قازىر بيزنەستىڭ سان الۋان ءتۇرى بار. قاجەتتىلىكتەردىڭ كوبەيۋىنە قاراي قوعامدا ءتۇرلى سۇرانىس پايدا بولا باستايدى. سونى تامىرشىداي تاپ باسىپ, ۇسىنىسىن زاڭ مەن بيزنەس قاعيدالارىنا بەيىمدەگەندەر ءبىر-ءبىر بيزنەس يەسى بولىپ شىعا كەلمەك. سوڭعى بىرنەشە جىلدا پايدا بولىپ, كەڭىنەن تارالىپ كەلە جاتقان بيزنەس ءتۇرى – كلينينگتىك قىزمەت.
كلينينگتىك قىزمەت كورسەتۋ – جەكە ۇيلەر مەن كەڭسەلەردى تازالاۋ. ارينە, ونى ءوزىڭىز دە اتقارا الاسىز. الايدا جەكە تۇلعالار دا, زاڭدى تۇلعالار دا بۇل شارۋانى كوپ جاعدايدا كاسىبي مامانداردىڭ قولىنا تابىستاعاندى ءجون ساناي باستادى. ەندى عانا ءورىس الىپ كەلە جاتقان بيزنەس بولعاندىقتان, بۇل قىزمەتتىڭ دەڭگەيى قانداي, ەلىمىزدە قانشا كلينينگتىك كومپانيا بار, ولاردىڭ جىلدىق تابىسى مەن شىعىنى قانداي دەگەن سەكىلدى سۇراقتارعا جاۋاپ تابۋ قيىن. ينتەرنەتتەن ىزدەگەنىمىزدە اينالاسى ون شاقتى كومپانيانىڭ ءتىزىمى شىقتى. ءبىزدىڭ نازارىمىزعا ىلىنبەي قالعان تاعى بىرەر كومپانيا بولۋى ىقتيمال. قارابايىر ەسەپتەۋ تاسىلىنە سالىپ, بۇل قىزمەتتىڭ وڭىرلەردە دە ەپتەپ جولعا قويىلعانىن ەسكەرىپ, كۇللى قازاقستاندا 20-30 كومپانيا بار دەپ توپشىلاۋعا بولاتىن سياقتى.
Adal Works كومپانياسىنىڭ باسشىسى اسەت بەگاليەۆتىڭ ايتۋىنشا, وسىدان ءۇش جىل بۇرىن عانا ادامدار كوپقاباتتى تۇرعىن ۇيلەرگە كورسەتىلەتىن كلينينگ قىزمەتىن تۇسىنە بەرمەيتىن.
– 2020 جىلدان باستاپ ەلىمىزدە م ۇلىك يەلەرى بىرلەستىگى قۇرىلا باستاعان سوڭ, تۇرعىنداردىڭ از بولىگى بولسا دا تۇرعىن ءۇيدىڭ ىشكى جۇمىستارىنا ارالاسىپ, تۇسىنە باستاعان سياقتى. بۇل سالانىڭ باسقالاردان ايىرماشىلىعى, قىزمەت ءۇشىن تولەنەتىن اقى مەن قويىلاتىن تالاپتار ەكى ءتۇرلى. ماسەلەن, كىرەبەرىستەردى تازارتۋدىڭ جۇمىس كەستەسى دەگەن ۇعىم بار. كەستە بويىنشا اپتاسىنا 3 رەت ەدەن جۋ كەرەك دەلىك. الايدا كوپتەگەن ادامدار ەدەندەردىڭ كۇن سايىن جۋىلعانىن قالايدى. وسى ەرەكشەلىكتەردى, ازاماتتاردىڭ قالاۋىن ەسكەرە وتىرىپ, سالانىڭ دامۋىنا ۇلەس قوسۋ جولىندامىز, – دەيدى اسەت.
قازىر ونىڭ كومپانياسى نۇر-سۇلتان قالاسىنداعى 50-دەن استام كوپقاباتتى تۇرعىن ۇيگە قىزمەت كورسەتەدى. 200-دەن استام جۇمىسشى بار. ءوزىمىزدى تولىققاندى بيزنەس رەتىندە قالىپتاستىرا الدىق دەيدى.
پاندەميا بۇل سالاعا دا كەرى اسەرىن تيگىزدى. دەگەنمەن دە كوپقاباتتى تۇرعىن ۇيلەردى تازالاۋ مۇلدە توقتاماعان.
