2020 جىلى ءتورتىنشى توقسانىندا ورتا ەسەپپەن جان باسىنا شاققانداعى نومينالدى تابىس 125,4 مىڭ تەڭگەنى قۇراعان. بۇل 2019 جىلدىڭ سايكەس كەزەڭىمەن سالىستىرعاندا 12,9%-كە كوپ, دەپ جازادى Egemen.kz ranking.kz تاراتقان دەرەككە سىلتەمە جاساپ.
وڭىرلەر اراسىندا ورتا ەسەپپەن جان باسىنا شاققانداعى نومينالدى تابىس بىلتىر ءتورتىنشى توقساندا تۇركىستان وبلىسىندا 65,9 مىڭ تەڭگە بولسا, اتىراۋ وبلىسىندا 230,2 مىڭ تەڭگەگە دەيىن بولعان. دەگەنمەن, اتىراۋ وبلىسىندا حالىقتىڭ كىرىسى ناقتى ماندە 2%-عا تومەندەگەن, ال تۇركىستان وبلىسىندا, كەرىسىنشە, 7,4%-عا ارتتى.
جالپى, قازاقستان بويىنشا جان باسىنا شاققانداعى ەڭ تومەنگى نومينالدى اقشالاي تابىس تۇركىستان وبلىسىندا (65,9 مىڭ تەڭگە), شىمكەنت قالاسىندا (79,1 مىڭ تەڭگە), جامبىل وبلىسى (86,5 مىڭ تەڭگە), الماتى وبلىسى (90,7 مىڭ تەڭگە) جانە قىزىلوردا وبلىسىندا (91,2 مىڭ تەڭگە) تىركەلىپ وتىر.
ال جان باسىنا شاققانداعى ەڭ جوعارى نومينالدى تابىس اتىراۋ وبلىسىندا, نۇر-سۇلتان (192,9 مىڭ تەڭگە) مەن الماتى (185 مىڭ تەڭگە) قالالارىندا تىركەلدى.