بۇل جكو جۋىردا, كۇندىزگى ساعات 14:00 شاماسىندا قىزىلجار اۋدانىنىڭ اۋماعىندا بولعان. «پەتروپاۆل-جەزقازعان» اۆتوجولى بويىنداعى جاياۋ جۇرگىنشىلەر وتكەلىندە قىزىل ءتۇستى «Mercedes-Benz» 10 جاستاعى مەكتەپ وقۋشىسىن سوعىپ كەتىپ, وقيعا ورنىنان جاسىرىنعان.
بالاعا اۋداندىق ورتالىق اۋرۋحانادا كومەك كورسەتىلدى. مەديتسينا قىزمەتكەرلەرى وقيعا جايلى پوليتسەيلەرگە حابارلاعان. اپاتقا كىنالىنى انىقتاۋ بويىنشا جۇمىستار جۇرگىزىلدى. وعان بەينەباقىلاۋ كامەرالارىنىڭ كومەگى ءتيدى. كەلەسى كۇنى سقو پد جەرگىلىكتى پوليتسيا قىزمەتى قۇقىق بۇزۋشىنى ۇستادى. ول 34 جاستاعى اققايىڭ اۋدانىنىڭ تۇرعىنى بولىپ شىقتى. وعان قاتىستى اكىمشىلىك قۇقىق بۇزۋشىلىق تۋرالى كودەكسىنىڭ 611-بابى -«جۇرگىزۋشىنىڭ جول-كولىك وقيعاسىنا بايلانىستى مىندەتتەردى ورىنداماۋى» بويىنشا حاتتاما تولتىرىلدى. «جۇرگىزۋشى قورقىپ كەتكەنىن جانە بولعان جاعدايدان نە ىستەرىن بىلمەگەنىن ايتتى. ونىڭ جۇرگىزۋشى كۋالىگى الىنىپ, كولىگى ارنايى تۇراققا قويىلدى. سونىمەن قاتار, بالانىڭ العان جاراقاتتارىنىڭ اۋىرلىعىن انىقتاۋ ءۇشىن سوت-مەديتسينالىق ساراپتاماسى تاعايىندالدى. ساراپتاما ناتيجەلەرى بويىنشا پروتسەسسۋالدىق شەشىم قابىلدانادى», دەيدى سولتۇستىك قازاقستان وبلىسىنىڭ پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ ىزدەۋ توبىنىڭ اعا ينسپەكتورى, كاپيتان الەكسەي مورەۆ.