– پاندەميا كەزىندە كلينينگ سالالارىنىڭ ىشىندە ويىن-ساۋىق كەشەندەرى, وفيس, ساۋدا ۇيلەرى كلينينگ سالاسىنداعى جۇمىستار توقتاپ قالدى. ءبىزدىڭ سالامىز, ياعني كوپقاباتتى تۇرعىن ۇيگە قىزمەت كورسەتۋ جۇمىستارى توقتاعان جوق, كەرىسىنشە جۇمىس قىزا ءتۇستى. ارينە, ۇلكەن تاۋەكەل مەن شىعىندارعا دا تاپ بولدىق. مىسالى, قوعامدىق كولىكتەر توقتاعان سوڭ, جۇمىسشىلاردى وبەكتىلەرگە جەتكىزۋ ءۇشىن اۆتوبۋستاردى جالداۋعا فيرمامىز ءبىراز شىعىندالدى. جۇمىسشىلارىمىزدىڭ ىندەتتى جۇقتىرىپ الۋ قاۋپى جوعارىلاپ كەتتى, – دەيدى كومپانيا باسشىسى.
تاعى ءبىر ايتارلىق جاعداي, جەرگىلىكتى اتقارۋشى بيلىك پاندەميا كەزىندە كوپقاباتتى ۇيلەرگە قىزمەت كورسەتۋشىلەردى دالىزدەردى كۇندەلىكتى بىرنەشە مارتە دەزينفەكتسيالاۋ جۇمىستارىن جۇرگىزۋگە مىندەتتەگەن. بىراق بۇل مىندەت ولاردىڭ كەلىسىمشارتىندا قاراستىرىلماعان. الەۋمەتتىك جەلىدە دە قىزۋ تالقىعا تۇسكەنىنە قاراماستان, مەملەكەتتىك باسقارۋ ورگاندارىنان نەمەسە سول ۋاقىتتا قۇرىلعان جەدەل شتاب تاراپىنان ءبىزدىڭ قىزمەتكەرلەرگە ەشقانداي قوسىمشا اقى قاراستىرىلمادى دەيدى. ال دەزينفەكتسيالاۋ زاتتارىنىڭ نارىقتاعى قۇنى 5 ەسە قىمباتتاپ كەتكەن.
Mclean كومپانياسىنىڭ باسشىسى باعلان ەرمەكباەۆا دا سوڭعى ءۇش جىلدا كلينينگتىك قىزمەتتىڭ ەرەكشە قارقىن الا باستاعانىن ايتادى.
– سوڭعى ءۇش جىلمەن سالىستىرعاندا ەلدە كلينينگتىك قىزمەت كورسەتۋ قارقىنى جىلدام ءوسىپ جاتىر. پاندەمياعا قاراماستان, سۇرانىس دەڭگەيى دە ءوسۋىن توقتاتقان جوق. كليەنتتەر اراسىندا زاڭدى تۇلعالار دا بارشىلىق. قازىر ء«ابۋ-دابي پلازا» تۇرعىن ءۇي كەشەنىن تازالاپ جاتىرمىز. سوڭعى ۋاقىتتا «سالاماتتى استانا» ەمحاناسىمەن دە بىرگە جۇمىس ىستەپ كەلەمىز. «استانا وپەراعا» دا قارجىلىق ۇسىنىس جولداپ قويدىق. ولارمەن دە جۇمىس ىستەۋگە نيەتتىمىز, – دەيدى باعلان ەرمەكباەۆا.
ونىڭ سوزىنشە, قازىرگى قىزمەتكەرلەر سانى ورتا ەسەپپەن 15-20 ادام. ۇزاق مەرزىمگە اۋقىمدى تاپسىرىس العان كەزدە كەلىسىمشارت نەگىزىندە 30-40 ادامعا (جۇمىسشىلار) دەيىن قابىلدايدى.
– تولىققاندى بيزنەس رەتىندە قالىپتاستىق دەپ ايتۋ قيىن شىعار. بىراق قازىرگى ۋاقىتتا الدىمىزعا قويعان مىندەتتەردىڭ 50-60 پايىزىن ورىندادىق دەپ سەنىممەن ايتا الامىن. بۇل بيزنەستى دامىتۋ بويىنشا كوپتەگەن جوسپارىمىز بار, – دەيدى كومپانيا جەتەكشىسى.
پاندەميا قىسپاققا العان مەزەتتە سۇرانىستىڭ كۇرت تومەندەپ, تابىستىڭ ازايعانىن «موەم وكنا» كومپانياسىنىڭ باسشىسى ارتۋر گۋسەينوۆ تە ايتادى. «كلينينگ بيزنەسىن ەندى عانا قولعا الىپ, جاقىندا عانا قىمبات قۇرىلعىلار ساتىپ العان كومپانيالار ولاردى تەزىرەك ساتىپ, قارىزدارىن جابۋعا تىرىسىپ جاتىر. ال ءبىز نارىقتا 2009 جىلدان بەرى كەلە جاتقاندىقتان, سالانىڭ قىر-سىرىن ءبىرشاما مەڭگەردىك, نەسيەلەردەن قۇتىلدىق. بىلتىر تۇرعىنداردىڭ تولەم قابىلەتى تومەندەپ, ناتيجەسىندە ءبىزدىڭ اينالىم 80 پايىزعا قۇلدىراپ كەتتى. تەك مامىر ايىنىڭ ورتاسىنان باستاپ قانا ىسكە كىرىستىك», دەيدى.
