ادامداردىڭ اۋىزبىرلىگى, ءبىر-بىرىنە دەگەن ىزگىلىك شاراپاتى جامان تۇماۋ جايلاعان ۋاقىتتا ءتىپتى نىعايا ءتۇستى. جاندى قامقورلىق قولتىقتارىنان دەمەپ, تۇمشالاعان قاۋىپتەن امان-ەسەن شىعاتىندىقتارىنا, ەش ۋاقىتتا قيىندىقپەن جالعىز الىسپايتىندارىنا سەنگەننەن سوڭ ءۇمىت وتى دا لاۋلاي بەردى.
ەل ىشىندە عيبراتى مەن ونەگەسى مول, پايداسى دا از ەمەس ەرىكتىلەر قوزعالىسى جاندانعان 2020 جىلى ساندىقتاۋ اۋدانىندا دا ىزگى نيەتتى ادامدار شوقتاي ەكشەلىپ, قولدان كەلەتىن بار مۇمكىندىكتەرىمەن جەرلەستەرىنىڭ قاجەتىنە جاراپ-اق قالدى. جاقسىلىقتىڭ باستاۋ بۇلاعى 14 اۋىلدىق وكرۋگتە بىردەن ۇيىمداستىرىلعان «قايىرىمدى ىستەر» مارافونى شەڭبەرىندە ارنا اشىپ ەدى.
بىلتىر جاقسىلىق جاۋعان جىل بولدى. اۋدانداعى جاستار ءىسى ۇيىمى ماماندارىنىڭ جەتەكشىلىك ەتۋىمەن ءار ەلدى مەكەندە ەت جاقىن اعايىنى عانا ەمەس, اۋىلداسىنا قول ۇشىن بەرۋگە دايىن تۇراتىن بىرلەسە توپتاسقان, ءبىر ماقسات, ءبىر مۇددەنىڭ توڭىرەگىندە كۇش-قۋاتىن بىرىكتىرگەن جالىندى جاستار شوعىرى پايدا بولدى. ىزگى نيەتتى جاس تولقىن الدىمەن تىل ەڭبەككەرلەرىنە, قولى قىسقا قاريالارعا, الەۋمەتتىك جاعىنان از قامتاماسىز ەتىلگەندەرگە, مۇمكىندىگى شەكتەۋلى ادامدارعا كومەكتەستى. دەمەۋشىلەردىڭ دەم بەرۋىمەن ازىرلەنگەن ازىق-ت ۇلىك سەبەتتەرىن, جامان تۇماۋدان قورعاناتىن مەديتسينالىق ساقتاندىرۋ قۇرالدارىن, ءدارى-دارمەكتەر جەتكىزىپ بەردى.
جاقسىلىقتىڭ جالاۋى تىكتەلگەن, بارشا جۇرتتى ادامگەرشىلىك شۋاعى سەبەزگىلەيتىن قايىرىمدىلىق وزەگىنە توپتاستىرعان الۋان ءتۇرلى اكتسيالار, فورۋمدار, ەكولوگيالىق سەنبىلىكتەر وتكىزىلە باستادى. اۋداننىڭ ەرىكتىلەرى ەڭ الدىمەن جامان تۇماۋدىڭ زارداپتارىمەن كۇرەسۋگە جۇمىلدىرىلدى. بەيمالىم دەرتتىڭ الدىن الۋعا باعىتتالعان, ساقتاندىرۋ شارالارى جازىلعان ۇنپاراقتار تاراتتى. ۇيلەرىنەن قارعا ادىم جەر ۇزاپ شىعا المايتىن, ەمحانادا سوزىلمالى سىرقاتتارىنا بايلانىستى تىركەلگەن قاريالاردىڭ ءدارى-دارمەگىن اپارىپ بەردى. ەشكىم نازاردان تىس قالماۋى ءۇشىن اۋدان اۋماعىن قامتىپ, بىرنەشە مارتە رەيدتەر جۇرگىزدى. جان جادىراتار پاراسات پەن اسقاق ادامگەرشىلىككە كومكەرىلگەن 800 شارا وتكىزىلگەن ەكەن. الاقانداي اۋدان ءۇشىن از دۇنيە ەمەس. وتكەن جىلدىڭ ونەگەلى ىستەرى تۇيىندەلگەن فورۋم بارىسىندا جاستاردىڭ اتقارعان جان جادىراتار شارۋاسى ەكشەلىپ, وزگەلەرگە ونەگە بولىپ ءورىلىپ, ۇلگى بولىپ ايشىقتالىپ, الداعى جىلى اتقارىلۋعا ءتيىستى اۋقىمدى جوسپار بەكىتىلىپتى.
