سايلاۋالدى باعدارلامانى جۇزەگە اسىرۋ ارقىلى وزەكتى ماسەلەلەر شەشىمىن تابادى

پاندەميا حالىقتىڭ ءال-اۋحاتى مەن كاسىبىنە كەرى اسەرىن تيگىزدى. ال ازاماتتارعا قولداۋ كورسەتۋ – پارتيانىڭ باستى ۇستانىمدارىنىڭ ءبىرى. پارتيانىڭ وبلىستىق فيليالى دا پاندەميا كەزىندە اتىراۋلىقتارعا قول ۇشىن سوزىپ, كومەك كورسەتتى. سايلاۋالدى باعدارلامانىڭ دا كوكسەگەنى وسى. ازاماتتارعا كومەك كورسەتۋ, ولاردىڭ ءال-اۋقاتىن جاقسارتىپ, ساپالى ءومىر سۇرۋىنە جول اشۋ.

«وزگەرىستەر جولى: ءار ازاماتقا لايىقتى ءومىر!» اتتى سايلاۋالدى باعدارلامانىڭ ءار باعىتى بويىنشا قازىر اتىراۋ وبلىسىندا جۇيەلى جۇمىس جوسپارى قۇرىلىپ, جاۋاپتىلار ىسكە كىرىستى. جول كارتاسىندا 7 باسىم باعىت بويىنشا 128 ءىس-شارا,        91 كورسەتكىش جوسپارلانىپ وتىر. اتالعان ءىس-شارالاردىڭ 34,7%-ءى «الەۋمەتتىك قىزمەتكە باعدارلانعان ايماق» باعىتىنا, 26,6%-ى «ەكونوميكالىق تۇراقتى ايماق» باعىتىنا, 15,3%-ى «جايلى ايماق» باعىتىنا تيەسىلى. قالعان 23,4%-ىن باسقا باعىتتار قۇرايدى.

ءىس-شارالاردىڭ باسىم بولىگىن قامتيتىن «الەۋمەتتىك قىزمەتكە باعدارلانعان ايماق» باعىتىندا قاراستىرىلعان ىلكىمدى ىستەر ارقىلى ء بىلىم, دەنساۋلىق ساقتاۋ جانە الەۋمەتتىك سالادا ساپالى قىزمەتتەرگە قولجەتىمدىلىك ارتادى. سونداي-اق وبلىس تۇرعىندارىنىڭ ءومىر سۇرۋ جاعدايىن جاقسارتۋعا كۇش سالىنباق.

جول كارتاسىندا كورسەتىلگەن جوسپار بويىنشا جىل سايىن جالپى سانى 65-تەن كوپ جاس ماماندى اۋىلدارعا, ەلدى مەكەندەرگە تۇراقتاندىرۋ ماقساتىندا الەۋمەتتىك كومەك كولەمى ۇلعايادى. اسىرەسە, باسپانا, بالاباقشا, سونىمەن قاتار قاجەتتى كومەكپەن تولىق قامتۋ جوسپارلانىپ وتىر. 2021-2025 جىلدارى ارالىعىندا وڭىردەگى مەديتسينا ماماندارىنىڭ بىلىكتىلىگى مەن تاجىريبەسىن ارتتىرۋ ماقساتىندا 25 دارىگەرگە شەت ەلدەردەگى ەڭ وزىق تەحنولوگيامەن جابدىقتالعان مەديتسينالىق كلينيكالارعا جولداما بەرۋ قاراستىرىلعان. وعان قوسا, الداعى 5 جىل ىشىندە 10 مەديتسينالىق نىساننىڭ قۇرىلىسى اياقتالماق. وسى ۋاقىت ارالىعىندا 3 اۋداننىڭ ورتالىق اۋرۋحانالارىنا جانە 7 دارىگەرلىك امبۋلاتورياسىنا كۇردەلى جوندەۋ جۇرگىزىلەدى. مۇنداي اۋقىمدى جوبالاردى جۇزەگە اسىرۋ ارقىلى مۇنايلى وڭىردەگى ءومىر ءسۇرۋ ۇزاقتىعى ورتاشا ەسەپپەن 75,3 جاسقا دەيىن ارتادى.

