قاراعاندى وبلىسىنىڭ نۇرا اۋدانىندا سۋ تاسقىنى كەزىندە جوعالىپ كەتكەن كاسىپكەر نۇرلان سۇلەيمەنوۆتى ىزدەستىرۋ جۇمىستارى جالعاسىپ جاتىر. جاقىندا نۇرا وزەنىنەن سۇڭگۋىرلەر بەلگىسىز ايەلدىڭ ءمايىتىن تاپتى, دەپ حابارلايدى Egemen.kz
«ىزدەۋ شارالارى كەزىندە قالدىقتار تابىلدى. ولار پوليتسياعا تاپسىرىلدى», دەدى قاراعاندى وبلىسى تجد ءباسپاسوز قىزمەتىندەگىلەر.
قاراعاندى وبلىسىنىڭ پوليتسيا دەپارتامەنتىندەگىلەر دە ءمايىتتىڭ تابىلعانىن راستادى.
«ىزدەستىرۋ جۇمىستارى كەزىندە راسىمەن ايەل ادامنىڭ دەنەسى تابىلدى. قازىرگى تاڭدا بارلىق قاجەت ساراپتاما تاعايىندالدى. مارقۇمنىڭ كىم ەكەنىن انىقتاپ جاتىرمىز», دەپ حابارلادى قاراعاندى وبلىسى پد ءباسپاسوز وكىلى.
نۇرا اۋدانى تۇرعىندارىنىڭ سوزىنە سۇيەنسەك, مارقۇمنىڭ دەنەسى سۋدا ۇزاق جاتقان كورىنەدى.
بۇعان دەيىن حابار-وشارسىز كەتكەن شارۋا قوجالىعىنىڭ باسشىسى نۇرلان سۇلەيمەنوۆتىڭ تۋىستارى كۇتپەگەن مالىمدەمە جاساعان ەدى. ولار كاسىپكەردىڭ سۋعا باتىپ كەتكەنىنە كۇمانمەن قارايدى. جاقىندارى بەلگىسىز بىرەۋلەر كاسىپكەردى ۇرلاپ, قىلمىسىن جاسىرۋ ءۇشىن كولىكتى سۋعا باتىرعان دەپ سانايدى. سوندىقتان ونى سۋدان عانا ەمەس قۇرلىقتان دا ىزدەۋدى سۇراپ وتىر.