اۋىل شارۋاشىلىعى مينيسترلىگى اقپارات قۇرالدارىندا جاريالانعان نان باعاسىن تۇراقتاندىرۋعا بايلانىستى ۇكىمەت رەزەرۆىنەن 2,6 ملرد تەڭگە ءبولىندى دەگەن مالىمەتتى جوققا شىعاردى. وسىعان بايلانىستى جاۋاپتى ۆەدومستۆو تۇسىنىكتەمە بەردى.
«مۇنداي جوبانى مينيسترلىكتىڭ ازىرلەگەنى راس جانە قازىر تالقىلاۋ پروتسەدۋراسىنان وتۋدە. ياعني جوبا قابىلدانعان جوق. ازىرگە كەڭىنەن تالقىلاۋ ءۇشىن عانا ۇسىنىلدى», دەلىنگەن ۆەدومستۆو تاراتقان اقپاراتتا.
بۇل جوبا بيىل 11 ناۋرىزدا ۇكىمەت وتىرىسىندا ماقۇلدانىپ, الەۋمەتتىك ماڭىزى بار ازىق-ت ۇلىك تاۋارلارىنىڭ باعاسىن تۇراقتاندىرۋ جونىندەگى جول كارتاسىن ىسكە اسىرۋ ماقساتىندا ازىرلەنىپتى.
«استىق تاپشىلىعى تۋرالى ماسەلە جوق. جوعارىدا ايتىلعانداي, 2020 جىلعى ءونىم ەلدى استىقپەن تولىق قامتاماسىز ەتۋگە جانە بەلگىلى ءبىر بولىگىن ەكسپورتقا شىعارۋعا دا جەتەدى.
تاعى ءبىر ماسەلە – استىق باعاسى. ءداستۇرلى تۇردە استىقتىڭ ىشكى نارىقتاعى قۇنى ەكسپورتتىق باعالارعا بايلانىستى قالىپتاسادى. قازىر ەكسپورتتىق نارىقتاردا استىققا دەگەن سۇرانىس ارتىپ وتىر. بۇقارالىق اقپارات قۇرالدارى بۇل جونىندە دۇرىس جازعان», دەدى ۆەدومستۆو وكىلدەرى.
بيىلعى استىقتى جيناۋ ناۋقانىنا دەيىن ءالى بەس اي بارىن ەسكەرسەك, قازىر ىشكى نارىقتاعى استىقتىڭ باعاسى تۇراقتى. دەسە دە ماماندار الداعى ۋاقىتتا سىرتقى جانە ىشكى نارىقتا باعانىڭ وسەتىنىن جوققا شىعارمايدى.
«قازاقستان وسىنداي جاعدايلارعا دايىن بولۋى كەرەك جانە «الەۋمەتتىك نان» باعاسىن تۇراقتاندىرۋ شارالارىن وسى باستان قولعا الۋى ءتيىس. ۇن باعاسى كوتەرىلگەن جاعدايدا ناۋبايحانالارعا الەۋمەتتىك ماڭىزى بار ونىمدەردىڭ باعاسىن ۇستاپ تۇرۋ قيىن بولاتىنىن ءتۇسىنۋ كەرەك. ول ءۇشىن تاسىمالداۋ شىعىندارىن وتەۋ سەكىلدى شارالار قاجەت.
بۇل جەردە استىق وسىرەتىن وبلىستاردان شالعاي وڭىرلەر جايلى ءسوز بولىپ وتىر. مىسالى, الماتى, جامبىل جانە تۇركىستان وبلىستارىندا بيداي وسىرىلگەنمەن, ونىڭ ۇنى نان پىسىرۋگە كەلە بەرمەيدى. سوندىقتان وسى وڭىرلەردەگى جەكە وندىرىستەر حالىقتىڭ نانعا دەگەن قاجەتتىلىگىن قامتاماسىز ەتە المايدى», دەپ حابارلادى مينيسترلىك.
سونداي-اق اۋىل شارۋاشىلىعى مينيسترلىگى نورماتيۆتىك قۇقىقتىق اكتىلەردى كەلىسۋ جانە قابىلداۋ پروتسەدۋرالارىنا ەداۋىر ۋاقىت كەتەتىنىن, تەك «اشىق نورماتيۆتىك قۇقىقتىق اكت» پورتالىندا تالقىلاۋ كەم دەگەندە 11 كۇنتىزبەلىك كۇن ىشىندە وتكىزىلۋى ءتيىس ەكەنىن جەتكىزدى.