تۇرعىن ءۇي-كوممۋنالدىق شارۋاشىلىق سالاسى بويىنشا اتىراۋ وبلىسىندا 3,5 ملن شارشى مەتر تۇرعىن ءۇيدى پايدالانۋعا بەرىپ, 7 مىڭ وتباسىن باسپانامەن قامتاماسىز ەتۋ جوسپارلانىپ وتىر. ءوڭىر بويىنشا 7 كارىزدىك-تازارتۋ يماراتتارىن سالۋ جانە قايتا جاڭعىرتۋ جۇمىستارى قولعا الىندى.

«الەۋمەتتىك قىزمەتكە باعدارلانعان ايماق» باعىتىنداعى باستى ماقساتتىڭ ءبىرى – ءبىلىم ساپاسىن جاقسارتۋ. وبلىستا ءۇش جاستان باستاپ بالالار وقۋ ورىندارىمەن 100% قامتاماسىز ەتىلگەن. دەسە دە, 5 اپاتتى مەكتەپ, 12 ءۇش اۋىسىمدى مەكتەپ بار. بۇل بالالاردىڭ ساپالى ءبىلىم الۋىنا بەلگىلى ءبىر دەڭگەيدە كەرى اسەرىن تيگىزەتىنى راس. وسى ورايدا, Nur Otan پارتياسى وزىنە جۇكتەلگەن مىندەتتەرگە باسا نازار اۋدارماق. 2021-2025 جىلدارى وبلىس بويىنشا 11 جاڭا مەكتەپتىڭ قۇرىلىسى باستالادى دەپ جوسپارلانعان. سونداي-اق, اۋدانداردا 56 بالاباقشا سالۋ كوزدەلىپ وتىر. ال, كۇردەلى جوندەۋدى قاجەت ەتەتىن ءبىلىم وردالارىندا جوندەۋ جۇمىستارىن جۇرگىزۋ الداعى بەس جىلدىڭ ىشىندە تولىق قامتىلادى. وبلىس ورتالىعىنداعى «وقۋشىلار سارايى» جۇمىسىن زاماناۋي دەڭگەيگە كوتەرۋ كوزدەلگەن. دۋالدىق وقىتۋمەن بىتىرگەن تەحنيكالىق جانە كاسىپتىك ءبىلىم بەرۋ ۇيىمدارىنىڭ تۇلەكتەرىن 100% جۇمىسقا ورنالاستىرۋعا, مۇعالىمدەردىڭ پاندىك قاۋىمداستىقتارىن قۇرىپ, توقسان سايىن كەلەلى كەڭەس وتكىزۋ ارقىلى پەداگوگ كادرلاردىڭ كاسىبي بىلىكتىلىگىن ارتتىرۋ جۇمىستارى جول قويىلادى.

         وڭىردە مۇمكىندىگى شەكتەۋلى جاندار ءۇشىن كەدەرگىسىز ورتا قۇرۋ – پارتيانىڭ باستى ماقساتى. قولايلى ورتا قالىپتاستىرۋ ءۇشىن الەۋمەتتىك جانە كولىك ينفراقۇرىلىم وبەكتىلەرىن 75%-عا بەيىمدەۋ جوسپارلاندى. بۇعان دەيىن قولعا الىنعان «كەدەرگىسىز كەلەشەك», «باقىتتى وتباسى», «ارداگەرلەردى ارداقتايىق» جوبالارى ءارى قاراي ءوز جالعاسىن تاپپاق.

