قازاقستان تاۋەلسىزدىگىنىڭ 30 جىلدىعىن مەرەكەلەۋ اياسىندا رەسەي ۇلتتىق كىتاپحاناسىندا جامبىل جاباەۆتىڭ 175 جىلدىعىنا ارنالعان كىتاپ كورمەسىنىڭ اشىلۋ سالتاناتى ءوتتى, دەپ حابارلايدى Egemen.kz ءسىم ءباسپاسوز قىزمەتىنە سىلتەمە جاساپ.
كورمە قازاقستاننىڭ سانكت-پەتەربۋرگ قالاسىنداعى باس كونسۋلدىعى مەن جەرگىلىكتى «اتا-مەكەن» قازاق دياسپوراسى بىرلەستىگىنىڭ ورتاق باستاماسىمەن ۇيىمداستىرىلدى.
ءىس-شاراعا رەسەي ۇلتتىق كىتاپحاناسىنىڭ باسشىلىعى, سانكت-پەتەربۋرگ قالاسىندا تۇراتىن قازاق جانە باسقا دياسپورالاردىڭ وكىلدەرى, سونداي-اق سانكت-پەتەربۋرگ قالاسىنىڭ تۇرعىندارى مەن قوناقتارى قاتىستى.
كورمەگە الەمنىڭ بىرنەشە تىلىندە جارىق كورگەن جامبىلدىڭ شىعارماشىلىعىنا بايلانىستى 100-دەن استام ءتۇرلى ەكسپوناتتار قويىلدى.
كىتاپحانا باسشىلىعى اتالعان ءىس-شارانىڭ ەكى ەل اراسىنداعى گۋمانيتارلىق ىنتىماقتاستىقتى كەڭەيتۋ مەن نىعايتۋ ءۇشىن ماڭىزدىلىعىن اتاپ ءوتتى. قاتىسۋشىلاردىڭ پىكىرىنشە, بۇل شارا سانكت-پەتەربۋرگ اۋديتورياسىن قازاقستان حالقىنىڭ مادەني مۇراسى مەن رۋحاني بايلىعىمەن تانىستىرۋعا جاقسى مۇمكىندىك ۇسىندى.