كومپيۋتەر قازاقشا ءماتىندى دىبىستاي الادى. بۇل نازارباەۆ ۋنيۆەرسيتەتىنىڭ اقىلدى جۇيەلەر مەن جاساندى ينتەللەكت ينستيتۋتى (ISSAI) عالىمدارىنىڭ جاڭا جوباسىنىڭ ناتيجەسىندە جۇزەگە استى.
ولار قازاق تىلىندە ءسوز سينتەزدەۋ نەمەسە باسقاشا ايتقاندا, قازاق ءماتىنىن دىبىستىق سيگنالعا تۇرلەندىرۋ تەحنولوگياسىن جاسادى. سينتەز تەحنولوگياسى كومپيۋتەرگە كەز كەلگەن قازاقشا ءماتىندى ادام داۋىسىنا وتە ۇقساس داۋىسپەن وقىپ شىعۋعا مۇمكىندىك بەرەدى. ازىرلەۋشىلەردىڭ ايتۋىنشا, مۇنداي تەحنولوگيا قازاقستاندا بۇرىن بولماعان.
«قازاقستاندا بۇل تەحنولوگيا ەرەكشە قاجەتتىلىكتەرى بار ادامدار ءۇشىن, ۆيرتۋالدى كومەكشىلەردە جانە قازاقشا ءماتىندى دىبىستاۋ قاجەت بولاتىن قىزمەتتەر ءۇشىن پايدالانىلۋى مۇمكىن. مۇنداي تەحنولوگيا – كومپيۋتەردىڭ قازاق ءماتىنىن دىبىستاۋدى قاجەت ەتەتىن ينتەراكتيۆتى ۆيرتۋالدى اسسيستەنتتەر, ناۆيگاتسيالىق جۇيەلەر, حابارلاۋ جۇيەلەرى سياقتى كوپتەگەن قوسىمشالاردىڭ ماڭىزدى قۇرامداس بولىگى. جاڭا تەحنولوگيا كوزى ناشار كورەتىن ادامدار ءۇشىن دە پايدالى بولۋى مۇمكىن. بۇل قازاق ءماتىنىن اۋديوعا اينالدىرۋ ارقىلى ادام مەن روبوتتىڭ ءوزارا ءىس-قيمىلىن رەتتەۋگە مۇمكىندىك بەرەدى, – دەيدى ISSAI پوستدوكتورانتى ەربولات حاسانوۆ, – ءبىزدىڭ جوبامىزدىڭ باستى ماقساتىنىڭ ءبىرى – تسيفرلى تەحنولوگيالاردى قازاقشالاۋ. بۇعان دەيىن ءبىز قازاق تىلىندە وسىعان ۇقساس تەحنولوگيالاردى كەزدەستىرمەدىك».
عالىمدار بۇل تەحنولوگيانى قازاقشا دۇرىس ينتوناتسيا جانە قارقىنمەن ايەل جانە ەر داۋىسىنا سالىپ سويلەيتىن ەكى نۇسقاسىن جاسادى.
بۇكىل الەمدە بۇل تەحنولوگيا دەنساۋلىق ساقتاۋ, ەلەكتروندى وقىتۋ, داۋىستىق كومەكشىلەر سياقتى سالالاردا كەڭىنەن قولدانىلادى. عالىمدار جاڭا تەحنولوگيا تسيفرلى كەڭىستىكتە قازاق ءتىلىنىڭ قاتىسۋىن ارتتىرۋعا مۇمكىندىك بەرەتىنىنە سەنىمدى.
عالىمدار جينالعان مالىمەتتەر بازاسىن, الدىن الا دايىندالعان مودەلدەردى جانە جوبا كودىن اشىق تۇردە ۇسىنادى. وسىنىڭ كومەگىمەن كەز كەلگەن ۇيىمدار مەن كومپانيالار قازاقشا ءسوز سينتەزدەۋ جوبالارىن جاساي الادى.