«ەكونوميكالىق تۇراقتى ايماق» باعىتىندا كوزدەلگەن تۇراقتى ەكونوميكالىق دامۋ جانە حالىقتىڭ ءومىر ءسۇرۋ دەڭگەيىن جاقسارتۋ جۇمىستارى باستى نازاردا. وبلىستىڭ ەكونوميكالىق تۇراقتىلىعى ءوندىرىس, اۋىلشارۋاشىلىق, قۇرىلىس جانە ساۋدا سالاسىن دامىتۋ ارقىلى جۇزەگە اساتىنى بەلگىلى. مۇناي ونەركاسىبى سالاسىندا جۇمىستىڭ تۇراقتىلىعى ارقاسىندا پاندەميا كەزىندە ايماق ەكونوميكاداعى شىعىندار مەن جۇمىسشىلاردىڭ جاپپاي بوساتىلۋىن تەجەدى. بولاشاقتا ونەركاسىپتى دامىتۋعا, وتاندىق وندىرۋشىلەردى قولداۋعا, باسەكەگە قابىلەتتى جانە يمپورتتى الماستىراتىن ونىمدەر شىعاراتىن جاڭا ءوندىرىس ورىندارىن اشۋعا باسا نازار اۋدارىلادى. سونىمەن قاتار, Nur Otan پارتياسى ەڭبەك جاعدايىن جاقسارتۋ, وتاندىق جانە شەتەلدىك جۇمىسشىلاردىڭ جالاقى ايىرماشىلىعىنا جول بەرمەۋ ماسەلەسىن ۇنەمى باقىلاۋدا ۇستايدى.

«ەكونوميكالىق تۇراقتى ايماق» باعىتى بويىنشا وڭىرىمىزدە مۇناي كولەمىن 49 ملن توننادان 2025 جىلعا قاراي 55 ملن تونناعا جەتكىزۋ جوسپارلانىپ وتىر. ال مۇناي-حيميا ءوندىرىسىنىڭ كولەمىن 5 جىل ىشىندە 35%-عا ارتتىرۋ كوزدەلگەن. 2021-2025 جىلدار ارالىعىندا 10 ينۆەستيتسيالىق جوبانى جۇزەگە اسىرۋ – سايلاۋالدى باعدارلامانىڭ جول كارتاسىنا ەنگىزىلدى. ازاماتتاردى تۇراقتى جۇمىسپەن قامتاماسىز ەتۋ ماقساتىندا 63 ينفراقۇرىلىمدىق جوباعا 7 مىڭنان استام ادام قىزمەتكە ورنالاستىرىلادى.

جول كارتاسىندا قاراستىرىلعان 7 باسىم باعىتتىڭ 15,3%-ىن  «جايلى ايماق» باعىتى بويىنشا ازاماتتاردىڭ ءومىر ءسۇرۋ ساپاسىن ارتتىرۋ, تازا سۋ مەن تازا اۋانىڭ, جاعدايى جاقسى جولداردىڭ قولجەتىمدى بولۋى ءۇشىن جۇيەلى جۇمىستاردى قولعا الماق. اتىراۋ وبلىسى – مۇنايلى ءوڭىر بولعاندىقتان, ايماقتاعى وندىرىستىك زاۋىتتاردىڭ اۋا ساپاسىنا اسەر ەتەتىنى ءسوزسىز. سول سەبەپتى, سايلاۋالدى باعدارلامانىڭ «جايلى ايماق» باعىتى بويىنشا بىرقاتار جۇمىس جۇزەگە اسادى. 2021-2025 جج. I ساناتتاعى ءىرى وندىرىستىك مۇناي-گاز كاسىپورىنداردا (نسوس, تشو, ءاموز جانە ت.ب.) اتموسفەرالىق اۋانى ونلاين-رەجىمدە باقىلاۋ جۇيەلەرى ورناتىلادى.

