ۇلىبريتانيا پاتشايىمى II ەليزاۆەتانىڭ كۇيەۋى, گەرتسوگ, ەدينبۋرگ حانزاداسى فيليپپ 99 جاسىندا ومىردەن ءوتتى, دەپ حابارلايدى Egemen.kz
بۇگىن بۋكينگەم سارايى ءمالىم ەتكەندەي, ەگەر فيليپپ حانزادا ءتىرى بولعاندا ەكى ايدان كەيىن, ياعني 10 ماۋسىم كۇنى 100 جاسقا تولۋشى ەدى.
«مارتەبەلى پاتشايىم قاتتى قايعىرىپ, ءوزىنىڭ سۇيىكتى جارى, ەدينبۋرگ گەرتسوگى, كورولدىكتىڭ مارتەبەلى حانزاداسى ءفيليپپتىڭ قايتىس بولعانىن حابارلايدى. مارتەبەلى حانزادا بۇگىن تاڭەرتەڭ ۆيندزور قامالىندا جان ءتاسىلىم ەتتى» دەلىنگەن سارايدىڭ حابارلاماسىندا.
ەسكە سالا كەتەيىك, 2017 جىلى گەرتسوگتىڭ دەنساۋلىعى ناشارلاپ, قوعامدىق شارالارعا قاتىسۋدى توقتاتقان ەدى.
بيىل قاڭتار ايىندا II ەليزاۆەتا كۇيەۋىمەن بىرگە كوروناۆيرۋسقا قارسى ەكپە سالدىردى. دەگەنمەن, 17 اقپاندا حانزادا دەنساۋلىعىنا بايلانىستى اۋرۋحاناعا جەتكىزىلدى. باق كوزدەرى ونىڭ كوروناۆيرۋس ينفەكتسياسىنان ەمەس, دەنساۋلىعىنان باسقا دا كىناراتتار تابىلعانىن جارىسا جازدى. ناۋرىز ايىندا ونىڭ جۇرەگىنە كۇردەلى وتا جاسالىپ, ءساتتى اياقتالعان-دى. وتادان كەيىن ونى قايتادان قالپىنا كەلتىرۋ ءۇشىن كورول ەدۆارد VII اۋرۋحاناسىنا ورنالاستىردى.
ايتا كەتەيىك, حانزادانىڭ قازاسىنا بايلانىستى ازا تۇتۋ كۇنى ونى جەرلەگەنگە دەيىن جالعاسادى. ال جەرلەۋ ءراسىمىنىڭ قاشان وتەتىنى ازىرگە بەلگىسىز.