قازىرگى كەزدە جامبىل وبلىسىندا جولدار ءجىتى تەكسەرىلۋدە. بۇگىن وڭىرلىك كوممۋنيكاتسيالار قىزمەتىنىڭ الاڭىندا وبلىستىق پوليتسيا دەپارتامەنتى اكىمشىلىك پوليتسيا باسقارماسىنىڭ باستىعى مامبەت سمايلوۆ بريفينگ بەرىپ, ايماق اۆتوجولدارىن تەكسەرۋ بارىسىندا 2117 اقاۋلىق انىقتالعانىن جەتكىزدى.
بىلتىر بۇل كورسەتكىش 2842 بولعان. اقاۋلاردى اتاپ ايتار بولساق, رەسپۋبليكالىق ماڭىزى بار اۆتوجولداردا 59 كەمشىلىك, وبلىستىق ماڭىزى بار جولداردا 81, اۋداندىق اۆتوجولداردا 367 جانە دە ەلدى مەكەندەردىڭ كوشە-جول جەلىلەرىندە 1610 كەمشىلىك انىقتالىپتى.
«جىل باستالعالى ءۇش ايدا جول قوزعالىسى قاۋىپسىزدىگى ماقساتىندا وبلىس اۆتوجولدارىنا 493 تەكسەرىس جۇرگىزىلدى. سونىڭ ىشىندە تەكسەرىسپەن قامتىلعانى 3088 شاقىرىم. تەكسەرىس قورىتىندىسى بويىنشا جول ۇيىمدارىنىڭ باسشىلارىنا ورىنداۋ ءۇشىن 493 جازباشا وكىم بەرىلگەن. ولار بويىنشا 386 جاۋاپ الىنىپ, 85 وكىم بويىنشا مەرزىمدەرىنىڭ ۇزارتىلۋىنا جانە قاراجاتتىڭ بولماۋى تۋرالى جاۋاپ, 107 وكىم بويىنشا بەلگىلەنگەن ورىنداۋ مەرزىمدەرى بار. اۆتوكولىك جولدارىنا قىزمەت كورسەتۋدەگى كەمشىلىكتەر بويىنشا اۋداندىق جانە وبلىستىق اتقارۋ ورگاندارىنا 104 اقپارات جولداندى, ونىڭ ىشىندە 52 اقپارات جەرگىلىكتى ورگاندارعا جولداندى», دەدى, مامبەت سمايلوۆ.
سونىمەن قاتار اۆتوكولىك جولدارىنا قاناعاتتانارلىقسىز قىزمەت كورسەتكەنى جانە جول قوزعالىسى قاۋىپسىزدىگىن قامتاماسىز ەتپەگەنى ءۇشىن وبلىس بويىنشا 46 لاۋازىمدى تۇلعا اكىمشىلىك جاۋاپكەرشىلىككە تارتىلعان.
جامبىلدا جول ينفراقۇرىلىمىن جاقسارتۋ جانە ايماق اۋماعىنداعى اۆتوجولدارمەن قاۋىپسىز ءوتۋ ماڭىزدى. بۇل رەتتە حالىقارالىق ماڭىزى بار «الماتى-نۇر-سۇلتان-رەسەي فەدەراتسياسىنىڭ شەكاراسى» 209 شاقىرىم جانە رەسپۋبليكالىق ماڭىزى بار «مەركى-شۋ-بۋرىبايتال» 266 شاقىرىم اۆتوكولىك جولدارىن قايتا جاڭارتۋ جۇمىستارى جۇزەگە اسىرىلۋدا. سونداي-اق 2019-2020 جىلدارى ىسكە اسىرىلعان «جول كارتاسى» جول-كولىك وقيعالارى سانىنىڭ تومەندەۋىنە وڭ اسەرىن تيگىزگەن. ياعني, وتكەن جىلى جالپى جول-كولىك وقيعالارىنىڭ سانى 23 پايىزعا تومەندەپ, 1223-تەن 942-ءنى كورسەتكەن.