وبلىس اۋماعىندا اۋا-رايىن تۇراقتى تۇردە باقىلايتىن   45 ستانسا بار, الايدا, مالىمەتتەر سەرۆەرگە كەشىگىپ تۇسەدى. سول سەبەپتى ولار ءوز وزەكتىلىگىن جوعالتىپ وتىر, ياعني گاز شىعارىندىلارى شەكتى مولشەردەن اسىپ كەتسە, قاجەتتى شارا دەر كەزىندە قولدانىلمايدى. 2025 جىلعا قاراي اتموسفەرالىق اۋاعا شىعارىلاتىن لاستاۋشى زاتتاردىڭ كولەمىن 300 مىڭ توننادان 264,3 مىڭ تونناعا دەيىن 11,9%-عا ازايتۋ كوزدەلىپ وتىر.

جول ساپاسىن جاقسارتۋ – حالىقتىڭ جاقسى ءومىر ءسۇرۋ ساپاسىنىڭ كورسەتكىشى. وبلىس تۇرعىندارىنىڭ كورشىلەس مەملەكەتتەرگە اۆتوموبيل ارقىلى قاتىناۋ مۇمكىندىگى مول. الايدا, ساپاسىز سالىنعان جولداردىڭ قول بايلاۋ بولاتىنى بەلگىلى. Nur Otan پارتياسى بۇدان ءارى جول ساپاسىن جاقسارتۋدى قولعا الدى.

         «جاستار – ەل بولاشاعى» رەتىندە ەلباسى, پارتيا توراعاسى ن.نازارباەۆ ولارعا ۇلكەن سەنىم ارتاتىنىن جەتكىزگەن ەدى. جاڭا ۇرپاق ەلىمىزدىڭ ستراتەگيالىق باعىتىنىڭ قوزعالتقىشىنا اينالۋى كەرەك. سايلاۋالدى باعدارلامانىڭ «جاستارعا ارنالعان ايماق» باعىتى بويىنشا دا جۇيەلى جۇمىستار لەگى جالعاسىن تابادى.

وبلىستا جالپى 8 جاستار رەسۋرستىق ورتالىعى جۇمىس ىستەيدى. ولار جاستاردىڭ پاتريوتتىق تاربيەمەن كەمەلدەنۋىنە, رۋحاني جاڭعىرۋىنا, ازاماتتىق-قۇقىقتىق كوزقاراستارىنىڭ قالىپتاسۋىنا, جاستار اراسىندا بۇقارالىق سپورتتى دامۋىنا زور ۇلەس قوسىپ كەلەدى. بۇل باعىتتاعى ىلكىمدى ىستەردىڭ قاتارى ارتپاق. وڭىردەگى 14-29 جاس ارالىعىندا 133,1 مىڭ جاس وبلىس حالقىنىڭ 20,6%-ىن قۇرايدى. ەندى ولاردى قولداۋ ماقساتىندا Nur Otan پارتياسى جىل سايىن 5 مىڭنان كەم ەمەس جاستى جۇمىسقا ورنالاستىرۋدى كوزدەپ وتىر. «جاسىل ەل» ەڭبەك جاساقتارىنىڭ جۇمىسىن ۇيىمداستىرۋ ارقىلى جاز مەزگىلىندە 700-دەن اسا جاس جۇمىسقا تارتىلادى. «جاس كاسىپكەر» باعدارلاماسى اياسىندا جىل سايىن ءوز ءىسىن اشۋعا جانە بيزنەستى جۇرگىزۋگە كەمىندە 50 جاس ازاماتقا نەسيە بەرىلەدى. «ديپلوممەن-اۋىلعا» باعدارلاماسى بويىنشا كەمىندە 150 جاس ماماندى جۇمىسپەن قامتۋ قاراستىرىلعان. وسى جوسپارلى جۇمىستاردى اتقارا وتىرىپ, 2025 جىلعا دەيىن جۇمىسسىزدىق دەڭگەيى 2,2%-كە دەيىن تومەندەيدى.

