XXI عاسىر – عىلىم مەن يننوۆاتسيا ءداۋىرى. راس, عىلىمعا, تەحنيكاعا بەت بۇرىپ جاتقان جاستار از ەمەس بۇگىندە. جۋىقتا بىلىمگە ۇمىتىلعان جاستار ءۇشىن شىعىس قازاقستان تەحنيكالىق ۋنيۆەرسيتەتىندە بەس وقۋ زەرتحاناسىمەن جابدىقتالعان فيزيكا ورتالىعى اشىلدى.
ونەركاسىپتىك وبلىستىڭ ورتالىعىندا ورنالاسقان شقتۋ باسشىلىعى فيزيكا-ماتەماتيكا عىلىمدارى بويىنشا بازالىق دايىندىقتى كۇشەيتۋدى ماقسات ەتىپ وتىر. سونىڭ ارقاسىندا تەحنيكالىق ۋنيۆەرسيتەت تىرەك وقۋ ورنىنا اينالا الادى.
ءوڭىر ەكونوميكاسىن دامىتۋ ءۇشىن قوعامعا عىلىمي كادرلار كەرەك. ال جاستاردىڭ الاڭسىز عىلىممەن اينالىسۋى ءۇشىن جوعارى وقۋ ورىن قابىرعاسىندا بارىنشا جاعداي جاسالۋى ءتيىس. جاڭادان اشىلعان فيزيكا ورتالىعىندا بىرنەشە وقۋ زەرتحاناسى بىرىكتىرىلگەن. اتاپ ايتساق, «مەحانيكا», «مولەكۋلالىق فيزيكا جانە تەرموديناميكا», «ەلەكتر جانە ماگنيتيزم», «وپتيكا», «اتومدىق جانە يادرولىق فيزيكا», سونداي-اق, «تەحنيكالىق فيزيكا» باعىتتارى بويىنشا.
فيزيكا ورتالىعى ستۋدەنتتەردىڭ تسيفرلىق جوبالاۋ داعدىلارىن قالىپتاستىرۋعا دا مۇمكىندىك بەرەدى.
جوعارى وقۋ ورنىندا ستۋدەنتتەردىڭ ونلاين تۇردە ءبىلىم الۋلارىنا دا بارىنشا جاعداي جاسالعان. مىسالى, ءبىلىم الۋشىلارعا ارنالعان ءبىلىم بەرۋ پورتالىندا EKTU-LAB پاراقشاسى بار. مۇندا ستۋدەنتتەر ونلاين رەجيمدە فيزيكا بويىنشا زەرتحانالىق جۇمىستاردى ورىنداي الادى.