شىعىس قازاقستان وبلىسىندا كارانتيندىك تالاپتار 3 مامىرعا دەيىن ۇزارتىلدى, دەپ حابارلايدى Egemen.kz
شقو باس مەملەكەتتىك سانيتارلىق دارىگەرىنىڭ جاڭا قاۋلىسى جاريالاندى. وندا جازىلعانداي, ءوڭىر بويىنشا كارانتين 3 مامىرعا دەيىن ۇزارتىلدى. شەكتەۋ شارالارىنىڭ مەرزىمى وبلىس اۋماعىندا COVID-19 ينفەكتسياسىنىڭ تارالۋى بويىنشا احۋالدىڭ وزگەرۋىنە سايكەس قايتا قارالۋى مۇمكىن. 65 جاستان اسقان ادامدارعا جانە حالىقتىڭ الەۋمەتتىك قورعالاتىن توپتارىنا ءبىرىنشى كەزەكتە قاجەتتى تاۋارلاردى, ازىق-ت ۇلىك پەن دارىلىك زاتتاردى جەتكىزۋمەن ەرىكتىلەر اينالىسادى.
مەملەكەتتىك ورگاندار مەن ۇيىمداردا ازاماتتاردى جەكە قابىلداۋدى, قىزمەتكەرلەردىڭ قاتىسۋىمەن كەڭەستەر مەن سەمينارلاردى وتكىزۋدى ازايتۋ قاجەت.
«سەمەي قالاسى, اباي, بورودۋليحا, شەمونايحا, ءۇرجار, زايسان اۋداندارىنىڭ اكىمدەرى, شقو دەنساۋلىق ساقتاۋ باسقارماسى, شقو مەملەكەتتىك كىرىستەر جانە پوليتسيا دەپارتامەنتتەرى, قالالار مەن اۋدانداردىڭ سانيتارلىق-ەپيدەميلوگيالىق باقىلاۋ باسقارمالارى ءوڭىردىڭ سىرتقى شەكارالارىنا كىرىپ-شىعۋدى باقىلاۋ ءۇشىن الماتى وبلىسى تاراپىنا قويىلاتىن 2 جانە قاراعاندى وبلىسىنىڭ تۇسىنداعى 1 سانيتارلىق بەكەتتىڭ جۇمىسىن قامتاماسىز ەتۋى ءتيىس. «قىزىل» ايماقتاعى وڭىردەن كەلەتىن ادامدا سانيتارلىق بەكەتتەردى كەسىپ وتكەن كەزدە COVID-19 ينفەكتسياسىنىڭ جوقتىعىن راستايتىن پتر سىنامانىڭ تەرىس ناتيجەسى تۋرالى ءۇش تاۋلىكتەن اسپايتىن انىقتامانىڭ بولۋى مىندەتتى», دەلىنگەن قۇجاتتا.
سونداي-اق الەۋمەتتىك قاشىقتى جانە ماسكا رەجيمىن ساقتاعان جاعدايدا كوشەدە, ساياباقتا, الاڭدار مەن جاعالاۋدا سەرۋەندەۋىنە رۇقسات بەرىلگەن.