توپىراعى كيەلى اتىراۋ ايماعى تالاي ءدۇلدۇل تۇلعانى, ونەردىڭ  داۋسىز دارىندارىن قازاققا سىيلادى. ولاردىڭ ەرەن ەڭبەگى ەل ەسىندە ۇزدىكسىز جاڭعىرىپ تۇرۋى ءتيىس. بۇل ماسەلەنىڭ دە سايلاۋالدى باعدارلامادا كورىنىس تابۋى – زاڭدىلىق. «تاريحى مەن مادەنيەتى باي ايماق» باعىتى بويىنشا الداعى 5 جىل ىشىندە قاسىم حان, ر.وتارباەۆ ەسكەرتكىشتەرىن تۇرعىزۋدى جوسپارلاپ وتىرمىز. سەبەبى, قاسىم حان – ەل ىرگەسىن بۇتىندەگەن بىرەگەي تۇلعا بولسا, راقىمجان وتارباەۆتىڭ ادەبيەت الەمىندەگى ورنى ەرەك. ولاردىڭ ەسىمى ۇرپاق جادىندا ماڭگى ساقتالۋى ءۇشىن ەڭسەلى ەسكەرتكىشتەرى قالا تورىندە تۇرسا يگى ەدى. سونىمەن بىرگە 2021-2025 جج. 4 مۇراجاي اشۋ (دومبىرا, مۇناي, اناعا قۇرمەت, ماحامبەت قورىعىنىڭ مۇراجايلارى) قاجەت. وعان قوسا, وڭىردە تاريحي جانە قاسيەتتى ورىندارعا ءىرى قازبا جۇمىستارىن جۇرگىزۋ (اقتوبە-لاەتي, سارايشىق قالاشىعى, تاس كەشۋ كەرۋەن سارايى, ميالى جانە قۇدايبەرگەن قورعاندارى) قارجى كوزدەرىنىڭ رەتىنە قاراي قولعا الىنادى. وسى سەكىلدى اۋقىمدى جوبالاردىڭ ەل بىرلىگى مەن تاتۋلىعىنا, تاۋەلسىزدىگىنىڭ تۇراقتىلىعىنا قوسار ۇلەسى مول بولماق.

«اشىق جانە ەسەپ بەرەتىن جەرگىلىكتى اتقارۋشى ورگاندار» باعىتىنىڭ بەرەرى كوپ. ويتكەنى, ءار ەلدىڭ دامۋى – بيلىك پەن بۇقارا اراسىنداعى بايلانىسقا تىكەلەي قاتىستى. مەملەكەتتىك ساياساتتىڭ نەگىزگى باعىتتارىنىڭ ءبىرى – جەمقورلىقپەن كۇرەس بولسا, پارتيانىڭ وسى باعىت بويىنشا اتقارار جۇمىس جوسپارى بەكىتىلدى. ارينە, باستى نازاردا – وسى وزەكتى ماسەلە.

ازاماتتارعا ەلەكتروندىق تسيفرلىق قولتاڭبانى الۋ جونىندە ءتۇسىندىرۋ جۇمىستارىن جانداندىرۋ بويىنشا بىلتىر 30 ءىس-شارا وتسە, بيىل ونىڭ سانىن 42-گە جەتكىزۋ جوسپارلانعان. جىل سايىن بۇل كورسەتكىشتى ارتتىرۋ كوزدەلىپ وتىر. ەلەكتروندىق فورماتتا كورسەتىلەتىن مەملەكەتتىك قىزمەتتەر الۋ بويىنشا ءتۇسىندىرۋ جۇمىستارىنىڭ سانىن بيىل 68-گە جەتكىزۋ ماسەلەسى قارالدى. سونىمەن قاتار اتىراۋ قالاسى مەن اۋدان اكىمدىكتەرىنىڭ سىبايلاس جەمقورلىققا قارسى كوميسسيالارىندا جىل سايىن, جالپى سانى 50-دەن از بولمايتىن ماسەلەنى قاراستىرۋ جايى دا نازاردان تىس قالمادى. تۇرعىنداردى مازالاعان وزەكتى ماسەلەنى ەسكەرۋسىز قالدىرماس ءۇشىن الەۋمەتتىك "تەلەگرام" چاتىن اشىپ, وڭىردە بولىپ جاتقان تۇيتكىلدى ءتۇيىندى باقىلاۋعا الۋ ءار دەپۋتاتقا مىندەت بولىپ تاپسىرىلدى.

