كورشىلەس مەملەكەتتەردىڭ پرەزيدەنتتەرى كوپ جوسپارلى قازاق-تۇرىكمەن ىنتىماقتاستىعىن دامىتۋ پەرسپەكتيۆالارى, ەكى ەل اراسىنداعى دوستىق قاتىناستار مەن ستراتەگيالىق سەرىكتەستىكتى نىعايتۋ جايىندا جان-جاقتى پىكىر الماستى, دەپ حابارلايدى Egemen.kz.
قاسىم-جومارت توقاەۆ باۋىرلاس ەكى ەل حالىقتارىنىڭ مۇددەسى ءۇشىن قازاقستان تۇرىكمەنستانمەن كوپجاقتى بايلانىستاردى ودان ءارى دامىتۋعا دايىن ەكەنىن مالىمدەدى.
گۋربانگۋلى بەردىمۇحامەدوۆتىڭ پىكىرىنشە, قازاقستان تۇرىكمەنستاننىڭ ورتالىق ازياداعى نەگىزگى سەرىكتەسى.
پرەزيدەنتتەر ءوزارا ساۋدا كولەمىن ارتتىرۋ, ونەركاسىپ, اۋىل شارۋاشىلىعى, ەنەرگەتيكا, كولىك جانە لوگيستيكا سالالارىنداعى جوبالاردى جۇزەگە اسىرۋ ماقساتىمەن قازاقستان مەن تۇرىكمەنستاننىڭ كۇش بىرىكتىرۋگە دايىن ەكەنىن راستادى.
تاراپتار ەكى ەل اراسىنداعى ىنتىماقتاستىققا قوسىمشا قارقىن بەرۋ ءۇشىن بيىل ۇكىمەتارالىق كوميسسيا وتىرىسىن وتكىزۋگە كەلىستى.
قازاقستان پرەزيدەنتى ورتاق كەلىسىم بولعان جاعدايدا, كەزەكتى ورتالىق ازيا ەلدەرى باسشىلارىنىڭ كونسۋلتاتيۆتىك كەزدەسۋىن تۇرىكمەنستان استاناسىندا وتكىزۋدى قولدايتىنىن جەتكىزدى. بۇدان بولەك قاسىم-جومارت توقاەۆ تۇرىكمەن ەلىنىڭ باسشىسىنا قازاقستاننىڭ تۇركىتىلدەس مەملەكەتتەردىڭ ىنتىماقتاستىعى كەڭەسىندە كوتەرگەن باستامالارىن قولداعانى, سونداي-اق, تۇرىكمەنستاننىڭ ازياداعى ءوزارا ىقپالداستىق جانە سەنىم شارالارى كەڭەسىنە باقىلاۋشى رەتىندە كىرگەنى ءۇشىن ريزاشىلىعىن ءبىلدىردى.
گۋربانگۋلى بەردىمۇحامەدوۆ قاسىم-جومارت توقاەۆتى ەكىجاقتى ىنتىماقتاستىقتىڭ وزەكتى ماسەلەلەرىن تالقىلاپ, ماڭىزدى كەلىسىمدەرگە قول قويۋ ءۇشىن تۇرىكمەنستانعا ساپارمەن كەلۋگە شاقىردى.
قازاقستان پرەزيدەنتى تۇرىكمەنستاندىق ارىپتەسىنە اكەسىنىڭ قايتىس بولۋىنا بايلانىستى كوڭىل ايتتى.