باۋىرلاس ەلدەر ىنتىماقتاستىقتى نىعايتۋعا مۇددەلى

وسى ورايدا, قازاقستان رەسپۋب­لي­كا­سى­نىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ باس­تاماسىمەن قۇ­رىلعان تۇركى­تىل­دەس مەملەكەتتەردىڭ ىن­تى­­ماق­تاستىق كەڭەسىنىڭ (تمىك) بەي­رەس­مي ءسامميتىن وتكىزۋ, وندا تۇركى كەڭە­­سى­نىڭ مارتەبەسىن كوتەرۋ تۋرا­لى ماسە­لە­لەر­دى قاراستىرۋ وتە ما­ڭىزدى. وكىنىشكە قا­­راي, ءسام­مي­تتى جوسپارلاعانداي, تۇركى الەمى­­نىڭ رۋحاني ورتالىعى تۇركى­ستان قا­­لا­­سىندا وتكىزۋ پاندەميا جا­عدايى­نا باي­لا­نىستى مۇمكىن بول­مادى. دەگەن­مەن, تمىك-عا مۇشە ەلدەردىڭ بارلىعى­نىڭ – ازەربايجان, قازاقستان, قىر­عىز­ستان, تۇركيا, وزبەكستان, سونىمەن بىرگە با­قى­­­لاۋشى مەملەكەت ۆەنگريا جانە كەلە­شەك­­تە مۇشەلىككە قابىلدانۋى ىقتي­مال تۇ­رىك­مەنستان مەملەكەتتەرىنىڭ باسشى­لا­رى قا­تىسىپ, مۇددەلىلىك تانىتۋى تۇر­كى كەڭەسىنىڭ الەۋەتى جوعارى ەكەندىگىن كورسەتەدى.

تۇركى كەڭەسىنە مۇشە ەلدەردىڭ مادە­ني-تاريحي جاقىندىعى كەڭەس­تىڭ باستى قۇندىلىقتارىنىڭ ءبىرى دەۋگە بولادى. ورتالىق ازيانىڭ ءتورت مەملەكەتى, ازەر­بايجان مەن تۇركيا – ورتاق تامىرى بار, تۇركى تىلدەرىندە سويلەيتىن جانە مۇد­دەلەرى مەن ماقساتتارى جاقىن ەلدەر. تۇركىتىلدەس مەملەكەتتەر اراسىن­داعى كوپجاقتى قاتىناس­تار ەكونوميكا­لىق ىنتىماقتاس­تىق پەن ينتەگراتسيانى دامىتۋ ءۇشىن مۇمكىندىكتەر اشىپ, ساياسي-ديپلوماتيالىق بايلانىستاردىڭ قالىپتاسۋىنا ىقپال ەتەدى جانە گۋمانيتار­لىق سالاداعى تەرەڭ بايلانىستاردىڭ نەگىزىن قالايدى.

حالىقارالىق ۇيىمنىڭ باس­تى ماقساتتارى مەن مىندەتتەرى­نىڭ اراسىندا ءوزارا سەنىمدى, دوس­تىق پەن تاتۋ كورشىلىكتى, بەيبىت­شىلىك پەن قاۋىپسىزدىكتى نىعاي­تۋ, حالىقارالىق تەرروريزم مەن سەپاراتيزمگە, ەكسترەميزمگە, ادام ساۋداسىنا, ەسىرت­كى بيزنەسىنە قار­سى كۇرەستەگى ءىس-قيمىلداردى كەلى­سۋ, سونداي-اق ەكى جاقتى جانە ايماقتىق دەڭگەيدە ساياسي, ساۋ­دا-ەكونوميكالىق, مادەني-ءبىلىم بەرۋ, عىلىمي-تەحنيكالىق ىن­تى­ماقتاستىققا جاردەمدەسۋ ما­ڭىزدى.

تۇركىتىلدەس مەملەكەتتەر ارا­سىن­­دا­عى ساياسي, ەكونوميكالىق جانە مادەني-گۋمانيتارلىق سالالار­دا­عى ىنتى­ماقتاستىق قازاقستان­­نىڭ سىرتقى ساياساتى ءۇشىن ارقا­شان ماڭىزدى باعىت بولىپ كەلدى. حالىقارالىق ارەنادا جانە مۇشە ەلدەر اراسىنداعى ىن­تىماقتاستىق كەڭەيدى. ەكونو­ميكادان تۋريزمگە, جاس­تار مەن سپورتتان بىلىمگە دەيىنگى ىن­تى­ماقتاستىقتىڭ 20 ءتۇرلى سالاس­ىن قامتيتىن تۇركى كەڭەسىنىڭ كەلە­شەگىن نىعايتۋ مىندەتى – بۇگىنگى كۇن تارتىبىندەگى باستى تاقىرىپ.

ەسكە سالساق, 2019 جىلعى 15 قا­زاندا باكۋدە وتكەن تمىك VII سام­ميتىندە نۇرسۇلتان نازار­باەۆ «تۇركى كەلەشەگى – 2040» باعدارلاماسىن ازىرلەۋ جونىندە ۇسىنىس ەنگىزگەن-ءدى. وسى باعدار­لاماعا ساۋدا-ەكونو­مي­كالىق سياقتى ماڭىزدى سا­لالار­دان بولەك, ءبىلىم بەرۋ سالا­سىنداعى ىنتىماقتاستىق ماسە­لەلەرىن دە قوسۋ ورىندى دەپ ساناي­مىز, ويتكەنى جالپى تۇركى­لىك بولاشاقتىڭ جاڭا كوكجيەك­تەرىن جانە ورتاق قۇندىلىقتار­دى قالىپتاستىرۋعا وقۋ-تاربيە شارالارى شەڭبەرىندە مەكتەپ جانە ۋنيۆەرسيتەت اۋديتوريالارىندا ءتيىمدى جۇمىس جۇرگىزۋدىڭ مۇمكىندىگى جوعارى.

اسەل نازاربەتوۆا,

پرەزيدەنتى جانىنداعى قسزي حالىقارالىق زەرتتەۋلەر ءبولىمىنىڭ باسشىسى