Nur Otan پارتياسىنىڭ سايلاۋالدى باعدارلاماسىندا كورسەتىلگەن «قاۋىپسىز ايماق» باعىتىندا اتىراۋ ءوڭىرىن وبلىس تۇرعىندارى ءۇشىن ەش كەدەرگىسىز ايماققا اينالدىرۋ كوزدەلدى. اتىراۋلىقتاردىڭ, وبلىس قوناقتارىنىڭ قاۋىپسىزدىگىن قامتاماسىز ەتۋ ماقساتىندا 2025 جىلعا دەيىن وڭىردە بەينەباقىلاۋ كامەرالار سانى 1600-گە جەتەدى. الداعى 5 جىل ىشىندە 8 ۋچاسكەلىك پوليتسيا پۋنكتىن سالۋ كوزدەلىپ وتىر.

وبلىستىڭ «جول كارتاسىندا» جوسپارلانعان ءىس-شارالاردىڭ جالپى قاراجات كولەمى 2 123 329 ملن. تەڭگەنى قۇرايدى. سونىڭ ىشىندە 208 471 ملن تەڭگەسى – رەسپۋبليكالىق بيۋدجەت ەسەبىنەن, 87 951 ملن تەڭگە – جەرگىلىكتى بيۋدجەت ەسەبىنەن, 1 826 908 ملن تەڭگەسى – باسقا كوزدەر ەسەبىنەن قاراستىرىلىپ وتىر. 2021 جىلعى جوسپارلانعان ءىس-شارالارعا 888 782 ملن تەڭگە قاراجات قاراستىرىلعان. ونىڭ ىشىندە,  رەسپۋبليكالىق بيۋدجەتتەن 33 724 ملن تەڭگە, جەرگىلىكتى بيۋدجەتتەن 16 803 ملن تەڭگە, باسقا كوزدەر ەسەبىنەن  838 255 ملن تەڭگە جوسپارلانعان.

وبلىس, قالا جانە اۋدان كولەمىندە ءاربىر سالا جانە باستى باعىتتار بويىنشا جاۋاپتى ماسليحات دەپۋتاتتارى ايقىندالىپ, وبلىستىق جانە اۋماقتىق كەڭەستەر ىسكە كىرىستى. الداعى ۋاقىتتا جوسپارلى جۇمىستار ءوز ناتيجەسىن بەرە باستايدى.

سايلاۋالدى باعدارلامانىڭ ءار باعىتىندا كورسەتىلگەن اتقارىلۋى ءتيىس جۇمىستار, البەتتە, حالىق يگىلىگى ءۇشىن. بارلىق باعىت بويىنشا جۇمىس جوسپارى قۇرىلدى. جۇمىسشى توپتىڭ دا جيىنى ءجيى ءوتىپ تۇرادى. ايماقتىڭ دامۋى بيلىك پەن بۇقارا اراسىنداعى تىعىز بايلانىستىڭ ناتيجەسى. حالىقتىڭ ءار ۇسىنىسى مەن وتىنىشىنە نازار اۋدارۋ – Nur Otan پارتياسىنىڭ باستى ۇستانىمى.

ن.وجاەۆ,

Nur Otan پارتياسى وبلىستىق فيليالى

توراعاسىنىڭ ءبىرىنشى ورىنباسارى