– ەل جاستارىنىڭ وسى ءبىر تىرشىلىگى قاشاندا كوڭىل دەمدەيدى, – دەدى اۋدان اقساقالى مارات ىدىرىسوۆ, – اتام قازاق «اشتىقتا جەگەن قۇيقانىڭ ءدامى اۋزىڭنان كەتپەيدى» دەيدى ەمەس پە؟ ارينە, اشىعىپ جاتقان ەشكىم جوق, تەك بىرلىك ماعىناسىنان ايتىپ جاتقانىم عوي. وسىنداي ونەگەلى جاستار, كىسىگە كومەك بەرۋگە دايىن تۇراتىن ءىزباسارلارى بار ەلدىڭ ىرگەسى ەشقاشان سوگىلمەيدى.
ەرىكتىلەردى دە ەلەپ وتىرعان دۇرىس. قيىن ساتتە قول ۇشىن بەرگەن جاستاردىڭ ەڭبەگى ەسكەرىلمەي قالعان جوق. اۋدان اكىمدىگى جاقسىلىق جاساۋدان جارىسىپ, ايرىقشا كوزگە تۇسكەن جاستاردى, بەلسەندى ۇجىمداردى ماقتاۋ قاعازدارىمەن ماراپاتتاعان. ۇلاعاتتى ىستەرگە ۇمتىلىپ وتىرعاندارىن وزگەگە ونەگە ەتىپ كورسەتكەن. بۇل ورايدا ساندىقتاۋ جانە لەسنوي اۋىلدىق وكرۋگتەرى ءبىرىنشى ورىنعا يە بولسا, ماكسيموۆكا, كامەنكا اۋىلدىق وكرۋگتەرى ەكىنشى ورىندى ەنشىلەپتى. اۋىزبىرلىگى مىقتى جامبىل, بىرلىك اۋىلدىق وكرۋگتەرىنىڭ ەرىكتىلەرى ءۇشىنشى ورىندا. ال نوۆونيكولسك اۋىلدىق وكرۋگىنىڭ جاستارى جىل ىشىندە اتقارعان جان-جاقتى جۇمىستارى ءۇشىن باس بايگەگە لايىق دەپ تانىلعان.
– ەل جاعدايىن ۇدايى قاداعالاپ وتىرساق تا, وسىنداي ۋاقىتتا ەرىكتىلەردىڭ بەلسەنىپ شىعىپ, كومەك كورسەتكەندىگى وتە جاراسىمدى, – دەيدى اۋدان اكىمى ەربول جۇسىپبەكوۆ. – جاستاردىڭ بويىندا ەلجاندى جاقسى قاسيەتتىڭ مول ەكەندىگىن كورگەندە, ەلدىڭ ەرتەڭگە دەگەن سەنىمى دە نىعايا تۇسەتىنى بار.
قازىرگى كۇنى تەپسە تەمىر ۇزەتىن جاستار قول قۋسىرىپ قاراپ وتىرعان جوق. كوكتەمنىڭ ەڭ قاۋىپتى ماسەلەسى – قارعىن سۋ. اۋىل جاستارى ەل ىشىندەگى جالعىزىلىكتى جانداردىڭ اۋلالارىن, ەلدى مەكەننىڭ جولدارىن قاردان تازالاۋدا. توپىراق ءسال جىپسىگەننەن كەيىن قىزىل سۋ جۇرەتىن ارىق قازباق. وتكەن جىلدارى قىزىل سۋ اۋداننىڭ بىرنەشە ەلدى مەكەنىن باسىپ قالعان بولاتىن. سول ءبىر اششى ساباقتى جاقسى بىلەتىن ەل جاستارى قازىر كوكتەمگى سىناقتان بىرلەسىپ وتۋگە جۇمىلدىرىلۋدا.
ال ادامعا جاقسىلىق جاساۋدى پارىزىم دەپ سانايتىن, بىراق سول ءبىر ىزگى شارۋاسىن جارنامالاپ كوپ ايتا بەرمەيتىن جاستار بيىل العاشقى توقساندا-اق جۇزگە جۋىق قايىرىمدىلىق شاراسىن وتكىزىپ ۇلگەردى. ونىڭ ىشىندە جاڭا جىلدىڭ العاشقى كۇندەرى سەرپىن العان «30 قايىرىمدىلىق ءىس» اكتسياسى بويىنشا ەلدەستەرىنىڭ كوكەيىندە جۇرگەن كۇردەلى ماسەلەنىڭ شەشىمىن تابۋعا ۇمتىلعان. كومەككە ءزارۋ قارت ادامداردىڭ قولقاناتىنا اينالىپ, العىس ارقالاعان. ەل ىشىندە شارۋا تاۋسىلعان با, ءبىرىن تىڭعىلىقتى اياقتاسا, ەكىنشىسى ساباقتاسادى. بىراق ەت جۇرەكتەرى ەلىم دەپ سوققان جاستار قاربالاسقان تىرشىلىكتىڭ ءتىنىن بەكىتۋگە جاراپ-اق تۇر.
اقمولا وبلىسى,
ساندىقتاۋ اۋدانى