مەگاپوليس اكىمى باقىتجان ساعىنتاەۆ «الماتى» تەلەارناسىندا Akimat Live باعدارلاماسىنىڭ تىكەلەي ەفيرىندە كارانتيندىك شارالار ەپيدەميالىق احۋالدى جاقسارتۋعا سەپتىگىن تيگىزەتىنىن جەتكىزدى, دەپ حابارلايدى Egemen.kz.
قالا اكىمى جەرگىلىكتى تۇرعىنداردىڭ سۇراقتارىنا جاۋاپ بەرە وتىرىپ, 12 ساۋىرگە دەيىن قابىلدانعان كارانتيندىك شارالار كاسىپكەرلەرمەن تىڭعىلىقتى تالقىلانىپ جاتقانىن جانە ەپيدەميالىق جاعدايدى جاقسارتۋعا باعىتتالعانىن اتاپ ءوتتى.
باقىتجان ساعىنتاەۆ ءوز سوزىندە: «ەڭ باستىسى جۇمىسىنا ادال كاسىپكەرلەر كارانتيندىك شەكتەۋلەرگە تۇسىنىستىك تانىتۋدا. ەگەر قالامىزدا كوروناۆيرۋس ءورشي ءتۇسىپ, جاعداي باقىلاۋدان تىس قالسا, تولىق لوكداۋن ورىن الۋى ابدەن مۇمكىن. الايدا قازىرگى تاڭدا قالانى تولىقتاي جابۋ كوزدەلمەگەن», دەي وتىرا كاسىپكەرلەر قاۋىمىن كارانتين رەجيمىن بۇزباۋعا جانە جاپپاي ءىس-شارالار وتكىزبەۋگە شاقىردى.
سونداي-اق, الماتى اكىمى قويمالاردا, ءدارىحانالار مەن ستاتسيونارلاردا دارىلىك پرەپاراتتاردىڭ جەتكىلىكتى قورى بار ەكەنىن حابارلادى. قۇرىلعان تۇراقتاندىرۋ قورى شەڭبەرىندە فارماتسەۆتيكالىق كومپانيالار 68 اتاۋ بويىنشا 48 ملن-نان استام دارىلىك زاتتار مەن مەديتسينالىق بۇيىمداردى ساتىپ الۋدى جۇزەگە اسىردى. 28 ملن-عا جۋىق ءدارى اتاۋلارى الماتى قالاسىنىڭ ءدارىحانالارىنا جەتكىزىلدى جانە قويمالاردا 20 ميلليونعا جۋىق پرەپاراتتار بار, ولاردىڭ 8 ميلليونى ازايمايتىن قالدىقتى قۇرايدى. وسىلايشا, قالادا ەكى ايلىق كوۆيدكە قارسى پرەپاراتتاردىڭ قورى قۇرىلدى.
قالانىڭ اۋداندىق اكىمدىكتەرى كۆي ەمدەۋ حاتتاماسىنا كىرەتىن 24 نەگىزگى اتاۋ بويىنشا قالانىڭ 375 ءدارىحاناسىندا دارىلىك زاتتاردىڭ تابىلۋىنا جۇيەلى تۇردە مونيتورينگ جۇرگىزۋدە.