سەناتورلار بۇگىن وسىعان مۇمكىندىك بەرەتىن ءتيىستى زاڭدى قابىلدادى. سوعان سايكەس باعالى مەتالدار مەن تاستاردان جاسالعان بۇيىمعا سىنامالار ورناتۋدىڭ كۇشى جويىلدى. ياعني, قازىرگى كەزدە ەكونوميكالىق وداقتىڭ بارلىق ەلدەرىنىڭ اۋماعىندا قازاقستاندىق تەستتەن وتكەن زەرگەرلىك بۇيىمداردى قايتا سىناماسىز ساتۋعا بولادى. بۇل دەگەنىمىز وتاندىق كاسىپكەرلەرگە قازاقستاندىق زەرگەرلىك بۇيىمداردى ەاەو ەلدەرىنە ەكسپورتتاۋ جەڭىلدەيدى دەگەن ءسوز, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
«كەلىسىم جوباسىن ىسكە اسىرۋ ەل ىشىندە ءوز شيكىزاتىن قايتا وڭدەۋ بويىنشا وتاندىق اففيناج ءوندىرىسىن ءتيىمدى دامىتۋعا, قوسىلعان قۇنى جوعارى باسەكەگە قابىلەتتى ونىمدەردى قۇرۋعا, زەرگەرلىك بۇيىمدار شىعارۋدى ۇلعايتۋعا جانە ەۋرازيالىق ەكونوميكالىق وداق شەڭبەرىندە باعالى مەتالدار مەن اسىل تاستاردىڭ ەركىن اينالىمىن قامتاماسىز ەتۋگە ىقپال ەتەدى», دەدى سەناتور جەڭىس نۇرعاليەۆ.
بۇل «ەۋرازيالىق ەكونوميكالىق وداق شەڭبەرىندە باعالى مەتالدارمەن جانە اسىل تاستارمەن وپەراتسيالاردى جۇرگىزۋ ەرەكشەلىكتەرى تۋرالى كەلىسىمدى راتيفيكاتسيالاۋ تۋرالى» زاڭدا جازىلعان. سونىمەن قاتار وسى كەلىسىم قازاقستاندىق نارىقتى ساپاسىز زەرگەرلىك شيكىزاتتىڭ يمپورتىنان قورعايدى, سىبايلاس جەمقورلىقتىڭ جولىن كەسۋگە باعىتتالعان اقپارات الماسۋدى جەڭىلدەتەدى.