ەركىن كۇرەستەن قازاقستان كومانداسى ۇزدىكتەرىنىڭ ءبىرى نۇرقوجا قايپانوۆ ەكى دۇركىن ازيا چەمپيونى اتاندى دەپ حابارلايدى Egemen.kz Olympic.kz سايتىنا سىلتەمە جاساپ.
74 كەلىگە دەيىنگى سالماقتا بەلدەسكەن ول فينالدا يراندىق مۇستافا حوسەينحانيمەن كەزدەسىپ, 6:2 ەسەبىمەن جەڭىسكە جەتتى.
ءبىرىنشى كەزەڭدە 0:2 ەسەبىمەن ۇتىلىپ جاتقان قايپانوۆ ەكىنشى كەزەڭدە كۇشىنە ءمىنىپ, ءوزىنىڭ چەمپيوندىق اتاعىن قورعاپ قالدى.
ەسكە سالا كەتەيىك, نۇرقوجا قايپانوۆ 2019 جىلى قىتايدا وتكەن ازيا چەمپيوناتىندا دا توپ جارعان بولاتىن. بىلتىرعى ماۋسىمنان باستاپ نۇرقوجا وليمپيادالىق سالماققا اۋىستى.
بۇل قازاقستان كومانداسىنىڭ ازيا بىرىنشىلىگىندەگى ەكىنشى التىنى. كەشە ەركىن كۇرەس شەبەرى تالعات سىرباز 70 كەلىدە جەڭىسكە جەتكەن بولاتىن.