سونداي-اق ۇزاق ۋاقىت بويى جۇمىس ىستەمەگەن ساۋدا ويىن-ساۋىق ورتالىقتارى ساپالى كلينينگتىك كومپانيالارعا ەمەس, باعاسى قولايلى كومپانيالارعا باسىمدىق بەرە باستاعان.
– جەكە تۇلعالار دا كلينەرلەر قىزمەتىن تۇتىنۋدى ازايتا باستادى. ۇلكەن ءۇيى بار تۇراقتى كليەنتتەرىمىزدىڭ ءوزى جوندەۋ, تازالاۋ جۇمىستارىن كۇزگە شەگەرىپ تاستادى. پاندەميا كەزىندە جۇمىس تاسىلدەرىمىزدى قايتا قاراستىردىق. ەندى ءبىزدىڭ قىزمەتتىڭ قۇنى بولمە سانىنا بايلانىستى بولماق. ماسەلەن, ءبىر بولمەلى پاتەردى تازالاۋ 5 مىڭ تەڭگەگە باعالانادى. بۇرىن ول 7-8 مىڭ تەڭگە شاماسىندا ەدى. باستان-اياق تازالاۋ جۇمىستارىن جۇرگىزۋ قۇنى وزگەرىسسىز قالدى – شارشى مەترىنە 490 تەڭگەدەن, – دەيدى گۋسەينوۆ.
كومپانيا باسشىلارى بيىل دا بولۋى مۇمكىن قاتاڭ كارانتين شەكتەۋلەرىنە قازىردەن دايىندالىپ, كوپ مولشەردە دەزينفەكتسيالاۋ زاتتارى مەن جەكە قورعانىس قۇرالدارىن ساتىپ العانىن, سونداي-اق ۆاكتسينالاۋ ماڭىزدىلىعىن جۇمىسشىلارىنا ءتۇسىندىرىپ جاتقاندارىن ايتتى.
اسەت بەگاليەۆ ءوز بيزنەسىمىزدى باعالاۋ تۋرالى ءالى ويلانىپ كورمەدىك, ەڭ باستى ماقساتىمىز – بەرىك بيزنەس قۇرۋ دەگەن ويىن جەتكىزدى.
– جىلدىق تاۋار اينالىمىمىز شامامەن 400 ملن تەڭگەنى قۇرايدى. رەنتابەلدىلىك 10-20 پايىز ارالىعىندا. دەگەنمەن ءبىز ءالى ءوسۋ ساتىسىندامىز جانە بارلىق بوس قاراجاتتى دامۋعا قايتا ينۆەستيتسيالاپ جاتىرمىز. قازىر كەز كەلگەن بيزنەس كۇشتى IT كومپونەنتىنە يە بولۋعا ۇمتىلۋ كەرەك. بۇل ماسەلەدە دە شەتتە قالماۋعا تىرىسامىز. بىراق تاپ قازىر IT ماسەلەسىن دامىتۋعا ارتىق قارجىمىز جوق, – دەيدى Adal Works كومپانياسىنىڭ باسشىسى.
2020 جىلى باستالعان كوروناداعدارىس وسى بيزنەستى قۇرۋشىلارعا قاي باعىتقا قاراي ويىسۋ كەرەگىن, ءوز ساياساتتارىن قالاي يكەمدەۋ كەرەگىن ءتۇسىندىرىپ بەرگەندەي. قاتاڭ لوكداۋندار بولماسا دا بيىل دا شەكتەۋلەر جالعاسىپ جاتىر. ءبىراز مەكەمە ونلاين قىزمەت كورسەتۋدە. سوعان ساي تابىس تا تومەن. ياعني جىل سوڭىنا دەيىن كورپوراتيۆتى كلينينگ نارىعى ءالى ءبىرشاما قۇلدىراۋى مۇمكىن. تيىسىنشە, وسىعان دەيىن تەك ويىن-ساۋىق ورتالىقتارى, ساۋدا ۇيلەرى, بانك بولىمشەلەرى جانە جوعارى وقۋ ورىندارىمەن جۇمىس ىستەپ كەلگەن كلينينگتىك كومپانيالار نارىقتان ىعىسۋى دا ىقتيمال. وسىلايشا, ءبىرشاما كومپانيانىڭ تابىستان قاعىلۋى وزگە ويىنشىلاردىڭ تىڭ ءادىس, وزگەشە تاسىلمەن نارىققا كىرۋىنە دە جول اشۋى عاجاپ ەمەس.