كورەيا رەسپۋبليكاسىنداعى قازاقستان ەلشىلىگى مەن قابىلداۋشى مەملەكەتتىڭ ەڭ ءىرى «Korea Post» پوشتا وپەراتورىنىڭ بىرلەسكەن جۇمىسىنىڭ ناتيجەسىندە تاۋەلسىزدىگىمىزدىڭ 30 جىلدىعىنا ارنالعان مەرەيتويلىق ماركالار جارىق كوردى, دەپ حابارلايدى Egemen.kz ەلشىلىكتىڭ ءباسپاسوز قىزمەتىنە سىلتەمە جاساپ.
ماركالاردىڭ ءبىر بولىگى سالتاناتتى تۇردە كورەيا رەسپۋبليكاسىنداعى جالعىز ماركا مۇراجايىنىڭ جيناعىنا تابىستالدى. مۇراجاي ديرەكتورى نا سانگ-كۋك اتاپ وتكەندەي, جاڭا ەكسپوناتتىڭ ارقاسىندا كوپتەگەن كەلۋشىلەر قازاقستان مادەنيەتىن ءبىلىپ, ونىمەن جاقىنىراق تانىسۋعا قىزىعۋلارى مۇمكىن.
وسى جىلدار ىشىندە مۇراجاي مادەنيەت, داستۇرلەر, ءىرى ۇلتتىق جانە حالىقارالىق ءىس-شارالاردى قامتيتىن ءار ءتۇرلى تاقىرىپتارعا ارنالعان كوپتەگەن كورمەلەر وتكىزدى.
مۇراجاي قورىنداعى ەڭ «جاسى ۇلكەن» بولىپ 1884 جىلى شىعارىلعان چوسون اۋلەتىنىڭ ماركاسى ەسەپتەلسە, ال ەڭ جاسى كىشىسى - قازاقستان تاۋەلسىزدىگىنىڭ 30 جىلدىعىنا ارنالعان ماركاسى.