ەڭبەك – ەمشى ءى توپتاعى مۇگەدەك يۆان ستراكۋلەنكو ۇستاناتىن قاعيدا وسى

جاسى وتىزعا ەندى ىلىككەن يۆان پاۆلوۆيچ بالكاشين اۋىلىنىڭ تۋماسى. جىگەرلى جىگىتتى مۇنداعى ەلدىڭ ءبارى تانيدى. قولاربادا قادالىپ وتىراتىن, ارنايى سۇيەنىش قۇرالىنسىز قادام باسا المايتىن مۇمكىندىگى شەكتەۋلى جان بولسا دا الدەكىمنىڭ ەسىركەگەنىن جانى جاقتىرا بەرمەيدى.

بۇل نەگە بىرەۋلەر ايايتىنداي, كەمباعال كورەتىندەي مىسكىن بولۋعا ءتيىس. جاراتقان يە ماڭدايىنا وسىلاي جازعان ەكەن, پەشەنەسىنە بۇيىرعانىن ءوزى كورەدى دە. تەك جىگەر جاسىماۋى كەرەك. يۆاننىڭ اعىنان اقتارىلعان سوزىنەن ۇققانىمىز وسى. تىربانىپ تىرشىلىك ەتۋ ءۇشىن قولىنان كەلەتىن كاسىپتى يگەرۋگە تىرىسقان. وسىدان ءۇش جىل بۇرىن كومپيۋتەر جوندەيتىن تسەح اشىپتى.

قۇرقىلتايدىڭ ۇياسىنداي جىپ-جىلى, كىشكەنتاي عانا بولمە. تو­ڭى­رەگىندە الدەبىر شەبەر­حا­نا­لار­داعىداي اتكوپىر بولىپ شاشىلىپ جاتقان باسى ارتىق زات تا جوق. قاي تاراپقا قاراساڭ دا جيناقى قول­دىڭ تابى مەنمۇندالاپ ايقىن كورىنىپ تۇر. كەزەگىن كۇتىپ جاتقان سمارتفوندار مەن كومپيۋتەرلەر دە از ەمەس. سوعان قاراعاندا, قولى ەپتى يۆان ءپاۆلوۆيچتىڭ قىزمەتى حالىقتىڭ كادەسىنە جاراپ-اق تۇر دەۋگە بولار.

– ورتا مەكتەپتى ويداعىداي اياقتاعان سوڭ ەلورداداعى كاسىپتىك ءبىلىم بەرەتىن كوللەدجەردىڭ بى­رىندە تەحنيك-باعدارلاماشى ما­ماندىعىن يگەردىم, – دەيدى شەبەر­دىڭ ءوزى, – قازىرگى زاماندا سۇرانىسقا يە ماماندىق قوي. ءبىلىمدى قا­شىق­تان وقىپ مەڭگەرسەم دە, تاجىريبەمەن ۇشتاستىرعانىم ۇتىم­دى بولدى. ونىڭ ۇستىنە قازىر ۇي­رە­نەمىن دەگەن ادامعا ەش نارسەنىڭ قيىندىعى جوق قوي. بارلىعى ينتەرنەت الەمىندە سايراپ تۇر. كوڭىلىڭ قالاعاندى تاۋىپ الاسىڭ دا, قىر-سىرىن جادىڭا جاتتايسىڭ. تەك بويىڭدا ىنتاڭ مەن ىقىلاسىڭ بولسا جەتىپ جاتىر.

قولىنا ارمانداعان ديپلومى تيگەن سوڭ اۋدان ورتالىعىنداعى «قازاقتەلەكوم» اق فيليالىندا مەملەكەتتىك باعدارلاما بويىنشا التى اي تاجىريبەدەن وتكەن. كەيىن ءارتۇرلى سالادا قىزمەت ەتىپتى. ايتسە دە, دەنساۋلىعىنداعى كىناراتى شامالى بوگەت بولعان. جۇمىس بەرۋشىنىڭ قاسى مەن قاباعىنا قاراۋ, تىلىمەن ايتپاسا دا تۇرىندە تۇرعان كەيىستى كورۋ وڭاي ەمەس ەكەن. تاۋەكەلگە بەل بۋىپ ءوز ءىسىن باستاۋعا جەتەلەگەن دە وسى جاي. تەك اقپاراتتىق تەحنولوگيا كۇن سايىن قارقىندى دامۋعا يە بولىپ جاتقان جاڭا زاماننىڭ جوسىعىنا ساي بولا ءبىلۋ كەرەك. بۇل تاراپتا كەيىپكەرىمىزدىڭ بويىندا ەرەكشە ەڭبەكقورلىقتىڭ, ايرىقشا ىزدەنىمپازدىقتىڭ بار ەكەندىگىن اڭعارىپ, تاس جارعانداي تالابىنا ءتانتى بولدىق. ءىسىنىڭ العا باسۋى دا وسى ءبىر قاسيەتتەردىڭ مولدىعىنان.

