نۇر-سۇلتاندا قابانباي باتىر داڭعىلىندا ەسىل وزەنىنىڭ جاعالاۋىنداعى كوپىردىڭ استىندا كولەڭكەلى قالقالار, بالالار الاڭى, دەمالۋعا ارنالعان ايماق, قويىلىمدار/كونتسەرتتەر مەن شىعارماشىلىق ەكسپەريمەنتتەرگە ارنالعان يمپروۆيزاتسيالانعان ساحنا, تاماقتانۋ ورىندارى جانە ت.ب. اشۋ جوسپارلانىپ وتىر, دەپ حابارلايدى Egemen.kz قالا اكىمىنىڭ ءباسپاسوز قىزمەتىنە سىلتەمە جاساپ.
«قوعامدىق كەڭىستىكتەردى (ساياباقتار, سكۆەرلەر, بۋلۆارلار), اۋلا اۋماقتارىن اباتتاندىرۋ جۇمىستارىن ەلوردا اكىمى التاي كولگىنوۆتىڭ تاپسىرماسى بويىنشا جۇرگىزۋدەمىز. وتكەن جىلى ەلوردادا العاش رەت كوپىرلەر استىنداعى ورىندار اباتتاندىرىلدى. بۇل ورىندار جۇرتشىلىقتى بىردەن وزىنە باۋراپ الدى. مىنە, بيىل بۇل جوبامىزدى كەڭەيتۋ تۋرالى شەشىم قابىلداندى. ەندى تاعى ءبىر كوپىردىڭ استىندا سەرۋەندەۋگە ارنالعان ورىن اشىلادى. وسىلايشا, ءبىر كەزدەرى بوس جاتقان اۋماق تاعى ءبىر قوعامدىق ورىنعا اينالادى», دەدى نۇرلان ۇرانحاەۆ.
ەستەرىڭىزگە سالا كەتەيىك, وتكەن جىلى قالادا ەكى كوپىر استى كەڭىستىگى اشىلعان بولاتىن. ولاردىڭ ءبىرى – سارايشىق كوپىرىنىڭ استىندا. بۇل اۋماق ءتۇرلى سپورتقا ءبولىنىپ, كوشە ترەناجەرلەرى, اتكەنشەكتەر, workout ايماعى جانە ت.ب. ورناتىلدى.
ەكىنشىسى – ل.ن. گۋميلەۆ اتىنداعى ەۇۋ جانىنداعى كوپىردىڭ استىندا ورنالاسقان. وندا ستريتبول الاڭى, ۇستەل تەننيسىنە ارنالعان اۋماق جانە workout-ايماق ورنالاسقان. سونداي-اق جاستاردىڭ ءوتىنىشى بويىنشا سكەيت-ايماق اشىلدى.
جاڭا قوعامدىق كەڭىستىكتى اشۋدىڭ نەگىزگى يدەياسى – سپورتپەن اينالىسۋ ءۇشىن قولايلى اتموسفەرا قۇرۋ. باسىمدىق – بۇقارالىق سپورتتى دامىتۋ.
بۇل كوپىردىڭ استى تانىمال وتاندىق جانە شەتەلدىك سپورتشىلاردىڭ سۋرەتتەرىمەن بەزەندىرىلگەن. مىسالى, باسكەتبولشى ءالجان جارمۇحامەدوۆ, كاسىبي تەننيسشى زارينا دياس, قازاقستاندىق بوكسشى گەننادي گولوۆكين, باسكەتبولشىلار دجەيمس لەبرون, كوبي برايانت جانە ت.ب.
مەملەكەت باسشىسى ءوز جولداۋىندا بۇقارالىق سپورتقا, دەنە شىنىقتىرۋعا جانە بالالارعا باسىمدىق بەرۋ كەرەكتىگىن اتاپ ءوتتى. التاي كولگىنوۆتىڭ تاپسىرماسى بويىنشا «نۇر-سۇلتان – جايلى قالا» ماستەر-جوسپارىنىڭ تۇجىرىمداماسى اياسىندا اۋلالار مەن قوعامدىق كەڭىستىكتەر اباتتاندىرىلۋدا. مۇندا باسىمدىقتاردىڭ ءبىرى سەرۋەندەۋ جانە سپورتپەن شۇعىلدانۋعا بولىنەدى. ەلوردانىڭ بارلىق اۋداندارىندا جۇمىستار جۇرگىزىلۋدە.