سولتۇستىك قازاقستان وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, 7 ءساۋىر كۇنى ساعات 18:15 شاماسىندا پەتروپاۆل قالاسىنىڭ پوليتسەيلەرى جامبىل كوشەسىندەگى ۇيلەردىڭ ءبىرىنىڭ پودەزىندە بويجەتكەنگە شابۋىل جاسادى دەگەن كۇدىكپەن ەر ادامدى ۇستادى, دەپ حابارلايدى Egemen.kz
«قازىرگى ۋاقىتتا ۇستالعان ەر ادام پەتروپاۆل قالالىق پوليتسيا باسقارماسىنا جەتكىزىلدى. تەرگەۋ امالدارى جۇرگىزىلىپ جاتىر. بۇل ءىس تولىق, جان-جاقتى, بارلىق جاعدايلار ەسكەرىلە وتىرا وبەكتيۆتى تەرگەلەدى, ناتيجەسى بويىنشا پروتسەسسۋالدىق شەشىم قابىلدانادى», دەلىنگەن حابارلامادا.
ەستەرىڭىزگە سالايىق, 5 اقپان كۇنى ساعات 20.00 شاماسىندا پەتروپاۆلداعى كوپ قاباتتى ۇيلەردىڭ ءبىرىنىڭ پودەزىندە 19 جاستاعى بويجەتكەنگە بەلگىسىز ەر ادام شابۋىل جاساعان ەدى. ول قىزدىڭ تاماعىنا پىشاق تاقاپ, ءزابىر كورسەتپەكشى بولعان. ايعايدى ەستىگەن كورشى بويجەتكەندى قۇتقارعانمەن, ەر ادام قاشىپ كەتكەن ەدى.