سقو پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى ءبىرىنشى توقساندا اتقارىلعان جۇمىستارعا قورىتىندى جاسادى, دەپ حابارلايدى Egemen.kz
باسقارما ءوز جۇمىسىندا سينتەتيكالىق ەسىرتكىلەرگە قارسى كۇرەسكە باسا نازار اۋدارادى. ەسىرتكى ساۋداسىنىڭ جاڭا تۇرلەرىنە قارسى ءىس-قيمىل – باسىمدى جۇمىس باعىتتارىنىڭ ءبىرى. جىل باسىنان بەرى وبلىستا زاڭسىز ەسىرتكى اينالىمىنا كۇدىكتى دەلىنگەن 29 ادام ۇستالدى. ونىڭ 7-ەۋى سينتەتيكالىق ەسىرتكىلەردىڭ ءوندىرىسىن ۇيىمداستىرعانى ءۇشىن, 3-ەۋى تىيىم سالىنعان زاتتاردى ساتاتىن ينتەرنەت-دۇكەندەردىڭ قىزمەتىن ۇيىمداستىرعانى ءۇشىن قۇرىقتالدى. بۇدان بولەك, 2 ادام ەسىرتكىنى جاسىرىن ورىنعا سالىپ كەتكەنى ءۇشىن قىلمىستىق جاۋاپكەرشىلىككە تارتىلدى. ماسەلەن, اقپان ايىنىڭ ورتاسىندا جەدەل-ىزدەستىرۋ ءىس-شارالارى ناتيجەسىندە اسا ءىرى كولەمدەگى زاڭسىز ەسىرتكى اينالىمىنا كۇدىكتى اقمولا وبلىسىنىڭ 19 جاستاعى تۇرعىنى ۇستالدى. جىگىتتىڭ كورسەتۋى بويىنشا جاسىرعان 30 ورىننان كريستالل تارىزدەس زاتپەن جالپى سالماعى 41,49 گر پوليمەرلىك تۇيىنشەكتەر الىندى. سونداي-اق, تۇرعىلىقتى جەرىنەن 23 تۇيىنشەكتە 82,15 گر ۇقساس زات تاركىلەندى.
جالپى, ءۇش ايدىڭ ىشىندە سقو ەسىرتكىگە قارسى كۇرەسكەرلەرى زاڭسىز اينالىمنان 25,5 كەلى ءتۇرلى ەسىرتكى تاركىلەدى, ونىڭ 1 كەلىدەن استامى سينتەتيكالىق ەسىرتكى.