قاراعاندى وبلىستىق بەينەلەۋ ونەرى مۇراجايىندا فوتوسۋرەتشى دميتري رۋگيستىڭ «قاسيەتتى ۇلىتاۋ» اتتى فوتوكورمەسى ۇيىمداستىرىلدى. كەلۋشىلەر نازارىنا اۆتوردىڭ « ۇلىتاۋ» ۇلتتىق تاريحي-مادەني جانە تابيعي قورىق-مۇراجايىندا بىرنەشە جىل قاتارىنان تۇسىرىلگەن تۋىندىلارى ۇسىنىلدى.
دميتري رۋگيس ۇلىتاۋدى اتى اڭىزعا اينالعان ولكە عانا ەمەس, تابيعاتى تاڭعاجايىپ اتىراپ دەپ تە ەسەپتەيدى.
– بۇل ايماقتىڭ تابيعاتى ارالۋاندىعىمەن تاڭداي قاقتىرادى. سولتۇستىگىندەگى كولدەردە قوقيقاز ۇيا سالادى. وڭتۇستىگىندە – بەتپاقدالا قۇمدارى. سولتۇستىك-باتىسىندا تاڭعاجايىپ اقجار بورلى تاۋلارى, وزەننىڭ تەرەڭ ارنالارى بار. ورتا تۇسىندا تاۋلار تىزبەگى ورىن تەپكەن. بۇل دالانىڭ ايگىلى تاۋلارىنىڭ ءبىرى اۋليەتاۋ الەمگە تانىمال ارارات, كايلاس, كيليماندجارو سياقتى الىپتارمەن تەڭەسە الادى, – دەيدى ول.
دميتري رۋگيستى ۇلىتاۋمەن بەلگىلى فوتوگراف ەربولات شادراحوۆ تانىستىرعان ەكەن. وسى جەردە ول جەرگىلىكتى مۇراجاي-قورىقتىڭ ديرەكتورى باقتيار قوجاحمەتوۆپەن كەزدەسىپ, ەكەۋىنىڭ اراسىندا ىنتىماقتاستىق قارىم-قاتىناس ورناعان.
اتالعان قورىقتا مۇراجاي فوتوگرافى بولىپ قىزمەت ەتە ءجۇرىپ ول National Geographic Qazaqstan, «ۆەتەر سترانستۆي» جانە «ۆوكرۋگ سۆەتا» گازەت-جۋرنالدارىنا ارناپ ماقالالار جازا باستاعان. Nomad Explorer كومپانياسىنىڭ باسشىسى مارعۇلان سەيسەمبايمەن تانىسىپ, بۇكىل قازاقستان بويىنشا ۇيىمداستىرىلعان ەكسپەديتسيالارعا قاتىستى.
قازىرگى تاڭدا دميتري رۋگيس وتە تابىستى فوتوسۋرەتشى. ونىڭ فوتوسۋرەتتەرى «جەزكيىك», «وڭتۇستىكتىڭ اڭىزدارى», «پامير تراكتىسى» فوتوالبومدارىن شىعارۋعا نەگىز بولعان. بۇگىندە بۇل ەڭبەكتەرگە دەگەن سۇرانىس وتە جوعارى. جاقىندا شەبەردىڭ «كيەلى ۇلىتاۋ» فوتوجازباسى باسپادان شىقتى.
فوتوسۋرەتشىنىڭ ۇلىتاۋدى مەكەن ەتكەن ادامدارعا دەگەن قۇرمەتى زور. ولاردىڭ قوناقجايلىعىن, ءتىپتى كۇندەلىكتى كيىمدەرىندەگى قازاقى ويۋ-ورنەكتەرىنىڭ ەرەكشەلىكتەرىنە دەيىن اۋزىنان تاستاماي ايتىپ وتىرادى.
– ءدال وسى ءۇشىن تۋريستەر بۇل ايماققا كەلەدى. ولارعا سونشالىقتى جايلىلىقتىڭ قاجەتى دە جوق. ساياحاتشىلار ءبىزدىڭ زامانىمىزعا جەتكەن ەجەلگى داستۇرلەر مەن قولونەردى كورگىسى كەلەدى. ۇلتتىق ناقىشتى سەزىنىپ, تاريح پەن تاماشا سۇلۋ تابيعاتتىڭ تىلسىمىنا شومۋدى قالايدى. جالپى ۇلىتاۋدىڭ بولاشاعى زور, – دەيدى فوتوسۋرەتشى.
الداعى ۋاقىتتا دميتري رۋگيس ەلىمىزدىڭ بىرەگەي جانە تاريحي ماڭىزى بار جەرلەرىنىڭ فوتوسۋرەتتەر مۇراعاتىن جيناعىسى كەلەدى. ءوزى ءالى بولىپ كورمەگەن جوڭعار الاتاۋىنا بارۋدى ارماندايدى.
دميتري رۋگيستىڭ فوتوگرافيا ونەرىمەن اينالىسقانىنا ون جىلداي بولعان. بۇگىندە ول بەلگىسىز اۋەسقوي فوتوگرافتان National Geographic Qazaqstan جۋرنالى مەن Nomad Explorer ساياحاتشىلار بىرلەستىگىنىڭ تانىمال بەينوگرافى, ولكەتانۋشىسى جانە فوتوسۋرەتشىسىنە اينالدى. قازىر ول TEFA Eurasiaphoto شىعارماشىلىق بىرلەستىگىن باسقارادى جانە قازاق گەوگرافيالىق قوعامىنىڭ بەلسەندى مۇشەسى.
قاراعاندى