ءىىم ريددەردەگى 2 جاسار بالانىڭ ولىمىنە بايلانىستى حالىققا ۇندەۋ جاسادى, دەپ حابارلايدى Egemen.kz Polisia.kz-كە سىلتەمە جاساپ.
9 ءساۋىر كۇنى كەشكە شىعىس قازاقستان وبلىسى ريددەر قالاسىنىڭ پوليتسياسىنا كوپ بالالى انا جۇگىنىپ, اعالارىمەن بىرگە ءۇيدىڭ سىرتىنا ويناۋعا شىعىپ كەتكەن 3 جاسقا دا تولماعان ۇلىن ەكى ساعاتتان بەرى كورشىلەرىمەن بىرگە ىزدەپ, تابا الماي جاتقاندىعىن جەتكىزگەن.
انىقتالعانداي, بالالار اناسىمەن بىرگە كوشەگە شىققان. اناسى كورشى ۇيدە قوناقتا بولىپ, بالالارىن تەرەزەدەن باقىلاپ وتىرعان. ءبىراز ۋاقىتتان كەيىن دالاعا شىققان كەزدە, بالاسىن تابا الماي قالعان. باسقا بالالار دا ونىڭ قاشان جانە قايدا كەتكەنىن بايقاماعان. ىشكى ىستەر ورگاندارى بىردەن بالالار ويناپ جۇرگەن تۇرعىن ءۇي ماڭىن, كوشەلەر مەن ۇيلەردى تەكسەردى.
ماڭايداعى ون كوشەدە 50-دەن استام ءۇي قارالدى. 3-ءشى كوشەدەن كەيىنگى دۇكەندەردە ورنالاسقان كامەرالار تەكسەرىلدى, الايدا جازبالاردان ەشتەڭە تابىلعان جوق. ىزدەستىرۋ ءتۇنى بويى جالعاستى, وعان 80-نەن استام پوليتسيا قىزمەتكەرى جانە ۇلتتىق ۇلاننىڭ 50 اسكەري قىزمەتشىسى, قۇتقارۋشىلار, تجد 3 كينولوگيالىق قىزمەتى جانە 135 ەرىكتى قاتىستى.
وكىنىشكە قاراي, جاڭبىر جاۋىپ تۇرعاندىقتان قىزمەتتىك يتتەر ىزدەردى تابا المادى. تاڭەرتەڭگى توعىز جارىمدا عانا وبلىستىڭ كريمينالدىق پوليتسيا قىزمەتكەرلەرى بىسترۋحا وزەنىنىڭ بويىن تەكسەرۋ كەزىندە, بالا جوعالىپ كەتكەن ۇيدەن شامامەن 800 مەتر قاشىقتىقتا, وزەننىڭ بويىندا جاتقان اعاشتىڭ جانىنان بالانىڭ ءمايىتىن تاپتى. ىشكى ىستەر مينيسترلىگى مارقۇمنىڭ وتباسىنا قايعىرىپ كوڭىل ايتادى, سونداي-اق, بالانى ىزدەۋگە قاتىسقان ەرىكتىلەر مەن قولداۋشىلارعا العىس بىلدىرەدى.
– ەلدەگى سۋ تاسقىنى جاعدايىن ەسكەرە وتىرىپ, كوشەلەردە جۇرگەن بالالارعا اباي بولۋدى, كىشكەنتاي بالالار مەن كامەلەتكە تولماعان بالالاردى سۋ قويمالارىنىڭ جانىندا جالعىز قالدىرماۋدى سۇرايمىز, – دەدى ۆەدومستۆو قىزمەتكەرلەرى.