قازاقستاندا تۇرعىنداردى قولجەتىمدى باسپانامەن قامتاماسىز ەتۋ ماسەلەسى قاشان دا ماڭىزدى ەكەنى داۋسىز. سوندىقتان سەناتتىڭ قارجى جانە بيۋدجەت كوميتەتىنىڭ دەپۋتاتتارى مۇددەلى مەملەكەتتىك ورگاندارمەن جانە «وتباسى بانكىنىڭ» وكىلدەرىمەن قازاقستاننىڭ تۇرعىن ءۇي ساياساتىن دامىتۋ ماسەلەلەرى بويىنشا كەڭەس وتكىزدى.
سەنات كوميتەتىنىڭ توراعاسى ولگا پەرەپەچينانىڭ ايتۋىنشا, مەملەكەت حالىقتى قول جەتىمدى تۇرعىن ۇيمەن قامتاماسىز ەتۋ ماسەلەلەرىن شەشۋگە باعىتتالعان ءارى ايتارلىقتاي قارجى رەسۋرستارىمەن قامتاماسىز ەتىلگەن باعدارلامالىق قۇجاتتاردى ازىرلەدى. سەناتورلار وسىعان بايلانىستى تۇرعىن ءۇي ساياساتىن رەفورمالاۋ ماسەلەلەرىن ەرەكشە نازاردا ۇستاپ كەلەدى.
«2021 جىلى «وتباسى بانكى» تۇرعىن ۇيگە كىرىستەرى بويىنشا قول جەتىمدىلىك باسپالداعىنا سايكەس ەسەپكە الۋدى, ورنالاستىرۋدى جانە ءبولۋدى جۇزەگە اسىراتىن تولىققاندى دامۋ جانە قولداۋ ينستيتۋتى بولادى دەپ كۇتىلۋدە», دەدى ولگا پەرەپەچينا.
«وتباسى بانكى» باسقارماسىنىڭ توراعاسى ءلاززات يبراگيموۆا بانكتىڭ جاڭارتىلعان قىزمەتى, ونىڭ نەگىزگى مىندەتتەرى جانە ولاردىڭ حالىققا بەرەتىن نەسيەلەرى تۋرالى ايتتى. ونىڭ ايتۋىنشا, بانكتىڭ مىندەتى - تۇرعىن ءۇي قۇرىلىس جيناق جۇيەسىنە قول جەتىمدىلىكتى قامتاماسىز ەتۋ جانە تۇرعىن ءۇي جاعدايىن جاقسارتۋ ءۇشىن جەڭىلدەتىلگەن بانكتىك قىزمەتتەردى ۇسىنۋ بولىپ تابىلادى.
وتىرىستا يندۋستريا جانە ينفراقۇرىلىمدى دامىتۋ ءمينيسترىنىڭ ورىنباسارى قايىربەك وسكەنباەۆ تۇرعىن ءۇي قۇرىلىسىن ىنتالاندىرۋ جونىندەگى قوسىمشا شارالار تۋرالى ايتتى. ولاردىڭ قاتارىنا: تۇرعىن ءۇي ساتىپ الۋعا قۇرىلىس سالۋشىلارمەن وففەيك كەلىسىمشارتتار جاساسۋ, جەكە قۇرىلىس سالۋشىلارعا جوبالىق قارجىلاندىرۋ تەتىكتەرىن ەنگىزۋ, اۋىلدىق جەرلەردە تۇرعىن ءۇي سالۋ شىعىندارىنىڭ ءبىر بولىگىن جۇمىس بەرۋشىنىڭ سۋبسيديالاۋى جانە باسقا ماسەلەلەر بار. سونىمەن قاتار, مينيسترلىك ەلىمىز تۇرعىندارىنىڭ ء وز زەينەتاقى جيناقتارىن پايدالانۋ ماقساتتارىن كەڭەيتۋ تۋرالى ۇسىنىس جاسادى. بۇل جەردە اۋىلعا كەلگەن ماماندارعا الەۋمەتتىك قولداۋ كورسەتۋ اياسىندا بيۋدجەت نەسيەلەرى بويىنشا جۇمىس بەرۋشىنىڭ قىزمەتكەرلەرگە تۇرعىن ءۇي ساتىپ الۋ جانە باسقا دا ناقتى ماقساتتار ءۇشىن بەرگەن نەسيەلەر بويىنشا مىندەتتەمەلەردى وتەۋى تۋرالى ايتىلىپ وتىر.
كەزدەسۋ بارىسىندا سەناتورلار تۇرعىن ءۇي قۇرىلىسىنداعى جاعدايمەن, سونداي-اق ونى دامىتۋدىڭ جاڭا باعىتتارىمەن ەگجەي-تەگجەيلى تانىستى.