تەرەزەدەن سىرتقا كوز تاستاسام, ءۇيدىڭ ماڭىنداعى ساياجولدىڭ كوپ ورىندىعىنىڭ بىرنەشەۋى شالقاسىنان قۇلاپ جاتىر. جەلدىڭ ەكپىنىنەن قۇلايتىنداي جەڭىل ەمەس ەدى. ءارى جەرگە تەمىرمەن بەكىتىلىپ ورناتىلعانىن ءوز كوزىممەن كورگەنمىن. نە بولسا دا, «تەپسە تەمىر ۇزەتىن» ءبىر «مىقتىنىڭ» تىندىرعان شارۋاسى ەكەنى انىق. ال اناسىمەن سەرۋەندەپ جۇرگەن بالدىرعان ورىندىقتى ورنىنا قويماقشى بولىپ ءبىر بۇرىشىنان تارتىپ الەك.
قايبىر جىلى وبلىس ورتالىعىنىڭ كوشەلەرىنە شىنى ايالدامالار ورناتىلعاندا بۇزاقىلار بىرىنەن سوڭ ءبىرىن قيراتىپ, يەسىز قالعان ءۇيدىڭ تەرەزەسىندەي قىلىپ ەدى. بار جاڭانىڭ استان-كەستەڭىن شىعاراتىنداردىڭ بۇل ەسسىزدىگىنە توقتاۋ جوق. سودان دا بولار, مايىسقان كوشە شامىن, توڭكەرىلىپ جاتقان ورىندىق پەن قوقىس شەلەگىن, سىنعان نە بويالعان شاعىن ساۋلەت مۇسىندەرىن كورسەك, «بۇل نە ماسقارا؟» دەپ كەيىمەك تۇگىل, نازار اۋدارماۋعا اينالدىق. ءتىپتى قالانى اباتتاندىرۋ ماقساتىندا جاڭاشىلدىق ەنگىزىلىپ جاتسا, «بۇل قانشا كۇن تۇرادى ەكەن؟» دەگەن وي قىلاڭ بەرەتىنى بەلگىلى.
وسىدان بىرەر جىل بۇرىن پەتروپاۆل قالاسىنىڭ ورتالىق الاڭىنا سمارت-ورىندىقتار, كارىم سۇتىشەۆ كوشەسىنىڭ بويىنا شاحمات ورناتىلدى. كەلەسى كۇنى سمارت-ورىندىقتاردىڭ سول ءتۇنى قيراعانى جايلى حابار تارادى. قىزىلجارلىقتاردىڭ ەرمەگىنە اينالعان شاحماتتىڭ دا داۋرەنى ۇزاققا بارمادى. فيگۋرالارىن جاۋ شاپقانداي قىلدى. كەيىن شاحماتتاردى جوندەپ, قايتا ورنىنا قويدى. بۇل جولى دا «ەندى قانشا كۇن تۇرادى ەكەن؟» دەگەن سۇراق كوكەيگە ورالدى. ال مىنا ورىندىق قانشا كۇن وسىلاي جاتادى ەكەن دەگەن ويمەن مەن بالامدى الىپ دالاعا شىقتىم. ەسىك الدىندا ءبىرىنشى كىرەبەرىستە تۇراتىن تانىس اپا كەزدەستى.
– وسىندا تۋىسىم تۇرادى, سوعان كەلىپ ەدىم. مىنا كىرەبەرىستىڭ ءىشى تاپ-تازا. ءليفتىنىڭ ىشىندە ءىلۋلى تۇرعان جارناما تاقتاسى سول قالپى. ءتىپتى انىقتاما قىزمەتتەرىنىڭ تەلەفون نومىرىنە دەيىن جازىپ, ءىلىپ قويىپسىڭدار, – دەدى.
– وعان نەگە تاڭداندىڭىز؟
– ءبىزدىڭ كىرەبەرىستىڭ اعاش ەسىگىن سىندىرىپ, قابىرعاعا سۇيەپ قويدى. سىرتقى ەسىك تەمىر بولعاسىن عانا شىداپ تۇر. تازالىق جايلى ايتقىم دا كەلمەيدى.
– ەسىكتى كىم سىندىرسا, سوعان جوندەتپەيسىزدەر مە؟
– سىندىرعان ادامدى ىزدەپ جاتقان ەشكىم جوق. ەسىك قابىرعاعا سۇيەۋلى كۇيى بىرنەشە كۇن تۇردى. سوسىن وسى جازدا اۋىلدان كوشىپ كەلگەن ءبىر اقساقالدىڭ بالاسى جوندەپ, قايتا ورناتتى. قازىر ءتارتىپتى الگى اقساقال قاداعالاپ ءجۇر. سەندەردىڭ كىرەبەرىستەرىڭدە پاتەر يەلەرىنىڭ وزدەرى تۇراتىن شىعار. بىزدەگى پاتەرلەردە تۇراتىنداردىڭ توقسان پايىزى – جالعا الۋشىلار, – دەدى.
سول ساتتە ساناما ساڭىلاۋ تۇسكەندەي بولدى. «بۇل – مەنىكى ەمەس, ۇكىمەتتىكى» دەگەن بۇرىنعى كەڭەستىك تۇتىنۋشىلىق پيعىل ءالى دە تۇزەلمەي, ۇرپاقتان-ۇرپاققا اۋىسقان با, قالاي؟ بۇگىنگى جاستاردىڭ ىشىندەگى بىلىمىنە ەمەس, بىلەگىنە سەنگەندەردىڭ جانى اشىماستىعىنا قاراپ, «سوندا ءوزىڭ ءومىر ءسۇرىپ وتىرعان ەلىڭ دە سەنىكى ەمەس, ۇكىمەتتىكى مە؟» دەپ سۇراعىڭ كەلەدى...
ارايلىم بەيسەنباەۆا,
جۋرناليست
پەتروپاۆل