نۇر-سۇلتاندا ءوتىپ جاتقان قازاقستان حالقى اسسامبلەياسىنىڭ XXIX سەسسياسىندا ەلباسى نۇرسۇلتان نازارباەۆ قازاق حالقىنىڭ مەملەكەت قالىپتاستىرۋداعى رولىنە باعا بەردى, دەپ حابارلايدى Egemen.kz.
«قازاقستان حالقى اسسامبلەياسىنىڭ بۇگىنگى سەسسياسىنىڭ ماڭىزى ەرەكشە. بيىل قازاقستان رەسپۋبليكاسىنىڭ تاۋەلسىزدىگىنىڭ 30 جىلدىعىن اتاپ وتەتىن جىل. 1991 جىلى ەلىمىز حالقى ءۇشىن جاڭا ءداۋىردىڭ باسى بولدى. ول بوستاندىق, اتا-بابامىزدىڭ تاريحي مەكەنىندە ەركىن ءومىر ءسۇرۋ, جاڭا مەملەكەت قۇرۋ. ونىڭ تاعدىرى ءۇشىن جاۋاپكەرشىلىك الۋ ۋاقىتى بولدى. ونىڭ ءبارى ءوزىمىز باسىمىزدان كەشىرىپ, كوزىمىزبەن كوردىك. ەندى, بيىل وسى 30 جىلدىقتى اتاپ وتەمىز.
30 جىل بۇرىن كوپۇلتتى, كوپكونفەسسيالى حالقىمىز ەلىمىزدە بىرلىكتە, بەيبىتشىلىك پەن كەلىسىمدە العا قادام باسۋ جونىندە تاعى ءبىر ماڭىزدى شەشىم قابىلدادى», دەدى ن.نازارباەۆ.
ەلباسى ءوز سوزىندە ۇلتتىق دامۋدىڭ ءبىز تاڭداعان ستراتەگيانىڭ دۇرىس ءارى ءتيىمدى بولعانىن جەتكىزدى. وسىلايشا, مەملەكەتتىڭ ىرگەتاسىن قالاۋعا وتە قولايلى جاعداي جاسالىپ, زاماناۋي قازاقستاننىڭ كەلبەتىن قالىپتاستىرۋعا مول رەسۋرسپەن قامتاماسىز ەتىلدى.
«مۇندا باستى كامەرتون – «بiز, ورتاق تاريحي تاعدىر بiرiكتiرگەن قازاقستان حالقى» دەپ اتا زاڭىمىزدىڭ پرەامبۋلاسى ەكەنى ءسوزسىز. بۇل سويلەمنىڭ ماعىناسى وتە ماڭىزدى. ويتكەنى كونستيتۋتسيانى جازۋ بارىسىندا بۇعان مەن ەرەكشە ءمان بەردىم.
نەگىزگى زاڭىمىز ۇلتىنا, سەنىمى مەن تىلىنە قاراماستان بۇكىل وتانداسىمىزدىڭ مۇددەسىنە ساي كەلەدى. اتا زاڭىمىزدىڭ 11 بابى مەملەكەتىمىزدىڭ بىرلىگىن, بەيبىتىشىلىك مەن كەلىسىمىن بەكىتەدى, قورعايدى, نىعايتادى. ەلىمىزدە تىلىنە, ۇلتىنا, دىنىنە قاراپ ديسكريميناتسيا جاساۋعا تىيىم سالىنعان.
وسى ورايدا, قازاق حالقى كوپۇلتتى قوعامنىڭ شوعىرلانۋدا ينتەگراتسيالىق پروتسەستىڭ ارقاۋىنا اينالدى. مۇنداي جاعداي بۇكىل الەمدە بار. ماسەلەن, امەريكادا مىڭداعان حالىق بار. بىراق ولاردىڭ ءبارىن اعىلشىن ءتىلى بىرىكتىرەدى», دەدى ەلباسى.
سەسسيا جۇمىسىنا مەملەكەت باسشىسى قاسىم-جومارت توقاەۆ قاتىسىپ وتىر.
ايتا كەتەيىك, سەسسيا جۇمىسىنا ونلاين فورماتتا 600-دەن استام ادام قاتىسادى دەپ جوسپارلانعان. ولاردىڭ قاتارىندا بارلىق وڭىرلەردەن كەلگەن اسسامبلەيا مۇشەلەرى, رەسپۋبليكالىق جانە وڭىرلىك ەتنومادەني بىرلەستىكتەردىڭ توراعالارى, پارلامەنت دەپۋتاتتارى, ورتالىق اتقارۋشى ورگانداردىڭ, ساياسي پارتيالاردىڭ, ءدىني بىرلەستىكتەردىڭ باسشىلارى, ۇەۇ, عىلىمي, شىعارماشىلىق زيالى قاۋىم جانە باق وكىلدەرى بار.