قازاق ۇلتتىق قىزدار پەداگوگيكالىق ۋنيۆەرسيتەتىنىڭ 3 كۋرس ستۋدەنتى ايزادا ءمۇپتىلدا اۋىر اتلەتيكادان ازيا چەمپيوناتىندا قولا جۇلدەگە يە بولدى. بۇل تۋرالى Egemen.kz وقۋ ورنىنىڭ ءباسپاسوز ورتالىعىنا سىلتەمە جاساپ حابارلايدى.
وزبەكستان استاناسى تاشكەنتتە جالاۋىن كوتەرگەن باسەكەگە قازاقستاننان 17 سپورتشى قاتىسىپ, باقتى مەن باپتارىن سىنادى.
17-25 ءساۋىر ارالىعىندا وتكەن سارى قۇرلىقتاعى بۇل جارىس توكيو وليمپياداسى الدىنداعى ىرىكتەۋ تۋرنيرلەردىڭ قاتارىنا جاتادى.
ايزادا ءمۇپتىلدا جارىسقا سايىستىڭ سوڭعى كۇنى شىقتى. 87 كەلىدەن جوعارى سالماق دارەجەسىندە ونەر كورسەتكەن وتانداسىمىز العاشقىدا 118 كەلى زىلتەمىردى كوتەرىپ, جوعارى ناتيجە كورسەتتى. سونداي-اق ول سەرپە كوتەرۋ سايىسىندا دا مىقتىلىعىن دالەلدەدى.
وسىلايشا ايزادا ءمۇپتىلدا جارىس جولىندا 269 كەلى كورسەتكىشپەن ازيا بىرىنشىلىگىنىڭ قولا مەدالىن جەڭىپ الدى.
كۇمىس مەدالدى وڭتۇستىككورەيالىق سپورتشى يەلەنسە, التىن مەدال قىتايلىق اۋىر اتلەتكە بۇيىردى.
جالپى ازيا چەمپيوناتىنىڭ قورىتىندىسى بويىنشا, قازاقستاندىق زىلتەمىرشىلەر 7 مەدال يەلەندى. ونىڭ بىرەۋى التىن, ۇشەۋى كۇمىس, تاعى ۇشەۋى قولا جۇلدە. جارىس جولىندا وتانداستارىمىز ەل نامىسىن 13 سالماق دارەجەسىندە قورعادى.
– قارسىلاستارىم وتە مىقتى بولدى. بارلىعى جاقسى دايىندالعان. ءۇشىنشى ورىن ءۇشىن ايقاستىڭ ءوزى تارتىستى بولدى. تەحنيكا جاعىنان ازداعان قاتەلىكتەر جىبەردىم. اللا جازسا, ونى جوندەيمىز دەگەن نيەت بار, – دەيدى ايزادا ءمۇپتىلدا.
ايتا كەتەيىك, ايزادا ءمۇپتىلدا قىزدار ۋنيۆەرسيتەتىنىڭ پەداگوگيكا جانە پسيحولوگيا جوعارى مەكتەبىندە «دەنە شىنىقتىرۋ جانە سپورت» ماماندىعىندا 3 كۋرستا ءبىلىم الادى.
سپورتشى بۇعان دەيىن دە اۋىر اتلەتيكادان ەل چەمپيوناتتارى مەن الەمدىك جارىستاردا جۇلدەگەر اتانىپ, وقۋ ورنىنىڭ مەرەيىن اسىرعان بولاتىن.