قازاقستاننىڭ يسلاندياداعى جاڭا كونسۋلى تانىستىرىلدى

كەزدەسۋگە قازاقستاننىڭ ۇلىبريتانياداعى ەلشىسى, سونداي-اق يسلانديا جانە يرلاندياداعى ەلشىسى قىزمەتىن قوسا اتقارۋشى ەرلان ىدىرىسوۆ, يسلانديا سىرتقى ىستەر مينيسترلىگى پروتوكول قىزمەتى باسشىسىنىڭ ورىنباسارى جانە ەكونوميكالىق ماسەلەلەر جونىندەگى ديرەكتورى پەتۋر تورستەنسسون, سونداي-اق «Arctic Green Energy» كومپانياسى توراعاسىنىڭ ورىنباسارى جانە اعا كەڭەسشىسى بولىپ تابىلاتىن جاڭا قازاقستاننىڭ يسلاندياداعى قۇرمەتتى كونسۋلى سيگۋردۋر اتلي يونسسون قاتىستى.

كەزدەسۋ بارىسىندا قازاقستان مەن يسلانديا اراسىنداعى ساۋدا-ەكونوميكالىق جانە ينۆەستيتسيالىق ىنتىماقتاستىقتى كەڭەيتۋ ماسەلەسى تالقىلاندى. اتاپ ايتقاندا جاڭارتىلاتىن ەنەرگيا كوزدەرى, تۋريزم جانە سپورت سالالارىنداعى ىنتىماقتاستىق بولاشاعى اڭگىمە وزەگىنە اينالدى. وسى تۇرعىدا يسلانديانىڭ وسى سالادا جيناقتاعان زور تاجىريبەسىن پايدالانا وتىرىپ, قازاقستاندا گەوتەرمالدىق ەنەرگيا كوزدەرىن دامىتۋ ءوزارا ءتيىمدى ىنتىماقتاستىقتىڭ الەۋەتتى جانە ءونىمدى باعىتى بولىپ تابىلاتىنى ەرەكشە اتاپ ءوتىلدى.

سونداي-اق قازاقستانداعى «Arctic Green Energy» يسلانديالىق كومپانياسىنىڭ گەوتەرمالدىق ەنەرگيا كوزدەرىن دامىتۋ سالاسىنداعى قىزمەتى تالقىلاندى. «Arctic Green Energy» كومپانياسى ەكولوگيالىق تازا جاڭارتىلاتىن ەنەرگيا كوزدەرىن دامىتۋداعى, سونىڭ ىشىندە قالانى ورتالىقتاندىرىلعان جىلۋمەن قامتاماسىز ەتۋ, ەلەكتر ەنەرگياسىن ءوندىرۋ جانە اۋىل شارۋاشىلىعىنىڭ قاجەتتىلىكتەرى ءۇشىن گەوتەرمالدىق ەنەرگيانى پايدالانۋداعى جەتىستىكتەرىمەن تانىمال.

يسلانديامەن وسى باعىتتاعى ىنتىماقتاستىق قازاقستاننىڭ گلازگوداعى كليماتتىڭ وزگەرۋى جونىندەگى بۇۇ-نىڭ الداعى جاھاندىق كونفەرەنتسياسىنا دايىندىعى شەڭبەرىندە, سونداي-اق تومەن كومىرتەكتى دامۋدىڭ 2050 جىلعا دەيىنگى ەلدىك تۇجىرىمداماسىن ازىرلەۋ كونتەكسىندە ماڭىزدى ءرول اتقارۋى مۇمكىن.

تاراپتار قازاقستاندا باسقا تەتىكتەردىڭ اراسىندا گەوتەرمالدىق رەسۋرستاردى پايدالانا وتىرىپ, تاريفتەردى رەتتەۋگە باعىتتالعان جىلۋمەن جابدىقتاۋ تۋرالى زاڭنىڭ ازىرلەنۋىن وڭ باعالادى. ونىڭ يسلانديالىق «Arctic Green Energy» كومپانياسىمەن ىنتىماقتاستىق ءۇشىن پايداسى زور. گەوتەرمالدىق ەنەرگيانى دامىتۋ جونىندەگى جوبالاردى ىسكە اسىرۋدىڭ تابىستى تاجىريبەسى رەتىندە «Arctic Green Energy» قىتايداعى قالالاردى جىلىتۋ جانە سالقىنداتۋ جونىندەگى «Sinopec» كومپانياسىمەن بىرگە جاسالعان جوبانى اتاپ ءوتتى. ونىڭ قۇنى 200 ملن. دوللاردان استام جانە قىتايدىڭ 2060 جىلعا قاراي كومىرتەگى بەيتاراپتىعىنا قول جەتكىزۋ جونىندەگى ارەكەتتەرىنىڭ قۇرامداس بولىگى بولىپ تابىلادى. تازا جانە تۇراقتى گەوتەرمالدىق ەنەرگيا قولدانىستاعى قازبا ەنەرگيا كوزدەرىن الماستىرادى, كومىرتەگى شىعارىندىلارىن ازايتادى جانە قىتايدىڭ ءىرى قالالارىنداعى اۋا ساپاسىن جاقسارتادى.

كەزدەسۋ سوڭىندا ە.ىدىرىسوۆ قاتىسۋشىلاردى اۋماعىندا ينۆەستورلار ءۇشىن تەڭدەسسىز جاعدايلار جاسالىپ, اعىلشىن قۇقىعى قاعيداتتارى قولدانىلاتىن «استانا» حالىقارالىق قارجى ورتالىعىنىڭ (احقو) قازىرگى جاعدايى مەن دامۋى تۋرالى حاباردار ەتتى. «Arctic Green Energy» كومپانياسىنا قازاقستانداعى «جاسىل» جوبالاردى دامىتۋعا باسا نازار اۋدارا وتىرىپ, احقو الاڭىندا ءوز وكىلدىگىن اشۋ ۇسىنىلدى.