەكەن. اعام اقىل ايتادى. اپكەم دۇرىس جولدى كورسەتەدى. ىنىلەرىممەن وينايمىز, قارىنداستارىما كومەكتەسەمىن», دەيدى ەراسىل بەلياەۆ.
جاستايىنان كاسىپكەرلىكپەن اينالىسىپ, تاباندىلىق, قاجىرلىلىقپەن تابىسقا قول جەتكىزگەن انا پەرزەنتتەرىن دە ەڭبەككە باۋلىپ ءجۇر. ۇلدارىنا كولىك جوندەۋ مەن دانەكەرلەۋدىڭ قىر-سىرىن ۇيرەتەدى. ۇيدەگى قۇرىلىس جۇمىستارىن دا بىرلەسىپ ىستەي بەرەدى. ال قىزدارى دۇكەن مەن ءدامحانانىڭ جۇمىسىن جۇرگىزۋگە كومەكتەسەدى. اس ۇيدەگى جۇمىستاردى دا اتقارا بەرەدى. قولىنداعى كەلىنىنە قولعانات. وسىلايشا جالعىزباستى انا كوپ ۇلتتىڭ بالاسىن باۋىرىنا باسىپ, ۇلكەن اۋلەتكە اينالىپ وتىر. باستىسى, بالالار اناسىن تاپقانىنا, اناسى ۇل-قىزىنىڭ اماندىعىنا ريزا.