«التىن جەبە» ارنايى وپەراتسيالار كۇشتەرىن كەشەندى تەكسەرۋدىڭ ەكىنشى كەزەڭى قازاقستاننىڭ باتىس وڭىرىندە وتۋدە. بۇعان قۇرلىق اسكەرلەرىنىڭ, اۋە قورعانىسى كۇشتەرىنىڭ جانە اسكەري-تەڭىز كۇشتەرىنىڭ اسكەري بولىمدەرى قاتىستى.
تەكسەرۋ اقتاۋ مەن اتىراۋ گارنيزوندارىنىڭ اسكەري بولىمدەرىن جوعارى جاۋىنگەرلىك دايارلىق دەڭگەيىنە كەلتىرۋدەن باستالدى. بولىمدەر ورنالاسقان جەرلەردە جەكە قۇرامدى جيناۋ مەن حابارلاۋ, سونىمەن قوسا قويىلعان مىندەتتەردى ورىنداۋعا دايىندىعىن تەكسەردى. اقتاۋ گارنيزونىنىڭ بولىمشەلەرى «ويماشا» پوليگونىندا جاۋىنگەرلىك تاپسىرمالاردى ورىنداۋ اۋماعىنا مارش جاسادى. اتىراۋ گارنيزونىنان بولىمشەلەر جاساقتارى پوليگونعا اسكەري-كولىك اۆياتسياسىنىڭ ۇشاقتارىمەن جەتكىزىلدى.
- اسكەري قىزمەتشىلەر ينجەنەرلىك دايىندىقتى, رادياتسيالىق, حيميالىق جانە بيولوگيالىق قورعانىستى, اسكەري-مەديتسينالىق دايىندىق پەن مينا جارۋ ءىسىن ۇيرەنگەن, بايلانىس پەن اسكەري توپوگرافيانى ۇيىمداستىرۋدان قاجەتتى ماشىقتانعان, ءبىلىم جيناقتاعان. جەكە قۇرام جاقسى ناتيجە كورسەتۋگە قابىلەتتى, ال كومانديرلەر جان-جاقتى, دۇرىس شەشىم قابىلداي الادى, – دەپ اتاپ ءوتتى ءبولىم كومانديرىنىڭ ءبىرىنشى ورىنباسارى – شتاب باستىعى مايور جالعاس راحىمعاليەۆ.
باسقارۋ ورگاندارىنىڭ جۇمىسىنا, بارلاۋعا, ارتيللەريا اتىسىن رەتتەۋگە جانە اۆياتسيانى باسقارۋعا ەرەكشە كوڭىل بولىنەدى. تاپسىرمالاردىڭ وزگەشەلىگى, ونى قۇمدى جەردە ورىنداۋدا بولماق.
كەشەندى تەكسەرۋ بارىسىندا بولىمشەلەردىڭ ديۆەرسيالىق-بارلاۋ ءىس-قيمىلدارىن جۇرگىزۋى, كۇندىز جانە تۇندە اسكەري تاكتيكالىق اتىس جاتتىعۋلارىن ورىنداۋى باعالانادى. اسكەري قىزمەتشىلەر ارنايى-تاكتيكالىق, ينجەنەرلىك, اسكەري-مەديتسينالىق دايارلىقتان, مينا-جارۋ ىسىنەن جەكە سىناقتار, ال بايلانىس جانە اسكەري توپوگرافيادان نورماتيۆتەر تاپسىرادى.
بۇعان دەيىن شىعىس قازاقستانداعى اسكەري بولىمدەر تەكسەرىلگەن بولاتىن. جەكە قۇرام ارنايى وپەراتسيالار كۇشتەرى قۇرامدارىنىڭ جۇكتەلگەن مىندەتتەرگە سايكەس جاۋىنگەرلىك تاپسىرمالاردى ورىنداۋعا دايارلىعىن كورسەتتى.
«التىن جەبە» تەكسەرىسىنىڭ ەكىنشى كەزەڭى وسى جىلدىڭ 10 ساۋىرىنە دەيىن جالعاسادى.