– مەملەكەت تاراپىنان جاپ-جاقسى كومەك كورسەتىلىپ جاتىر, دەيدى ول, – ۇمتىلعان ادامعا بۇدان ارتىق نە كەرەك. ماسەلەن, وسى ۋاقىتقا دەيىن ەكى ۇتىمدى جوبا جاساپ, ەكى گرانتقا يە بولدىم. العاشقى جولى 250 مىڭ تەڭگە قاراجات بولىنسە, وتكەن جىلى 2,5 ملن تەڭگە كولەمىندە قايتارىمسىز گرانتقا قولىم جەتتى. وسى قارجىعا كۇندەلىكتى كاسىبىمە قا­جەتتى ءارتۇرلى قۇرالدار مەن كوم­پيۋتەرلىك باع­دار­لامالار الىپ, كوپ-كورىم العا باستىم. بۇرىن تاپتىرماي جۇرگەن دۇنيەلەر قولىما تيگەن سوڭ شارۋام دا وڭعارىلا باستادى. ازداپ قاراجات جيناعان سوڭ ورتالىقتان جالعا ورىن الۋدىڭ مۇمكىندىگى تۋدى. شىنىن ايتايىن, كاسىپ يگەرمەي بوس جۇرگەن ون ەكى مۇشەسى ساۋ جاستاردى كورگەندە تاڭعالاتىنىم راس. ءوزىم قازىر ءبىر بيىككە شىقتىم, الدەنەگە قولىم جەتتى دەگەندىكتەن ەمەس, ادامعا ماسىل بولۋدىڭ وتە ۇيات ەكەندىگىن ۇقپايتىندارىنا ناليمىن.

الدىنان جۇمىس ۇركىپ وتىراتىن يۆان پاۆلوۆيچ قازىر اۋدان ورتا­لىعىنداعى بىرنەشە مەكە­مە­­لەر­مەن كەلىسىمشارت تا جاساپ قو­يىپتى. كەلىسىم بويىنشا كوم­پيۋتەرلەرىنىڭ جۇمىس ىستەۋىن با­قىلاپ, ۋاقتىلى تەكسەرىپ, قا­جەتتى قىزمەتىن كورسەتەدى ەكەن. اۋىل-ايماقتان دەمەپ كەلىپ جات­قان­­دار دا از ەمەس. وزىنە لايىق ما­مان­دىقتىڭ جىلىگىن شاعىپ, ما­يىن ىشكەن مامان كومپيۋتەرلەردى, تەلەديدارلاردى, سمارتفوندار مەن پلانشەتتەردى جوندەپ, ينتەرنەتكە قوسىلۋ ماسەلەسىن شەشۋگە كومەكتەسەدى. تاپسىرىس ءتۇسىپ جاتسا, ارقيلى اقپاراتتىق باع­دار­لامالاردى يگەرۋگە جار­دەم­دەسىپ, درايۆەرلەر مەن مەكەمە ىشىندەگى جەلىلەردى دە ورناتىپ بەرەدى. كۇندەلىكتى ورىن الىپ جاتاتىن ارقيلى تەحنيكالىق اقاۋلاردى دا جوندەۋگە قابىلەتتى.

ومىردەن ءوز ورنىن تاپقان وسى ءبىر جانمەن ءاتۇستى اڭگىمە-دۇكەن قۇر­عاندا, تولايىم تۇگەل بولماسا دا, ءبىراز جايعا قانىقتىق. جىگىتتى جاق­سىلىققا جەتەكتەگەن جىگەر ەكەن. قاشاندا ازاماتقا جىگەرلى بولعان جاراسادى ەمەس پە؟!

اقمولا وبلىسى,

ساندىقتاۋ اۋدانى