بۇل تۋرالى قر ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆتىڭ اقتوبە وبلىسىنا كەلگەن ساپارىندا بەلگىلى بولدى دەپ حابارلايدى Egemen.kz
ۆەدومستۆو باسشىسى وڭىردەگى تابيعات پايدالانۋشى ءىرى كاسىپورىنداردى ارالاپ, ءوڭىر ەكولوگياسىن جاقسارتۋ شارالارىمەن تانىستى.
مينيستر «قازحروم» تۇك-نا قاراستى اقتوبە تەمىرقورىتپا زاۋىتى باسشىلىعىمەن كەزدەسۋىندە وسى كاسىپورىننىڭ وڭىردەگى ءىرى لاستاۋشىلاردىڭ ءبىرى ەكەنىن ايتىپ ءوتتى. ويتكەنى, اقتوبە قالاسى بويىنشا اۋاعا جىبەرىلەتىن زياندى زاتتار كولەمىنىڭ 50%-ى اتالعان كاسىپورىنعا تيەسىلى.
2021 جىلدىڭ اقپان ايىندا كاسىپورىن مينيسترلىكتەن كەشەندى ەكولوگيالىق شارالاردى جۇرگىزۋگە رۇقسات الىپ, ءوندىرىستى ەڭ وزىق قولجەتىمدى تەحنولوگيالارعا كوشىرۋدى جوسپارلاپ وتىر. ول ءۇشىن كاسىپورىن زاۋىت قوندىرعىلارىنا سۇزگىلەر ورناتۋ ارقىلى اۋاعا جىبەرىلەتىن زياندى زاتتار كولەمىن 2024 جىلعا دەيىن 30%-عا ازايتۋدى جوسپارلاپ وتىر. مينيستر زاۋىت باسشىلىعىنا ەڭ ۇزدىك قولجەتىمدى تەحنولوگيالارعا كوشۋ شارالارىن تەزدەتۋدى تاپسىردى. سونىمەن بىرگە حرومشپينەل ۇنتاعى قالدىقتارىن كومۋ جۇمىستارىن دا جەدەل تۇردە قولعا الۋدى مىندەتتەدى. جالپى «قازحروم» ترانسۇلتتىق كومپانياسى وتكەن جىلى ەكولوگيالىق شارالارعا 11,5 ملرد تەڭگە بولسە, ونىڭ 7 ملرد تەڭگەسى اقتوبە وڭىرىنە باعىتتالعان.
وسىدان سوڭ م. مىرزاعاليەۆ ەكولوگيالىق تۇرعىدان قاۋىپتى ءىرى ءوندىرىس ورىندارىنىڭ قاتارىنداعى اقتوبە حروم قوسىندىلارى زاۋىتىنا بارىپ, كاسىپورىن اۋلاسىندا جينالىپ قالعان ءوندىرىس قالدىقتارىن كەشەندى كومۋ جوسپارىمەن تانىستى. وسى كاسىپورىن 2020 جىلى جاڭا تەحنولوگيالاردى قولدانۋ ارقىلى لاس شىعارىندىلار كولەمىن 1,4 ەسەگە ازايتتى.
«2025 جىلعا دەيىن زاۋىت ەميسسيانى ازايتۋ ءۇشىن اۋاعا شىعارىلاتىن شاڭ تۇتقىش سۇزگىلەر ورناتۋدى مىندەتىنە الدى. بۇل جۇمىستى مۇمكىندىگىنشە تەزدەتۋ كەرەك», دەدى مينيستر.
اقتوبە قالاسىنىڭ ەكولوگيالىق جانە سانيتارلىق-ەپيدەميولوگيالىق احۋالىنا توزىعى جەتكەن كارىزدىك-تازالاۋ قۇرىلعىلارى بەكەتى دە اسەرىن تيگىزۋدە. ماعزۇم مىرزاعاليەۆ «Aktobesu-energygroup» اق-ىنا قاراستى كارىزدىك-تازالاۋ قۇرىلعىلارى ورتالىعىندا بولدى. بۇل جەردە مينيستر ءوڭىر باسشىسى وڭداسىن ورازالينمەن بىرگە جاڭا كارىزدىك-تازالاۋ بەكەتى قۇرىلىسى جونىندە پىكىر الماستى. «قازىرگى كەزدە بيۋدجەتتەن بولىنگەن 420 ملن تەڭگەگە حيميالىق رەاگەنتتەر قوسۋ ارقىلى قوقىستى تازالاۋ جۇمىستارى جۇرگىزىلۋدە. مينيسترلىك وتكەن جىلى وبلىس اكىمدىگىمەن بىرلەسە ءوڭىردىڭ كۇردەلى ەكولوگيالىق ماسەلەلەرىن كەشەندى شەشۋدىڭ جول كارتاسىن قابىلدادى. بيىلعى جىلدان باستاپ قورشاعان ورتاعا كەلتىرىلەتىن زياندى قالدىقتار كولەمىن ازايتۋ جۇمىستارى وسى جول كارتاسى شەڭبەرىندە ىسكە اسىرىلادى», دەدى ماعزۇم مىرزاعاليەۆ.
اقتوبە وبلىسى