سەناتتا ەلىمىزدە ينكليۋزيۆتى قوعام قۇرۋ باعىتىندا اتقارىلىپ جاتقان جۇمىس بارىسى تالقىلاندى. پالاتا سپيكەرى ماۋلەن اشىمباەۆتىڭ توراعالىعىمەن وتكەن كەزدەسۋدە ەرەكشە قاجەتتىلىگى بار ازاماتتاردىڭ قۇقىقتارىن قورعاۋ ماسەلەسى دە كەڭىنەن ءسوز بولدى. ءىس-شاراعا سەناتورلار, ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ, سونداي-اق, وسى باعىتتا جۇمىس ىستەپ جۇرگەن ۇيىمداردىڭ وكىلدەرى قاتىستى.
ماۋلەن اشىمباەۆ مەملەكەت باسشىسى اقپان ايىندا وتكەن ۇلتتىق قوعامدىق سەنىم كەڭەسىنىڭ وتىرىسىندا ينكليۋزيۆتى قوعام قۇرۋدىڭ جانە مۇمكىندىگى شەكتەۋلى ازاماتتارعا قولايلى ورتا قالىپتاستىرۋدىڭ ماڭىزىنا توقتالعانىن تىلگە تيەك ەتتى. سەنات توراعاسى ەرەكشە قاجەتتىلىگى بار جاندارعا قولداۋ كورسەتۋ قوعامنىڭ دامۋ جانە وركەندەۋ دەڭگەيىنىڭ ماڭىزدى كورسەتكىشتەرىنىڭ ءبىرى ەكەنىن ايتتى. بۇل باعىتتا ەلىمىزدە كەشەندى جۇمىستار قولعا الىنعانىمەن, شەشىمىن تاپپاعان تۇيتكىلدەر دە بار ەكەنى بەلگىلى.
«مەملەكەت تاراپىنان قابىلدانعان شارالارعا قاراماستان, ەرەكشە قاجەتتىلىگى بار ازاماتتاردى الەۋمەتتىك قورعاۋدىڭ ءتيىمدى جۇيەسىن قۇرۋ ءالى دە بولسا وزەكتى. وعان ءتۇرلى ۇكىمەتتىك ەمەس ۇيىمداردان كەلىپ تۇسەتىن وتىنىشتەر دالەل. سوندىقتان ءبىز بۇگىنگى كەزدەسۋگە بارلىق مۇددەلى تۇلعالاردى: سەناتورلاردى, مەملەكەتتىك ورگانداردىڭ جانە وسى باعىتتاعى ۇيىمداردىڭ باسشىلارىن ارنايى شاقىردىق. ءبىز وزەكتى ماسەلەلەردى بىرلەسىپ تالقىلاپ, بۇل سالاداعى زاڭنامالاردى جەتىلدىرۋ جونىندە الداعى باعىت-باعداردى ايقىنداپ الۋىمىز كەرەك», دەدى ماۋلەن اشىمباەۆ.
وسى باعىتتاعى جۇيەلى قادامداردىڭ ءبىرى جەكەلەگەن ساناتتاعى ازاماتتاردى الەۋمەتتىك قورعاۋ ماسەلەلەسى تۋرالى زاڭ قابىلداۋ ەكەنى ءسوزسىز. سوعان سايكەس پارلامەنت دەپۋتاتتارىنىڭ قاراۋىنا ءتيىستى قۇجات ەنگىزىلگەنىن ايتا كەتكەن ءجون. اتالعان زاڭ جوباسى ەرەكشە قاجەتتىلىگى بار جانداردى قورعاۋدى جانە قولداۋدى كوزدەيدى.
ستاتيستيكاعا سۇيەنسەك, بۇگىندە قازاقستاندا مۇمكىندىگى شەكتەۋلى 695 مىڭنان استام ادام بار ەكەن. ونىڭ 60 پايىزى (419,8 مىڭ) ەڭبەككە قابىلەتتى جاستا. سەنات سپيكەرى قوعامداعى الەۋمەتتىك كوزقاراس مۇمكىندىگى شەكتەۋلى ازاماتتار ءۇشىن ءوز الەۋەتىن تولىق كورسەتۋگە قيىندىق تۋعىزاتىن كەدەرگىلەردىڭ ءبىرى بولىپ قالىپ وتىرعانىنا نازار اۋداردى.
ء«بىز ەرەكشە قاجەتتىلىگى بار ازاماتتارعا قاتىستى قوعامدىق سانانىڭ تۇبەگەيلى جاڭارۋىنا ىقپال ەتەتىن, قالىپتاسقان ستەرەوتيپتەردى جانە كەمسىتۋلەردى تولىق جوياتىن شارالاردى زاڭنامالىق تۇرعىدان بەكىتىپ, قابىلداۋىمىز كەرەك», دەدى ماۋلەن اشىمباەۆ.
سونداي-اق, سەنات توراعاسى مۇمكىندىگى شەكتەۋلى ازاماتتاردىڭ قۇقىقتارىن قورعاۋعا قاتىستى جۇمىستار الداعى ۋاقىتتا دا جالعاسا بەرەتىنىن, وعان بارلىق مۇددەلى تاراپتاردىڭ وكىلدەرى جۇمىلدىرىلاتىنىن اتاپ ءوتتى.
ودان بولەك, بۇگىنگى كەزدەسۋدە ايتىلعان بارلىق ۇسىنىستار زاڭ جوباسىن جەتىلدىرۋ جانە شەشىم قابىلداۋ بارىسىندا ەسكەرىلەتىنىن دە ايتتى.