وتكەن تاۋلىكتە وبلىس بويىنشا تاعى 116 ادامنان كوروناۆيرۋس ينفەكتسياسى انىقتالدى. بۇگىنگە دەيىن بارلىعى 6236 جاعداي تىركەلسە, ونىڭ 77 پايىزدان استامى جازىلدى, دەپ حابارلايدى Egemen.kz
«قازىر 562 ادام ينفەكتسيالىق ستاتسيونارلاردا ەم الىپ جاتىر. ونىڭ 395-ءى اقتوبە قالاسىندا. 35 ناۋقاس جانساقتاۋ بولىمىندە. تورتەۋى وكپەنى جاساندى جەلدەتۋ اپپاراتىنا قوسىلعان. ۆيرۋستان ساقتانۋدىڭ ەڭ ءتيىمدى جولى – ۆاكتسينا. قازىرگى كەزدە 10 مىڭنان استام ادام ەكپە قابىلداپ ۇلگەردى. تاعى 20 مىڭ دوزا جەتكىزىلدى. تۇرعىندار مەكەن جايى بويىنشا ەمحاناعا كەلىپ, ۆاكتسينا قابىلداي الادى», دەدى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى بەكبولات ءىزباساروۆ.
قازىرگى كەزدە ءۇي كارانتينىنە جىبەرىلگەندەر سانى ارتىپ بارادى. 3300-دەن استام ادام ەكى اپتا بويى دارىگەرلەر باقىلاۋىندا بولۋى ءتيىس.
«مونيتورينگ توپتاردان جانە جەرگىلىكتى پوليتسيا قىزمەتىنەن تۇسكەن ماتەريالدارعا سايكەس 176 ايىپپۇل سالىندى. ايىپپۇل كولەمى – 24,5 ميلليون تەڭگە. ۇيلەستىرۋ ورتالىعىنان تۇسكەن حابارلاما نەگىزىندە تاعى 21 تەكسەرۋ جۇرگىلىزىپ, 2 ميلليون تەڭگەدەن استام ايىپپۇل سالىندى. «قىزىل» ايماقتاعى ءوڭىر تۇرعىندارىن سانيتاريالىق تالاپتى ساقتاۋعا شاقىرامىز. رامازان ايىندا مۇسىلماندارعا ءبىر اي بويى ورازا ۇستاۋ پارىز ەتىلگەن. دەگەنمەن توپتالىپ, اۋىزاشارعا بارۋعا نەمەسە ۇيىنە سىرتتان ادام شاقىرۋعا بولمايتىنىن ەسكەرتەمىز. اركىم ءوز شاڭىراعىندا, وتباسى مۇشەلەرىمەن بىرگە بولعانى دۇرىس. سونداي-اق, ىندەتكە بايلانىستى بيىل مەشىتتەردە تاراۋيح نامازى وقىلمايدى», دەدى وبلىستىق سانيتاريالىق-ەپيدەميالىق باقىلاۋ دەپارتامەنتىنىڭ باسشىسى نۇرسۇلۋ بەركىمباەۆا.