ەل ەسىندە «ادامجەگىش» دەگەن اتپەن قالعان ۋگاندالىق پرەزيدەنت تۋرالى ءباسپاسوز بەتتەرىندە ءجيى ايتىلا بەرمەيدى. دەگەنمەن يدي امين بيلىك ەتكەن جىلدارى 300 000-نان استام ادامنىڭ ءومىرى قيىلعانى تۋرالى دەرەك تاريح بەتتەرىندە ماڭگى ساقتالادى, دەپ جازادى Egemen.kz ءتىلشىسى.
قانىشەر باسشى ءوزىن «شوتلانديا كورولى» دەپ اتاپ بۇۇ-نىڭ شتاب پاتەرىن ۋگانداعا اۋىستىرۋدى, سونىمەن قاتار ەليزاۆەتا كورولەۆانىڭ ورنىنا ءوزىن بريتان كورولدىگىنىڭ باسشىسى ەتۋدى تالاپ ەتۋىمەن دە اتى شىققان.
يدي امين 22 جاسىنا دەيىن وقىپ-جازۋدى بىلمەگەن. 1971 جىلى «ەلدى تاۋەلسىز ەتەمىن» دەگەن سىلتاۋمەن, حالىقتى الداپ بيلىككە كەلەدى. الايدا تاققا وتىرعانىنا جارتى جىل دا بولماعان بيلەۋشى 10 000-نان استام ادامدى بولماشى سىلتاۋلارمەن ءولىم جازاسىنا كەسىپتى. ەڭ قىزىعى, جازالانعانداردىڭ 2000-ىن ءوز قولىمەن ولتىرگەن ەكەن.
ءبىرىنشى كەزەكتە ول وزىنە قارسى شىعۋى مۇمكىن دەگەن شەنەۋنىكتەردىڭ كوزىن جويادى. ال سول كەزدەگى شتاب باسشىسى سۇلەيمەن حۋسەيننىڭ باسىن كەسىپ, ونى ءوز ءۇيىنىڭ مۇزداتقىشىندا «ولجا» رەتىندە ساقتاعان. وسىدان كەيىن ەل اراسىندا يدي امين ادام ەتىن جەيدى دەگەن قاۋەسەت تارايدى.يدي ءاميننىڭ ءجونسىز ساياساتىنىڭ كەسىرىنەن 1979 جىلى ەلدىڭ ەكونوميكالىق جاعدايى ابدەن ۋشىعادى. وسى جاعىمسىز وقيعالاردان كەيىن وزىنە قاۋىپ ءتونىپ تۇرعانىن سەزگەن ول ساۋد ارابياسىنا قاشىپ كەتكەن. سول جاقتا ءجۇرىپ, 2003 جىلى, 75 جاسقا قاراعان شاعىندا توسەك تارتىپ, كوپ ۇزاماي قايتىس بولعان.
ايتا كەتەيىك, 2006 جىلى «قانىشەر پرەزيدەنتتىڭ» ءومىربايانىن تولىقتاي سيپاتتايتىن «شوتلانديانىڭ سوڭعى كورولى» دەگەن تاريحي كينو جارىق كورىپ ەدى.