ايەل ادام ۇلىن وقىتۋعا دەپوزيتكە اقشا جيناعان. الايدا كيبەرالاياقتاردىڭ قۇرىعىنا ءتۇسىپ قالىپ, ءبىر كۇندە بار جيعانىنان ايىرىلىپ قالدى, دەپ حابارلايدى Egemen.kz
وعان «قاۋىپسىزدىك قىزمەتىنىڭ قىزمەتكەرىمىن» جانە بانكتىڭ «مەنەدجەرىمىن» دەپ تانىستىرعان بەلگىسىز ەر ادام مەن قىز حابارلاسقان. ولار 7 مينۋت بۇرىن ونىڭ اتىنا بوتەن ادامنىڭ ءىرى كولەمدە نەسيە رەسىمدەلگەنىن ايتىپ, سەندىرگەن جانە «الاياقتاردىڭ ارەكەتتەرىنەن قورعانۋ ءۇشىن» وعان «ەسەپشوتتى جاڭارتۋ» قاجەتتىگىن, ياعني دەپوزيتتەن اقشانى الىپ, جاڭا اشىلعان ەسەپشوتقا سالۋ قاجەت ەكەنىن ايتقان. الدىمەن جابىرلەنۋشى حابارلاسقان ادامدارعا سەنبەگەن, بانك فيليالىنا باراتىنىن حابارلاعان. بىراق قىلمىسكەرلەر ونى بۇلاي جاساماۋعا كوندىرەدى. الاياقتاردىڭ ايتقانىنا سەنگەن ايەل ولاردىڭ نۇسقاۋىن تۇگەل ورىنداپ, ءوزىنىڭ 7 ملن تەڭگەدەن استام اقشاسىن, العان نەسيەسىن بىرنەشە Qiwi-ءامياننىڭ ەسەپشوتتارىنا اۋدارىپ جىبەرگەن.
جالپى العاندا, قىلمىسكەرلەر 11 ملن 865 مىڭ تەڭگەنى قولدى ەتكەن. بۇل اسا ءىرى كولەمدە كەلتىرىلگەن شىعىن بولىپ تابىلادى. جابىرلەنۋشى پوليتسياعا جۇگىندى. بۇل فاكتى قىلمىستىق كودەكستىڭ 190-بابى 4-بولىگى «الاياقتىق» بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلدى. كريمينالدىق پوليتسيا قىزمەتكەرلەرى جەدەل-ىزدەستىرۋ شارالارىن جۇرگىزىپ جاتىر.
«بۇگىندە «بانكتىڭ قاۋىپسىزدىك قىزمەتىنەن قوڭىراۋ» شالۋ ارقىلى الداۋ سحەماسى ەڭ كوپ تارالعان الداۋ تاسىلدەرىنىڭ ءبىرى بولىپ تابىلادى بۇل ءتاسىلدى كوپتەگەن ادامدار بىلەدى. سوعان قاراماستان, كەيدە قاسكويلەر وزدەرىنىڭ قۇرباندارىنا پسيحولوگيالىق قىسىم جاساۋ ارقىلى شەبەرلىك تانىتادى. بۇل جاعدايدا جابىرلەنۋشى بانك فيليالىنا بارىپ, شوتتىڭ جاعدايى جايلى سەنىمدى اقپارات كوزىنەن بىلۋگە شەشىم قابىلداسا, ءوزىن الاياقتاردان قورعار ەدى. كەز كەلگەن جاعدايدا ەستە ساقتاۋ ماڭىزدى: ناقتى بانك قىزمەتكەرلەرى قانداي جاعداي بولماسىن, ەشقاشان كليەنتتەرگە قارجىلىق وپەراتسيالار جاسامايدى, قۇپيا دەرەكتەردى اتاۋدى تالاپ ەتپەيدى», دەيدى سقو پوليتسيا دەپارتامەنتى كريمينالدىق پوليتسيا باسقارماسى باستىعىنىڭ ورىنباسارى پوليتسيا پودپولكوۆنيگى مارات جۇماليەۆ.
وبلىستا جىل باسىنان بەرى جالپى 202 ينتەرنەت-الاياقتىق تىركەلدى. ونىڭ 52-ءسى «بانكتىڭ قاۋىپسىزدىك قىزمەتىنەن قوڭىراۋ شالۋ» سحەماسىنا نەگىزدەلگەن.